Luns 21 de outubro foi o día escollido por Xoana para presentar no noso centro, grazas ao apoio da Fundación Paideia, o seu disco Dardos. A verdade é que nos deixou sen alento coa súa profesionalidade sobre o escenario no que interpretou algúns dos seus temas máis coñecidos; temas nos que a protesta e a reivindicación están presentes xunto con outros máis intimistas e sempre nunha lingua moi traballada e impecable. Despois de escoitala non nos estraña nada que fora finalista en sete categorías nos últimos premios MIN de música. Brava

O Club de Lectura de Igualdade e Xénero iniciou a súa andaina coa asistencia, o pasado venres 18 de outubro, á representación da obra Elisa e Marcela, a cargo da compañía A Panadaría. Ao finalizar a función tiramos esta fotografía, que non retrata a todas as persoas que asistimos, pero que sen dúbida nos representa en conxunto, pois nela están capturadas a xenerosidade dunhas actrices inmensas, as risas dun anaco de tempo descontraído e as cores vivas do amor libre. 
O camiño cara á igualdade é longo... pero temos os pés preparados!

O pasado 14 de outubro celebramos no centro o Día das Escritoras.

O Día das Escritoras é unha conmemoración promovida pola Biblioteca Nacional de España xunto coa Federación Española de Mulleres Xestoras, Executivas, Profesionais e Empresarias (FEDEPE) e a Asociación Clásica e Moderna que, desde 2016, busca reivindicar o traballo e o legado das escritoras ao longo da historia a partir da lectura de fragmentos representativos das súas obras. Unímonos a esta iniciativa coa lectura de fragmentos durante o primeiro recreo por parte do alumando do centro na entrada do centro. Ademais os textos relacionados foron expostos na entrada do centro e na Biblioteca contamos cunha selección de libros de Literatura Xuvenil con selo de muller.

Pódense ver fotos na seguinte ligazón Fotos

O pasado venres 11 de outubro o alumnado de 3ESO e o de Programación de 2ºBACH tivo a sorte de coñecer de primeira man como se crea un videoxogo. Para iso contamos no centro coa presenza de  Nicolás Casal de Fosfatina Studios e de Miguel Areán de Polygon.e Studios onde se elaborou Cricktogame o primeiro xogo galego e en galego para Nintendo Switch. Sen dúbida, un ámbito que empeza a coller pulo en Galicia, sobre todo, coa apertura do grao de Creación dixital.

Na sesión do 3 de outubro traballamos no laboratorio de química. En primeiro lugar, visualizamos unha presentación para introducir o concepto de pH, e a súa aplicación a disolucións.

A continuación, o alumnado STEM realizou diversas prácticas de estimación e medición do pH en produtos habituais nas nosas casas e en diferentes disolucións. Finalmente, levaron a cabo unha valoración de disolucións de HCl de concentración descoñecida a partir de disolucións de NaOH de concentración coñecida.

A Fundación Amancio Ortega convoca 600 bolsas dirixidas a alumnos de 4.º da ESO de centros educativos de España para estudar durante o curso académico 2020/2021 primeiro de Bacharelato en Canadá ou en Estados Unidos. 100 bolsas asignaranse aos participantes dos centros educativos da Comunidade Autónoma de Galicia e 500 bolsas aos participantes dos centros educativos das outras Comunidades Autónomas de España.
Prazo de inscrición: do 23 de setembro ao 30 de outubro de 2019.
Bases e inscricións nas páxinas webs www.becas.faortega.org ou en https://www.boe.es/diario_boe/txt.php?id=BOE-B-2019-39779

Publícanse as listaxe definitivas de admitidos e excluídos da axuda de fondolibros. Esta información está dispoñible tamén no taboleiro interior do instituto.

No arquivo chamado "lista de libros complementarios 2019" figura para cada alumno e alumna se algún dos libros adxudicados son complementarios, indicados cun (c) ao final do nome do libro. 

O reparto dos libros complementarios, que son de nova adquisición, demorarase uns días. En canto cheguen avisamos a través desta páxina web, e por medio dunha nota que se entregará ao alumnado concernido.