Eventos
Lucía Fernández, enfermeira exalumna do instituto, xunto con Javier Viaño, compañeiro de profesión, viñeron hoxe ao centro a impartir unhas charlas sobre os perigos do alcohol e do tabaco para o alumnado de 1º da ESO.
No marco dunha unidade de inglés sobre comida, os estudantes de 3º A PDC participaron nun pequeno "Morning Snack" na cafetería do centro. Trouxeron preparados da casa diversos snacks doces e salgados para degustar. Ademais, representaron pequenos diálogos no papel de camareiros/as e clientes.
Un xeito diferente e delicioso de comezar a mañá.
Parabéns ao alumnado pola súa implicación e entusiasmo nesta actividade!
Nove alumnos e alumnas do noso IES participaron hoxe no Campionato Provincial de Orientación. Para algunhas delas, foi a primeira experiencia deste tipo e están desexando aprender máis sobre esta práctica deportiva.
Xa se pode consultar no centro a listaxe de alumnado admitido para o curso 2024/2025.
O Centro de Formación e Recursos (CFR) da Coruña ofreceunos a posibilidade de participar, xunto con outros 11 centros de secundaria da provincia, nunha mobilidade a Helsinki (Finlandia). A docente Ana Ruiz, en representación do noso IES, visitou tres centros educativos. Foi unha intensa e moi enriquecedora visita de tres días na que puidemos intercambiar experiencias co profesorado finlandés, observar distintas clases e falar tamén co alumnado.
Unha esopía é un relato, comentario ou poema, cun máximo de 140 caracteres, onde cada palabra leva un número de letras igual ás sucesivas cifras do número π.
Lucas González Díaz, de 2º da ESO B, foi o gañador do concurso deste ano, organizado pola biblioteca escolar. Esta foi a súa obra:
Ahí o allá, o ¿dónde dirigirás mi camino? Andar con deseo. Deseando conseguir anhelos, esperanza. ¿Hay un fin? ¿Superaré todo cuando yo llegue allá?
Parabéns polo traballo e polo premio!
Outra maneira de achegarse á realidade...
«Cuando vives aquí, te olvidas de que solo porque has dejado de hundirte no significa que no estés ya bajo el agua», lemos no relato de Amy Hempel.
Esa é a cita que escolleu Ismael Ramos como antesala da súa na primeira obra narrativa: A parte fácil.
A outra suxestión de lectura: unha escolla de poemas de Lixeiro (Xerais, Vigo, 2021).
ENCONTRO CON ISMAEL RAMOS
A conversa con Ismael flúe sen pausas, ou, mellor dito, sen perdas de tempo. Contra o reloxo.
Queremos falar, desde o entusiasmo, sobre A parte fácil (Xerais, 2023) / La parte fácil (las afueras, 2023), a súa primeira colección de relatos.
Entre as virtudes de A parte fácil, a inequívoca planificación do libro como un todo (personaxes que, sendo secundarios nunha historia, reclaman os focos na que lles corresponde protagonizar), un abano temático que evita as reiteracións, unha consideración do relato como un lenzo renacentista e a execución poemática do texto, que leva a Ismael a dispor cada unha das súas partes de modo milimétrico no conxunto.
Non hai en A parte fácil personaxes planos.
As historias secundarias que, nunha primeira lectura, parecen obeceder a intención do autor de crear un Macguffin, resultan ser, no remate do conto, non un prescindible instrumento de distracción, senón a xema coa que, o Ismael Ramos orfebre, pecha o engarce da xoia, xa sexa unha cazola cun guiso de lebre ou un inesperado corte pelo.
Esa querencia de Ismael Ramos polo detalle explica a complexidade das historias, que obrigan ao lector a reposicionarse cando contempla a escena no seu conxunto. En Unha trampa para coellos un inxenuo lector, na primeira parte do relato, asiste, incrédulo, ás diversas reaccións de tres fillos ante o falecemento da súa nai. O que semellaba ser unha sátira sobre o desafecto e a ocultación da morte na sociedad contemporánea, remata sendo unha moi lúcida diagnose sobre os terribles efectos da emigración nas relacións parteno-filiais.
O cactus, o bote de melocotóns en almíbar ou a grabación da boda na que aparecemos levando as arras á nosa madriña, testemuñan unha evidencia: «el futuro es un tigre».
A algúns xa lles ten mordido.
A outros, aos que seguen a preguntar quen apañou a botella de tequila, axiña lles morderá.
E si, xa antes das 21 horas tiñamos admitido que Amy Hempel leva razón: parar de afundirse non significa non seguir baixo a auga.
