O alumnado potencia a súa creatividade a través da banda deseñada en traballos de expresión escrita.

No segundo trimestre do curso, o noso alumnado destacou polo seu entusiasmo e creatividade ao empregar a banda deseñada para realizar traballos de expresión escrita seguindo a liña de traballo proposta por Bibliotecas Escolares de Galicia para este curso. Esta ferramenta pedagóxica foi incorporada en diversas ocasións, proporcionando aos estudantes unha plataforma para explorar e expresar as súas ideas de xeito máis dinámico e estruturado.

A banda deseñada, unha metodoloxía visual e didáctica, permitiu aos nenos e nenas desenvolver habilidades esenciais na escritura, tales como a organización de ideas, a coherencia e a cohesión textual. A través desta ferramenta, os estudantes puideron crear relatos, poemas e descricións, fomentando así a súa imaxinación e mellorando a súa competencia lingüística.

Durante as sesións, o alumnado mostrouse entusiasmado e participativo, gozando do proceso creativo que a banda deseñada facilita. Observamos unha notable mellora na calidade dos textos producidos, así como un maior interese pola escritura entre os nenos e nenas. Ademais, esta actividade fomentou o traballo colaborativo, xa que en moitas ocasións compartiron as súas creacións e proporcionaron retroalimentación construtiva entre eles.

Esta experiencia demostrou que a creatividade e a expresión escrita poden florecer cando se brindan os recursos adecuados e se estimula o interese dos alumnos.

Grazas á liña de traballo deste curso Bibliotecas escolares, a banda deseñada foi unha revelación nas nosas clases de expresión escrita. Vimos como o alumnado se involucra máis e se sente orgullosos dos seus traballos. Sen dúbida, seguiremos utilizándoa e explorando novas formas de facer que a escritura sexa unha actividade emocionante e enriquecedora para todos e todas.

Esta experiencia positiva non só enriquece a aprendizaxe académica dos estudantes, senón que tamén senta as bases para unha educación máis creativa e inclusiva, onde cada neno e nenas pode atopar a súa voz e expresala con confianza e orixinalidade.

MÁIS ACTIVIDADES

ODS 13 : ACCIÓN POLO CLIMA
O grupo de 6º de Educación Primaria traballou o ODS 13 Acción polo clima, que busca tomar medidas urxentes para combater o cambio climático e establecer unha resposta global para fortalecer a capacidade de adaptación e a resiliencia das distintas comunidades en relación cos riscos climáticos.
Despois da concienciación sobre a conservación dos ecosistemas realizada o ano anterior, este curso os alumnos e alumnas de sexto deron un paso máis alá e investigaron e puxeron en marcha algunhas das prácticas máis recomendables relacionadas coa agricultura sostible como modo de conservación e fomento da biodiversidade do planeta.

Desastres.

Doc.1

Doc.2

Doc.3

Doc.4
Agricultura rexenerativa
O inicio da nosa viaxe comezou coa documentación sobre o tema a través dos libros seleccionados da nosa Biblioteca e dos medios tecnolóxicos: especialmente coa visualización dos vídeos de “Javier Peña/Hope, en pie por el planeta”, sobre todo o que nos abriu o camiño foi: “Agricultura Rexenerativa: o futuro?” . Deste xeito,  o alumnado descubriu que había que empezar por “facelo todo ao revés”: deixar de cavar a terra, permitir a aparición de insectos, usar compostaxe vexetal, esmagar as plantas do ano anterior, usar a rotación de cultivos como control de pragas...
Así que comezamos por informarnos de cales eran as bases deste tipo de agricultura rexenerativa e das experiencias que se levaban a cabo na nosa terra. O alumnado, en parellas, fixo varias presentacións sobre os tres aspectos do noso proxecto: a compostaxe, o hotel de insectos e a agricultura rexenerativa e expuxéronas diante do grupo clase.

Documentos.

Agricultura rexenerativa.

