BREAKOUT NA ESCOLA
Achégase unha das festas máis máxicas do ano: o Samaín! Para conmemorar esta tradición especial, dende EDLG e o departamento de inglés, en colaboración co resto de mestres e mestras, están organizando un emocionante Breakout na escola. Non vos podedes perder os vídeos de presentación que vos dará un avance da aventura que nos espera esta semana.
Versión para primaria
Versión para infantil
ABRINDO PORTAS
Esta semana a asociación Fademur (Federación de Asociacións de Mulleres Rurais) achegouse ao colexio para desenvolver o obradoiro Abrindo portas, dirixido ao alumnado de terceiro e cuarto curso e centrándose na educación en valores e igualdade. Traballaron conceptos coma a tolerancia, a igualdade, o racismo e técnicas de resolución de conflitos do día a día. Ademais, realizaron unha lectura visual do conto Por cuatro esquinitas de nada de Jérôme Ruillier, que transmite a idea de que ser diferente non é un problema, senón que cómpre atopar solucións para integrar a todas as persoas. Finalmente, facilitáronselle letras e pictogramas para que, en grupos, o alumnado elaborase un collage partindo dunhas das palabras traballadas no taller.
50º ANIVERSARIO
Este ano é especial para todos nós. O noso centro está a celebrar o seu 50 aniversario, medio século cheo de historias, aprendizaxes, sorrisos e, sobre todo, dunha comunidade que segue a medrar con cada xeración que pasa por estas aulas.
Cincuenta anos de ensinanza é o tempo que nos vén á mente para expresar este camiño compartido. Non só durante a etapa escolar, senón tamén despois, pois o colexio segue presente na vida de cada un de vós, nas lembranzas, nas amizades que perduran e no vínculo que, no fondo, nunca se rompe. Moitos de vós sodes pais ou nais que tamén estudastes aquí, e pronto teremos avós e avoas que un día foron alumnos/as e que agora ven aos seus netos e netas gozar da mesma experiencia. Este é o verdadeiro tesouro dun centro rural coma o noso: a conexión persoal e permanente que se crea entre familias, alumnado e profesorado.
