Blogue de admin

O centro acolleu onte, mércores 15 de decembro, dúas charlas formativas que achegaron o alumnado ao noso medio, tanto ao medio natural como ás nosas formas de vida tradicionais.

Por unha banda, o alumnado de Ciencias da Terra e do Medio Ambiente (2º BACH) e de Ciencias Aplicadas á Actividade Profesional (4º ESO) asistiu á charla "Experiencias co pH no solo" dentro do Programa Revitaliza, que impulsa a Deputación de Pontevedra. Nela, destacouse a importancia da compostaxe dende un punto de vista estratéxico para a reciclaxe de residuos orgánicos, e das propiedades e aplicacións do compost como enmenda orgánica para solos agrícolas e para restauración de solos degradados a causa dos incendios forestais. Ademais, mostrouse a importancia do pH do solo na dispoñibilidade de nutrientes para as plantas, e caracterizáronse dun xeito sinxelo e práctico un solo alcalino e un solo ácido.

Por outra banda, o alumnado de 4º ESO participou na segunda (a 1ª realizouse o venres 3) das charlas do programa Relevo 2. A mocidade Abordo, promovidas polos GALP (Grupos de Acción Local do sector Pesqueiro). Nestas sesións achegámonos ao sector pesqueiro (pesca, marisqueo, acuicultura) dende o punto de vista laboral, é dicir, das diferentes posibilidades a nivel laboral que ofrece (mariscador, pescador, persoal administrativo, capitán de barco, mentemento de instalacións, persoal investigador...). Así mesmo, deuse a coñecer o abano de posibilidades formativas que hai en Galicia enfocado a estas profesións, dende ciclos de grao medio e superior ata graos universitarios.

Estas actividades foron organizadas polo Departamento de Bioloxía e Xeoloxía en colaboración con outros seminarios.

Se estás interesado/a en participar nesta iniciativa da Biblioteca e o EDLG do IES de Soutomaior para o Curso 2021-2022, gustaríanos coñecer cales son as túas motivacións para forma parte do clube, cal  é a túa experiencia lectora en galego, que tipo de lecturas che gustan e che gustaría facer, con que dispoñibilidade horaria contas, etc.

Se tes uns minutos, agradecemos que cubras a nosa enquisa en liña. A información recollida nesta enquisa será tratada con confidencialidade polo profesorado da Biblioteca do IES e só para este fin.

Neste 25N, o Comando Igualdade do IES de Soutomaior achegou a problemática da violencia machista ao centro mediante unha intervención interactiva chamada "Aulas violetas".

Na aula violenta 1, mentres un corazón violeta feito con leds latexaba na parede, nun audio -co latexo do corazón de fondo- porporcionábanse datos estatísticos sobre a violencia de xénero e escoitábanse testemuñas de vítimas. 

Na aula violeta 2, empregando luz negra, o alumnado e o profesorado do IES participou activamente buscando a información agochada nas paredes e achegando un "desexo de cambio" para a sociedade.

Pola súa banda, durante as últimas semanas, o alumnado de Plástica (4º ESO) e de Debuxo Artístico (1º BACH) realizou diferentes intervencións artísticas en varios espazos do centro con motivo desta data reinvindicativa e de denuncia.

Máis imaxes nesta galería fotográfica.

O pasado 16 de novembro puidemos volver gozar dunha das celebracións máis tradicionais do calendario festivo galego, o Magosto, que voltou ao noso centro dous anos despois coas castañas asadas, os xogos populares, a música popular e mesmo algún baile. Este ano contamos cun pasarrúas no que participaron Rebeca, Raúl, Noelia, Elisa e Marta. Ghaiteir@s!

Aínda que fose por un tempo moi limitado, e sempre cumprindo co protocolo COVID, o obxectivo era poder voltar a partillar dun momento de convivencia máis alá das aulas e os recreos, que boa falta fai.

Coma sempre, temos que agradecer a colaboración de Nati, a nosa castañeira, e de Luís, que nos achegou o tren-asador das castañas e tamén botou unha man no asado e reparto de castañas. Sen eles, e sen as familias que achegaron as castañas, non sería posible recuperar o magosto.

Moitas grazas!

Publicada a convocatoria para a distribución de máscaras (Orde do 28 de outubro de 2021 - Código ED330E).

Instrucións básicas: acceso ao resumo da convocatoria premendo aquí.

Prazo de presentación das solicitudes: do 15 de novembro ao 26 de novembro de 2021 (ambos inclusive).

Alumnado beneficiario:

- Alumnado que fose beneficiario da axuda para adquirir material escolar (50€) neste curso 2021-22.

- Alumnado que non fose beneficiario da axuda por diferentes circunstancias, pero:

• Pertenza a familias cunha renda per cápita igual ou inferior 6.000€.
• Estea matriculado en Educación Especial, ou suxeito a tutela ou garda da Xunta de Galicia ou teña unha discapacidade igual o superior ao 65%, con independencia da renda da unidade familiar.

Procedemento:

- O alumnado beneficiario do punto 1 non ten que presentar solicitude.

- O alumnado recollido no punto 2 debe presentar a seguinte documentación do procedemento ED330E na secretaría do centro.

Documentación:

- As persoas interesadas deberán achegar coa solicitude (Anexo I) a seguinte documentación:

• Anexo II (comprobación de datos dos membros computables da unidade familiar).
• Copia do libro de familia ou documento equivalente, onde figuren o/a alumno/a e os demais membros computables da unidade familiar.
  
• No caso de separación ou divorcio, ademais deberase achegar a sentenza xudicial e/ou convenio regulador onde conste a atribución da custodia do/a menor.
• Excepcionalmente, poderase acreditar o número de membros computables utilizando algún dos seguintes medios: Certificado de volante de convivencia e Informe dos servizos sociais ou do órgano equivalente do concello onde resida a familia.