Events

No mes de marzo, as persoas participantes no proxecto Espazos para a igualdade puxemos nas paredes do instituto, diante dos ollos da comunidade educativa, as imaxes, as vidas e obras de mulleres. Valiosísimas, imprescindibles obras e vidas que constrúen, mais tantas e tantas veces apartadas, silenciadas, disfrazadas, negadas, invisibilizadas, ninguneadas.

Nós propomos abrir os ollos, recoñecer, honrar, contribuír para que ocupen espazo, o lugar que lles corresponde. Educarmos, aprendermos en igualdade e diversidade é contribuír a enriquecer o mundo.

Seguiremos ocupando espazos para a igualdade, non queremos que a atención á igualdade se encerre nunha data, nun mes; marzo é un comezo, non un punto nin un límite. Participade conosco neste proxecto que acaba de comezar hai lugar para todas as persoas.

"As tecnoloxías ao servizo das linguas" foi o título da charla que o profesor da USC, Ernesto González Seoane, impartiu esta mañá ao alumnado de ESO.

Nela falounos da revolución que supuxo a aparición das novas tecnoloxías e mais Internet para o estudo da lingua, e o cambio significativo no método de traballo que tales aparicións conlevaron para a lingüística, en xeral, e a lexicografía, en particular.

Presentou tamén os principais recursos informatizados da lingua galega, dispoñibles de balde en Internet, algúns de grande utilidade para o alumnado, como poden ser o Tesouro informatizado da lingua galega, o utilísimo Dicionario de dicionarios, o Tesouro do léxico patrimonial galego e portugués, a Cartografía dos apelidos de Galicia ou o Ránking dos 19 nomes máis populares en Galicia (2000-2014).