IES de Soutomaior

Galería de Imaxes

O actor e guionista Federico Pérez Rei visitou o noso centro os pasados 25 de outubro e 8 de novembro para impartir un Curso de Iniciación á Narración Oral ao alumnado da materia Obradoiro de Habilidades Comunicativas.

Ao longo de dúas sesións, o noso convidado, Premio Mestre Mateo 2019 á Mellor Interpretación Masculina de Reparto no multipremiado filme Trote, de Xacio Baño, foinos dando as súas claves para construír historias e levalas ao escenario: dende como captar o motivo do que pode xurdir o relato, como darlle forma, como botar man da improvisación no directo, o aproveitamento da cultura popular e rural como fonte de inspiración e espello na que aprender, etc. e, finalmente, como compartirlas ante un auditorio. Aquí foi cando Sabela, David e Isaac mostraron e interpretaron as historias nas que están traballando para participar na fase final do XVIII Concurso Tíralle da Lingua, que terá lugar o próximo 28 de novembro no Teatro Principal de Santiago. Aínda quedan días para traballar os relatos pero vese que hai madeira de contadores e contadoras en Soutomaior.

Dende aquí agradecemos a gran disposición, a proximidade e o cariño de Federico demostrada nestes encontros co noso alumnado e á AS-PG pola súa colaboración e por organizar este certame. O Tíralle da Lingua procura incentivar e normalizar o uso oral da nosa lingua, converter o idioma en instrumento de comunicación normal, de creación e recreación de historias, de lingua de uso do noso sistema educativo, en definitiva, de devolverlle ao galego o espazo que lle corresponde.

Moitas grazas, Fede! Moitas grazas, AS-PG! É a quenda de Sabela, David e Isaac!

O noso centro foi seleccionado en dous programas do Plan Proxecta para o Curso 2019-2020 segundo a resolución definitiva publicada pola Consellería de Educación, Universidade e Formación Profesional. Este Plan está orientado a fomentar a innovación educativa nos centros a través de programas educativos que desenvolvan as competencias clave como eixe do currículo e os elementos transversais, nos cales se inclúe a educación en valores.

En concreto, os programas aprobados son Educación Patrimonial e Escola Verde. No primeiro deles, baixo a Modalidade "Mirando polo Camiño", o alumnado (dende 1º da ESO a 1º de Bacharelato) pescudará sobre o patrimonio e os bens comúns do Camiño portugués desde o punto de vista antropolóxico, histórico, arqueolóxico, arquitectónico, xeográfico e lingüístico. Hai que de salientar que nesta modalidade só se admite un único centro en toda Galicia para cada un dos Camiños de Santiago e que, ademais, se enmarca dentro do desenvolvemento do Proxecto Interdisciplinar de Centro "Miña Casiña, meu lar".

No segundo dos programas, Escola Verde, foron seleccionados 10 centros escolares de todo o país, e pretende mellorar o comportamento ambiental do alumnado e o profesorado de todo o centro. Está coordinado polo Departamento de Bioloxía.

Máis fotografías na Galería de Imaxes de "Viagem a Lisboa"

Fin de semana longa e intensa a que viviron en Lisboa Cecilia, Talía, Alejandro, Lucas, Xiana, Laura, Judith, Yulema, Marta, Pablo, Paula, Rolando e os profesores Orlando e Román. Entre o 31 de outubro e o 3 de novembro este grupo de alumnos e alumnas de 2º de Bacharelato gozou da máis ca merecida viaxe prometida no curso anterior cando gañaron o 1º premio do concurso ComunicaTedu co traballo Pepa e Moncho, unha historia de amor romántico.

A Cidade da Luz recibiunos cun tempo máis chuvioso e frío do habitual, o que non foi impedimento para partillar a descuberta dos mil e un recantos da "menina e moça". Dende a primeira aventura no comboio en Valença (que non saiban as autoridades, o segredo fica entre nós) até o paseo polo Castelo e a Mouraria da última mañá, a convivencia e os risos cómplices acompañáronnos durante toda a nosa estadía: nos atestados autocarros aos que subimos coa nosa esaxerada equipaxe; no fermoso hostel Selina Secret Garden do Beco do Carrasco en que nos aloxamos; no Mosteiro dos Jerónimos e en Belém ao pé do río Texo; nos "pequenos-almoços" de cada mañá e nos "jantares" da noite; nos cafés e kebabs onde matamos a lareca e o frío; nas carreiras do "Elétrico 28" polas estreitas ruelas adoquinadas e encostadas da cidade buliciosa; nos xogos e curiosidades do MAAT; na fantasía romántica de Sintra; no ambiente vangardista do XL Factory; nos longos paseos polas animadas rúas, prazas, miradouros, elevadores e parques da Baixa, O Chiado, o Bairro Alto, a Madragoa, a Estrela e o Intendente, sempre á espreita da multiculturalidade lisboeta e das curiosidades e das músicas e actuacións dos artistas de rúa; no descanso na fermosa Alfama co fado ao fondo; no Oceanário, no teleférico e na moderna arquitectura do Parque das Nações... e comprobando o poder da nosa lingua como chave que nos abre ao mundo.

Xa temos saudades de Lisboa!

Para ver máis imaxes do acto, accede ao Álbum de Imaxes.

Con esta advertencia pechou o noso alumnado a Semana polo Clima que se desenvolveu no IES de Soutomaior para sumármonos á Folga Global polo Clima, convocada para que os gobernos declaren, de maneira inmediata, a emerxencia climática e para que tomen as medidas concretas necesarias para reducir rapidamente a cero as emisións netas de gases de efecto invernadoiro.

O alumnado e o profesorado, vestidos de verde para a ocasión, participaron un acto simbólico durante o recreo, que consistiu na escenificación da morte do planeta, nun minuto de silencio e na lectura dun manifesto. Nel, o alumnado destacou o seu papel “en defensa do futuro, dun planeta vivo e dun mundo xusto”, reinvindicouse como “unha xeración que non quere sentirse impotente” ante este estado de emerxencia climática e que esixe “unha nova cultura económica orientada ao ben común, una nova cultura da auga, da enerxía, agroalimentaria, da mobilidade, da saúde, da ordenación do territorio e as cidades, da igualdade e dos dereitos”.

Este paro simbólico culminou unha semana de actividades de sensibilización ambiental sobre o cambio climático (video-fórum, lectura de textos e debates, elaboración de carteis e pancartas reinvindicativos, etc.), organizadas polo Departamento de Bioloxía, que inaugurou hoxe a exposición O noso mundo, o noso futuro, a nosa opción, cedida polo Centro de Extensión Universitaria e Divulgación Ambiental de Galicia e que consta de 19 paneis que pretenden contribuír ao coñecemento do fenómeno do cambio climático, as súas causas e as respostas que se están propoñendo para facerlle fronte.

PRENSA

"O IES de Soutomaior súmase á folga global polo cambio climático", Faro de Vigo (28-09-2019).