Delia Alfonso Lomba, Marco Patiño López e Santiago Román González, alumnado de 2º de Bacharelato, acaban de ganar dous premios no campionato do mundo d3mobile.es Metrology World League, unha competición internacional de modelado en 3D de precisión co móbil para estudantes de 4º da ESO e Bacharelato.
É a terceira vez que o noso instituto se proclama campión deste certame. A competición está organizada pola USC a través do grupo de investigación USCAN3D, pola FECYT (Fundación Española para la Ciencia y la Tecnología), polo CEM (Centro Español de Metrología) e polo Instituto Geográfico Nacional.
O obxectivo desta competición é fomentar vocacións científicas e técnicas entre o estudantado e espertar a súa capacidade investigadora á vez que aprenden a usar novas técnicas e ferramentas relacionadas coas novas tecnoloxías.
O noso equipo representante obtivo numerosos premios, entre eles unha pulidora de ópticas que doaron ao Departamento de Automoción.
