IES Xoán Montes

Hoxe 25 de abril, o alumnado de 4º da ESO A e C, acompañados por Belén Arrojo, Inés Iglesias e a que escribe, Beatriz López, puido desfrutar dunha xornada totalmente distinta e que esperamos espertase moito interese na gran variedade de estudos que oferta a FP.

O Congreso FP Innova 2024, é a sexta edición dun evento referente na difusión da innovación didáctica e tecnolóxica, da transferencia de coñecemento e da capacidade de emprender na FP de Galicia que se celebra na Cidade da Cultura, en Santiago. No enlace poden verse os diferentes obradoiros aos que podía ir o alumnado, ademais de numerosos stands con información moi práctica dos proxectos de emprendemento xerados nos centros de ensino.

Tamén houbo catas de pinchos ofrecidos por alumnado de ciclos de cociña, e parte do noso alumnado saíu no telexornal, no 12:46 (https://www.rtve.es/play/videos/telexornal-galicia/telexornal-galicia-2-25-04-2024/16076964/)

Lambóns!

Imaxes de FP innova de Beatriz López CC BY-SA

Hoxe, 24 de abril, nas Xornadas de Orientación que para 4º de ESO se organizan desde Orientación no noso centro, puidemos coñecer ofertas de formación e experiencias de exalumnos de moito interese.

Mamen Fernández Romero e Óscar Alfeirán Varela do Departamento de Marketing do Centro Superior de Hostelería de Galicia, e este último tamén profesor de TICs, ademais da Alejandra Villanueva Muñoz, exalumna do citado centro e actualmente Directora do Eurostars Gran Hotel de Lugo, achegáronnos información non so dous grados que se imparten, Dirección hotelera e Gastronomía, senón do tipo de formación, con moita parte práctica e posibilidades de traballar tanto en España como en outros moitos países. É un sector con moitas saídas profesionais.

Recordamos que aos grados pode accederse mediante o bacharelato, pero tamén vía ciclo medio e ciclo superior de FP. Na páxina web pode facerse unha visita virtual ou solicitar unha visita ás instalacións para coñecer o funcionamento do CSHG así como toda a súa oferta de formación máis detalladamente.

Imaxes de Beatriz López

Hoxe, 17 de abril, nas Xornadas de Orientación que para 4º de ESO se organizan desde  Orientación no noso centro, puidemos desfrutar dunha charla realmente motivadora.

María Losada Burgo, exalumna do centro, músico que toca o fagot e vive diso en Amsterdam, contounos non so toda a súa experiencia vital senón a forma na que se enfrentou e se enfrenta a todas as decisións. Leccións inspiradoras para un público que escoitou en absoluto silenzo, mostra de que o seu relato e a súa forma de comunicalo nos fascinou. 

Saír da zona de confort, perseguir os soños, buscar o equilibrio entre o traballo e o cuidado a un mesmo, apoiarse nos amigos, innovar... todo isto e moito máis tivo cabida nese tempo, que soubo a pouco, e que nos fixo admirar a súa perseverancia e optimismo.

Agradecemos inmensamente que compartises connosco tanto... es unha gran referente para todos!

Actualización! No arquivo adxunto pode verse un resumo da charla que María tivo a amabilidade de prepararnos,  xa que non puido verse no seu día, e tampouco puido mandárnola como presentación. Grazas de novo!

Charla de María Losada Burgo. Imaxe de Beatriz López

O venres 12 de abril unha monitora da ONG Taller de Solidaridade achegou a parte do alumnado a exposición de Enredadas no cambio que temos temporalmente no centro.

Reflexionaron sobre o emprendemento e a súa relación co concepto de éxito empresarial, e trataron a importancia do empoderamento feminino e de ter referentes deste xénero. 

Dinamización Enredadas no cambio Imaxes Beatriz López