Esta semana estivemos traballando nunha obra de Yayoi Kusama chamada "Eyes flying in the Sky" e decidimos reinterpretala ao noso xeito. Somos un equipo e como tal traballamos todos e todas xuntos para conseguir facela: fixemos os puntos, vendo que tamaños podíamos empregar e en que lugar colocar cada un, debuxamos os nosos ollos de diferentes cores, formas, tamaños, iso si, con pupila e pestanas incluídas, e a continuación só nos quedaba pegalos e firmar a nosa obra.

O pasado martes celebramos os aniversarios de Daniela e Candela, que xa fixeron 3 anos! Foron unhas celebracións moi fermosas percorrendo a súa vida dende que naceron ata o día de hoxe. Dimos todas as voltas ao sol que nos tocaba dar e sopramos a vela para deixar paso a un novo ano de vida.

Parabéns Candela e Daniela! Encántanos celebrar con vós as vosas vidas.

Esta semana rematamos coa maleta na nosa clase. Candela e Alicia trouxeron algunhas das súas cousas máis preciadas, que como non podía ser doutra forma incluían a música e os bebés e bonecos.

 Aproveitamos para agradecer ás familias a colaboración prestada durante todos estes días nos que a maleta viaxou de casa en casa axudando a traer á escola aquelas cousas que as nenas e nenos máis valoran para poder así compatilas co resto de compañeiras e compañeiros e coa mestra. É unha dinámica moi bonita que une a casa, un espazo coñecido e seguro onde poder ser eles e elas mesmos, coa escola, un novo espazo aínda por coñecer onde poder vivir moitas emocións e experiencias, comezando por esta onde todos e todas xogamos, observamos, escoitamos e aprendemos da cantidade de cousas que temos en común.

 Infinitas grazas a todos e todas!

Ao longo deste mes, entre as moitas cousas que estamos descubrindo do noso novo cole, fomos a coñecer a biblioteca. Este é un espazo moi relevante do noso centro, pois é onde levamos a cabo miles de actividades, onde podemos coller contos para ler na casa e na clase, onde explorar novos xogos, música e moitas máis cousas coas que desfrutar.

Neste primeiro trimestre aínda non imos levar libros para a casa, pero si que estamos escollendo algúns para a clase, aprendendon a colocalos, como tratalos, coñecendo as normas da biblioteca, explorando as posibilidades deste espazo e aprendendo a movernos por el.

Agardamos pasar moitos momentos especiais aquí.