O fin de curso está moi próximo...

O alumnado de 1.º de BACH tivo unha charla informativa sobre agresións e violencia sexual a cargo de persoal especializado.

Para rematar, no mes de xuño realizáronse dúas charlas – coloquio.

A primeira foi sobre violencia de xénero e sobre as circunstancias legais. Esta charla foi impartida pola maxistrada Ana López Suevos en dúas sesións seguidas: unha explicativa para o alumnado e outra de formación para o profesorado sobre o Protocolo de Violencia de Xénero nos centros educativos.

A segunda das charlas do mes e última do Proxecta de 365 días de respecto e igualdade foi coa xogadora Pauleta Domínguez, sobre deporte e igualdade. Esta charla foi xestionada de maneira interdisciplinar coa docente de Lingua Castelá, Begoña Louzao, quen coordinou as entrevistas que os rapaces de 2.º da ESO lle realizarían á xogadora como se fose unha rolda de prensa. Posteriormente, a rapazada de portugués asistiu a esa “rolda de prensa” ao estar xogando Pauleta Domínguez en Lisboa e tamén puideron reflexionar sobre a importancia de aprendizaxe de idiomas. A súa vez, visibilizaron a importancia que supón que para o fútbol galego feminino haxa referentes a alto nivel como é o seu caso ou o de Verónica Boquete. No terceiro trimestre tamén se lles deu a coñecer “o primeiro álbum de equipas femininas” e comezaron a colección de cromos. Despois da charla de Pauleta Domínguez, conseguiron completar o álbum e pegar o seu cromo. Desta forma, pecharon esta actividade cotiá e viron como normal que as protagonistas fosen mulleres.