Hoxe tivemos no centro a presentación do libro MARXES: GUÍA ILUSTRADA DO VIGO REBELDE, cos seus autores: David Rodríguez (autor da fotografías e das ilustracións) e Xurxo Martínez (autor dos textos). Ambos nos presentaron as corenta historias que conforman o libro, e que percorren a historia marxinal da cidade desde as revoltas irmandiñas até as manifestacións do 15M, pasando por varias folgas obreiras, entre as que podemos destacar a das traballadoras de Álvarez (en 1946!), reclamendo os alimentos da cartilla de abastecemento que lles foran negados. E entre as biografías de persoeiros/as singulares podemos destacar a do topógrafo anarquista que lle dá nome ao noso instituto: Don Ricardo Mella. Se queredes ler máis destas historias marxinais podedes coller o libro na biblioteca. Ou escoitar aquí abaixo a entrevista que lle fixemos aos autores ao rematar a charla:

Comeza a semana cultural e xa vai collendo forma o noso mural das culturas... Moitas grazas a todo o alumnado participante. E grazas tamén polas exposicións e degustacións que nos estades ofrecendo nas aulas. Encántannos as vosas comidas, as vosas músicas, as vosas danzas, as vosas linguas... Viva a multiculturalidade!!! 

Velaquí a programación da SEMANA DAS CULTURAS que preparamos entre o Equipo de Dinamización, de Igualdade, os Clubs de Lectura, a Emisora de Radio, Vicedirección, e diversos departamentos. Con ela queremos pór en valor a multiculturalidade do IES Ricardo Mella. Entre os países que conforman a nosa diversidade lingüística e cultural están Venezuela, Colombia, Brasil, Perú, Nixeria, Rumanía, Portugal... E unha ampla representación da cultura xitana. De todas elas aprenderemos ao longo da semana. 

Desde a cultura galega achegaremos unha obra dunha das nosas festas máis xenuínas: un maio e unhas coplas, que adornarán a entrada do centro ao final da semana.

Estas actividades contan, entre outros, co patrocinio da Secretaría Xeral de Política Lingüística da Xunta de Galicia.  

NEE BARROS visitou o noso centro para falarnos de literatura, de música, de transexualidade, de escrita adolescente e de Identidade, o seu primeiro e celebrado libro. 

Con el charlamos no Salón de Actos e tamén na emisora de Radio, onde Marta Ocampo e Santiago Expósito, de 1º de Bacharelato H, lle fixeron a entrevista que podedes escoitar aquí abaixo.