Francisco Rodríguez Coloma [Texto]
&
Ana Tomé [Fotografías]
Os días 2 e 3 de maio, celebráronse no noso IES, como vén sendo habitual dende hai case unha década, os Encontros con maiores de Afundación coa temática da Emigración. Nesta segunda volta, o alumnado de 3º da ESO puxo en común cos catro voluntarios participantes os seus pequenos traballos, froito da investigación na súa contorna sobre esta temática.
A actividade foi un éxito e moi ben valorada tanto polo alumnado como polos voluntarios participantes.
Esperamos seguir realizándoa en vindeiros cursos!
O alumnado de 3º da ESO participa na segunda parte da actividade de Afundación de Abanca: charlas con maiores sobre a inmigración.
As pernas da nai como o mellor atril onde pousar o libro que queremos ler...
Entre as suxestións de lectura para esta semana uns poemas de Paul Auster, e os relatos de Lucia Berlin e Luisa Castro.
O alumnado de E1 asistíu a unha actividade de Normalización sobre Luísa Villalta da man de Polo Correo do Vento, organizada polo concello de Betanzos e o Equipo de Dinamización Lingüística.
Hoxe foi a última sesión do Club de Lectura en francés con alumnado de E4 e B1. Léronse tres obras: Voyage en Auto-Stop, Train de nuit e On a volé Mona Lisa.
O club, ademais, servíu para preparar o DELF B1 dos estudantes de bacharelato.
Grazas pola vosa participación e entusiasmo!
Interesantes charlas sobre nutrición a cargo de Saúl Sánchez para o alumnado de 4º da ESO, que estiveron moi atentos e consultaron dúbidas alimenticias.
Xa temos rematado o novo recuncho na Biblio: o Xardín dos Libros, un espazo con propostas para ler nun ambiente de calma coma a que nos ofrece a natureza. Achégate e goza desta novidade na Biblio!
Moitas grazas a X. M. Reybao polo magnífico mural pintado que fai que o recuncho sexa aínda máis bonito.
O alumnado de E1 participa na Carreira Solidaria por Betanzos organizada polo CEIP Vales Villamarín.
O alumnado de 3 ESO de Proxecto competencial, desfrutou dunha fermosa mañán no Pazo de Mariñán. Nos seus xardíns, os estudantes foron ilustrados polo profesor David que contou interesantes curiosidades sobre o buxo, os teixos, as maceiras, eucaliptos, camelios, abeleiras, e outras moitas frondosas. O seu ameno discurso fixo a xornada memorable. Grazas a David polas súas explicacións e ao alumnado pola súa atención.
Agradeceriamos saber dicir quen é o autor da ilustración do Museo de Pontevedra.
É perfecta para explicar cal é o pracer que obtén o lector dos poemas de Música reservada!
O club de ciencias organizou unha excursión á central eléctrica de Goimil, onde aprenderon que as centrais dese tipo desvían o río, en troques de facer encoro, o que a fai moito máis sostible porque derivan o cauce e devólveno ao río.
O alumnado de E3E gozou dun paseo polo Betanzos dos séculos XIX e XX. Esperemos que aprenderan a relacionar o urbanismo e a arquitectura desta época coa estética e a historia da música. Canto menos amosaron interese e bo humor!
O pasado 15 de maio celebrouse no IES Francisco Aguiar o I Trofeo Escolar de Xadrez "Letras Galegas" no que participaron os 3 institutos de Betanzos quedando 1. IES Francisco Aguiar 2. IES As Mariñas 3. CPR Plurilingüe Nosa Señora do Carme
Noraboa a tod@s os participantes! E moitas grazas pola súa colaboración aos Equipos de Dinamización Lingüística, Excmo. Concello de Betanzos, Gadisa e Xaquedrum.
Visita á Domus do alumnado de Anatomía, Bioloxía, Cultura Científica e Antropoloxía.
Para festexar o Día das Letras Galegas, organizáronse bailes e música tradicionais galegos no salón de actos no que participaron tanto alumnado coma profesorado.
Co gallo do Día das Letras Galegas, o alumnado de Proxecto Competencial de 1º ESO D/E plasmou algúns dos refráns e ditos populares relacionados co tempo que foron recollidos na Fase I de "Refráns Meteorolóxicos" de Meteoscolas. Toda a comunidade educativa participou ao longo do curso aportando refráns dos seus lugares, primando a zona de Betanzos e das Mariñas. Mestúranse así aportacións do alumnado de todos os niveis con algúns do profesorado, de administración e de conserxería. Proximamente, procederase á Fase II de gravación dos mesmos na Radio do instituto por parte do alumnado e dos familiares que se queiran achegar a gravar.
O alumnado de E1 puido gozar da visita da escritoria Andrea Maceiras.