Agricultura rexenerativa no noso horto: a compostaxe.
Unha vez que soubemos a teoría o seguinte paso foi levalo á práctica. Decidimos que o primeiro paso para aplicar a agricultura rexenerativa no noso horto sería preparar a terra para facer compostaxe na mesma.
 Aproveitamos o outono  e o inverno para machucar as plantas que quedaran na horta o curso anterior, cubrímola con cartóns (sen tinta) que había no centro, recollemos as follas e paus do patio e tapamos todo. Deste xeito puidemos comezar a facer compostaxe antes mesmo de contar cun composteiro.
As catástrofes marítimas: un alto no camiño
O 8 de decembro de 2023, o Toconao, un buque de carga perdeu seis colectores, polo menos un con pellets de plástico, a 80 quilómetros da costa de Viana do Castelo (Portugal). En poucos días espalláronse polas costas galegas, asturianas, cántabras e mesmo polas de Euskadi. Esta nova obrigounos a que parásemos a analizar algunhas das múltiples catástrofes marítimas que houbo fronte as nosas costas galegas nos últimos 50 anos.
Foi así como aprendemos nomes tan estraños como: Urquiola, Casón, Prestige... comprobamos como a historia se repite unha e outra vez e o final sempre é o mesmo: múltiples vítimas mortais e miles de quilómetros de natureza afectados.
Pero para os nenos e nenas de sexto foi un paso máis na concienciación sobre a importancia de conservar os ecosistemas e de loitar polo clima.

Documentos.

Agricultura rexenerativa. A compostaxe.

Proxecto de construción: un hotel de insectos!
Desde principio de curso o soño dos nenos e nenas de sexto foi a construción dun hotel de insectos á beira da horta escolar. A fase de documentación serviulles para coñecer as múltiples vantaxes que tería a súa edificación: aumento da biodiversidade da zona, aumento da polinización nos arredores, control de pragas sobre as hortalizas plantadas...
Unha vez que tiveron claros os beneficios, buscaron cales serían os materiais que precisarían para acometer a súa obra e, despois de elaborar carteis para os diferentes niveis escolares, decidiron pedirlle axuda a toda a comunidade educativa. Temos que darlle grazas a todos por colaborar, pero especialmente aos máis cativos do centro que foron ata o de agora os que máis achegas fixeron ao noso soño.
Estamos pendentes de pintar as “paredes” e de preparar os “cuartos”para os nosos bichiños. Coma sempre buscaremos que todos os nenos do colexio nos axuden na fase final do noso proxecto. Non nos esqueceremos de facer o concurso para elixir o mellor nome para o noso hotel. Animádevos a participar!  Non só será divertido, senón que lograremos un cambio real a favor do clima no noso entorno. Que máis se pode pedir!

Documentos.

Hotel de insectos

Doc.1

Doc.2

HORA DE PLANTAR NA NOSA HORTA!
Antes de poder plantar, acondicionamos a horta:  afondamos os bancais para que tivesen maior profundidade e cubrímolos con terra nova, aclimatamos os arredores con malla anti-herbas e, por último, aproveitando que estabamos a traballar as medidas de superficie, medimos a área coa que contabamos para cultivar.
Este ano decidimos “reutilizar”  para axudar a nosa economía e a ao medio ambiente, así que, seguindo co espírito da agricultura rexenerativa, aproveitamos as sementes e plantas do ano anterior e transplantámolas cando a choiva desta primavera nolo permitiu. Agora toca coidalas e ver como medran!

Ao longo do curso 2023/2024 o club de lectura de 4º de educación primaria formado por 12 nenos e nenas que traballaron os seguintes libros:

• 1º trimestre:
  
  RITA E OS LADRÓNS DE TUMBAS de Mikel  Valverde. O libro cativou aos nenos e ás nenas participantes do club de lectura, e agora buscan estender o seu entusiasmo  a toda a comunidade escolar. A obra, escrita  por Mikel Valverde, transporta aos lectores a unha emocionante aventura chea de misterios, amizade e valentía.

