Bases do concurso de debuxo: “Pantallas si, pero con sentidiño”

1. Ámbito do concurso

Co propósito de incentivar o uso responsable das pantallas, dende o CEIPP de Baño-Xanza organizamos o concurso de debuxo “Pantallas si, pero con sentidiño”, no que poderán participar a nivel individual nenas e nenos de entre 3 a 12 anos en 4 categorías. O obxectivo do concurso é seleccionar debuxos que axuden a promover un uso adecuado dos dispositivos dixitais.

2. Quen pode participar?

2.1. Nenos e nenas matriculados no CEIPP de Baño-Xanza, individualmente

Establécense as seguintes categorías de participación:

-Educación Infantil.

-1º Ciclo de Educación Primaria.

-2º Ciclo de Educación Primaria.

-3º Ciclo de Educación Primaria.

3. Cal é a temática do concurso?

O tema central do concurso é o uso responsable e saudable das pantallas (móbiles, tablets, tv, ordenadores…). Os debuxos poden incluír un slogan pero non é obrigatorio, deben promover alternativas ás pantallas ou exercer de crítica ao seu mal uso, e teñen que ser orixinais.

4. Requisitos

4.1. Data límite de presentación

O prazo para a presentación dos traballos rematará o 2 de decembro de 2024.

4.2. Formato de presentación

Os participantes poderán presentar cantos debuxos desexen. Pódese usar calquera técnica artística (excepto purpurina e tintas metálicas), sendo o formato de presentación o DIN-A4.

Os traballos presentaranse no centro educativo CEIPP Baño-Xanza xunto coa autorización dos pais/titores legais para poder participar. 

4.3. Lugar de entrega da información

Os debuxos serán entregados ao profesorado do CEIPP de Baño-Xanza [Rúa Baño, S/N 36645, Xanza (Santa María), Valga].

5. Gañadores

Entre todos os debuxos recibidos, un xurado composto por 5 mestres/as do CEIPP de Baño-Xanza elixirá os gañadores en cada categoría. Valorarase a técnica, a innovación, a composición, a estética e a creatividade dos debuxos presentados. O fallo do xurado terá lugar o 5 de decembro 2024.

6. Premios do concurso

Cada gañador da súa categoría recibirá un diploma e un lote de agasallos.

7. Notificación dos gañadores

No prazo de 3 días desde a resolución do Xurado, o CEIPP Baño-Xanza porase en contacto cos participantes dos debuxos gañadores e cos seus pais/tirores legais. O fallo do xurado tamén se fará público na páxina web do CEIPP de Baño-Xanza.