O pasado día 4 de maio entrou no sistema de préstamo, a través da aula virtual do centro, o pedido número 1000 deste curso académico. Victoria Linarez, de 1º de bacharelato C, solicitou o libro Carta ao cavaleiro de nada de João Marecos e ilustrado por Rachel Caiano (Livros Horizonte).
Durante a pandemia vímonos na obriga de habilitar un sistema que nos permitiese seguir mantendo o préstamo ao alumnado que non podía acceder á sala de lectura de maneira presencial. O departamento de Tecnoloxía púxose a traballar e pouco a pouco foi perfeccionando un sistema que, a día de hoxe, con todas as restricións orixinadas pola pandemia xa superadas, segue aportando moitísima calidade á nosa BIblioteca. Así, o alumnado pode facer a súa petición desde a casa, sen ter que vir á biblioteca, podemos establecer listas de espera por rigorosa orde de petición e avisamos mediante correo electrónico dos retrasos nas entregas que poden prexudicar a outros usuarios.
Cando o alumnado vén á biblioteca en horario de recreos ten ao seu dispor os equipos informáticos para facer os pedidos e ao profesorado de garda disposto a axudar en calquera incidencia que poida xurdir. Cando o seu pedido está listo, reciben unha notificación para que pasen a recollelo. Este sistema permítenos ter un control moito máis minucioso da colección e atender as necesidades específicas do alumnado.
O equipo coordinador da Biblioteca Magdalena Garabatos quere aproveitar esta ocasión para agradecer á comunidade educativa o apoio e recibido e, en especial, ao alumnado usuario da biblioteca polo seu compromiso e uso respectuoso da mesma. Moitos parabéns para todas e todos.