• 2º trimestre:
  
  MIÑA AMIGA INVISIBLE  de Eduardo Santiago.
  Cando a súa familia abandona a cidade para vivir nunha aldea preto de bosque, Uxía descobre un mundo descoñecido onde nada é o que parece ou non parece o que é. O veciño máis próximo é un apicultor rabudo que, no canto de criar abellas, semella poñer trampas para apreixar fadas. A nova escola tampouco é como esperaba, tendo que soportar o acoso e as burlas dos máis brutáns simplemente polo seu aspecto (e por ser máis intelixente que todos eles). Coa inesperada aparición dunha amiga invisible intentará superar todos os atrancos que a realidade teima en poñer no seu camiño.

• 3º trimestre:
  UNA BOLSA DE PATATAS FRITAS  EN LA POLINESIA  de Jordi Sierra i Fabra.
  Shiya vive tranquilamente en Takuu, unha pequena illa da Polinesia, ata que a subida das augas por mor do cambio climático ameaza con facer desaparecer a illa. Shiya atopa na agua unha bolsa de patacas fritidas que vén de moi lonxe. Xunto co seu amigo o gran paxaro de as vermellas viaxará ata a fábrica de patacas tratando de descubrir a orixe da bolsa... Unha historia sobre as consecuencias que teñen os nosos actos, por insignificantes que podan parecer nun principio.

No curso escolar 2023/2024 o alumnado de  4º curso utilizou  dúas mochilas viaxeiras que foron intercambiadas cada quince días durante todo o curso. O traballo de alumnado quedou reflectido nos debuxos que se acompañaron nos libros configurados para elo.

As mochilas viaxeiras permitíronlle  ao alumnado un préstamo por un período de quince días, para compartir coas familias o contido da mesma. O  contido do material foi escollido polo titor de 4º curso, supervisado pola biblioteca e procurando que tivera a maior variedade de textos e formatos para que o alumando tivera onde elixir.

Acompañou a estes materiais “O diario da mochila” no que, tanto os nenos/as como as súas familias, aportaron a súa opinión, novas creacións, debuxos, achegas, …, sobre o contido da mochila.

O material que acompañou a mochila do alumando de 4º curso de Educación Primaria foi o seguinte.

1ª mochila:

NARRATIVA:

• LINGUA CASTELÁ:
• Flambus Green.  El duende en la ciudad. Roberto Pavanello.
• LINGUA GALEGA:
• Unha volta ao mundo. Xavier Sarrionandía.. Editorial Kalandraka.

REVISTA:

• Reportero DOC . Nº 305.

CÓMIC:

• Los diarios de Cereza. El zoo petrificado. Joris Chamblain.

2ª mochila:

NARRATIVA:

• LINGUA CASTELÁ: Flambus Green. Operación Ballena. Roberto Pavanello.
• LINGUA GALEGA: A formiga coxa. Marilar Aleixandre. Editorial Xerais.

REVISTA:

• Reportero Doc. Nº 297.

CÓMIC:

• Los diarios de Cereza. El libro misterioso. Joris Chamblain.

Os alumnos e alumnas desfrutaron do contido das mochilas viaxeiras, completando  as opcións de lectura co préstamo semanal de libros que se realizou na biblioteca do centro.

Destacar que ler en familia foi unha actividade moi divertida que axudou a entrelazar lazos entre pais e fillos e enriqueceunos a todos. Ademais, a lectura enriqueceu intelectualmente aos nenos, estimulando a súa imaxinación, a capacidade para resolver problemas, a memoria e a linguaxe, axudoulles  a coñecer o mundo no que vive e impulsoulles a querer saber máis. Comentando as lecturas que fixemos todos xuntos podemos reflexionar sobre o lido, os valores do libro infantil e xuvenil que escollésemos, explorando nosos propios sentimentos. É, en definitiva, unha axuda na educación dos nosos fillos, polo que é importante proporcionarlle ao alumnado lecturas estimulantes, acompañalos no descubrimento do pracer da lectura, sendo un hábito moi saudable e cheo de beneficios.

Como conclusión dicir que o alumnado valora positivamente o contido das mochilas, achegando e compartindo os seus gustos persoais para vindeiras eleccións dos contidos das mesmas e reflectindo nos cadernos ,mediante debuxos ou textos, o que o contido dos libros elixidos lles suxire.