No día de hoxe damos comezo ao que sería a última semana de colexio, polo que esta será a última semana de propostas de actividades. O verán está á volta da esquina e nuns meses xa nos volvemos ver!
Aquí tendes as propostas desta última semana deste curso:
Luns, 15 de xuño.
Onte foi 14 de xuño, Día Nacional das linguas de signos españolas. De parte de Paula, a Intérprete de Lingua de Signos que temos no cole, deixámosvos o seguinte vídeo cos dereitos das nenas e dos nenos contado en lingua de signos:
https://www.youtube.com/watch?v=ZyYNhmhD37g
E coma tódolos luns, compartimos o vídeo coas actividades realizadas na semana pasada:
Este será o último vídeo que colguemos este curso, xa que para a semana xa non haberá entradas no blog. As fotos e vídeos desta semana compartirémolas directamente no grupo de Telegram.
Martes, 16 de xuño
Para o martes traémosvos unha proposta de conto que moitos dos nenos e das nenas xa coñecen, trátase de Elmer:
https://www.youtube.com/watch?v=T3u0AoA-E-s
E velaquí temos a última actividade de grafismos ou grafoarte: a proposta é que fagan o Día de Elmer:
O primeiro paso sería que debuxaran o seu elefante ou elefanta, polo que o ideal sería que fosen eles e elas os que debuxasen o elefante, porque como di no conto, no lugar no que Elmer vivía, había elefantes altos, baixos, delgados, gordos,... pero se non lles apetece podedes imprimilo, copialo ou calcalo dunha imaxe da internet.
Unha vez realizado o elefante xa poden enchelo cos grafismos e cores que máis lle gusten de forma creativa. Seguro que saen propostas diferentes!
Mércores, 17 de xuño
Para o mércores traemos dúas propostas, unha que implica movemento e o outro que require bastante concentración:
O primeiro é un xogo de encestar moi sinxelo, que o podedes facer nas vosas casas e se o tempo o permite podedes facelo na praia, xardín,... con cubos da praia e unha pelota: https://aulasgalegas.org/cantos-puntos-sacas/
O outro xogo co que podemos voltar á calma é este: https://conpequesnacasa.blogspot.com/2020/06/xogos-de-movemento-para-crianzas_9.html
É unha proposta dunha mestra á que lle queremos agradecer todo o que estivo a compartir nestes meses con todos nós. Grazas, María!
Xoves, 18 de xuño
Para este día queremos proporvos unhas actividades moi sinxelas para traballar as matemáticas e a psicomotricidade.
A TORRE DOS NÚMEROS:
Con esta actividade repasarán de forma manipulativa a noción de cantidade dos números así como a iniciación á suma. Ademais de traballar a psicomotricidade fina. Consiste en ir apilando tapóns ou outro tipo de material de refugallo en función das cantidades que nos saian nun dado. A ver se conseguen facer unha torre alta. Imos pedíndolles que verbalicen que vai pasando: se temos 2 taṕons e engadimos 3, que pasa? o máis importante é que vaian asociando o concepto de que sumar sempre implica engadir algo máis.
A continuación deixamos o vídeo de onde sacamos esta proposta:
https://www.instagram.com/p/CBLXktkHt_4/?igshid=wfdwjjm2tzxa
O COMECOCOS:
A proposta está no seguinte vídeo:
https://www.instagram.com/p/CBQRgyvCIEf/?igshid=9rmcb7facfzb
En primeiro lugar teremos que facer o noso xogo. A continuación collemos un dado… e a xogar!!!
Venres, 19 de xuño
E hoxe é venres, polo tanto, tócanos VENRES CIENTÍFICO co seguinte experimento:
https://trasteandoados.wordpress.com/2019/11/13/colores-que-suben/
Lembrade non contar a explicación e guiar o proceso para que pensen de forma científica facendo preguntas para que vaian facendo hipóteses sobre o que vai a pasar e que poidan ir comprobando o que sucede e iniciándose así en facer deducións.
Bó verán!