Di non á violencia de xénero...

No mes de novembro, organizáronse cartaces, imaxes e lemas para facer visible en cada lugar do centro o rexeitamento de toda a comunidade educativa á violencia. Reciclamos o mural do curso pasado como símbolo do traballo feito polos compañeiros en anos anteriores e démoslle outra vida. A economía circular estivo presente ao carón do respecto e da igualdade. Cada xesto a prol da igualdade, conta. Por iso, voltamos pegar na escaleira esas palabras recortadas polo alumnado para que o traballo dos compañeiros non quedase no esquecemento.

Nas aulas de 1.º da ESO creáronse unha serie de indicacións coa palabra NON introducindo cada unha desas frases que deberían desbotar do seu día a día e que, posteriormente, colocarían en cartaces polos corredores. Ex. Non insultar...

Máis tarde, estes rapaces fixeron un decálogo de boas prácticas para que haxa respecto e igualdade no Instituto. Isto fixo que eles se responsabilizasen e analizasen a situación actual nos deportes, no seu día a día… e desevolvesen ao mesmo tempo a súa iniciativa e a súa competencia cívica e social.

Nas aulas de 1.º, 2.º e 3.º da ESO de Galego e Portugués reflexionaron sobre todo tipo de mensaxes que aparecían en redes sociais e outras que escoitan no seu contorno máis próximo. O profesorado foi resolvendo dúbidas sobre diversos conceptos e eles extraeron pequenas ideas de porque as leis continúan obsoletas canto á violencia de xénero.

Doutra banda, contamos coa campaña do Concello da obra “Amor amargo”, estivo destinada ao alumnado de 3.º e 4.º da ESO usando como base o libro de Xosé A. Perozo. O obxectivo era divulgar entre o alumnado e entre o profesorado coñecementos sobre a problemática da violencia de xénero na nosa sociedade. Cada estudante recibiu un exemplar en propiedade e cada titor/a xestionou na hora de titoría actividades de opinións, foros…  Tamén se intentou que estes libros chegasen a outros rapaces e prestáronse na “Hora de Ler”.

Na semana do 25 de Novembro, ademais de traballar na cartelería, de realizar un decálogo feminista e de que en cada titoría se concienciase sobre o problema da Violencia ofreceuselle un obradoiro a 4.º da ESO, o espectáculo de Lucía Aldao e María Lado. Esta performance, realizouse en colaboración coas titorías e co departamento de Lingua Galega e de Historia. Nel conxugouse poesía e música e desbotaron todo tipo de estereotipos e prexuízos de xénero.