Escoitar, Aprender e Compartir

O ALUMNADO DA ESO E BACHARELATO ACHEGOUSE ATA A PISTA DE XEO DE SAMIL PARA PRACTICAR ESTE DIVERTIDO DEPORTE.

HOUBO ALGUNHA CAÍDA, ALGÚN QUE OUTRO TROPEZO, PERO MOITA DIVERSIÓN!

Hoxe rematou a SEMANA DA CIENCIA EN GALEGO organizada polo Equipo de Dinamización da Lingua Galega e os departamentos da área de Ciencias (Física e Química, Matemáticas, Tecnoloxía, Bioloxía e Xeoloxía e Sanitaria) do IES de Chapela co obxectivo de mostrarlle á sociedade a variedade e riqueza da investigación científica que se realiza empregando a nosa lingua. 
 
Ao longo da semana tiveron lugar 4 conferencias: 

• "Chocolate, WiFi e buratos negros" de Felipe Gómez Cuba (UVIGO) para o alumnado de 3º ESO
• “Reconstruíndo biomoléculas ancestrais considerando a xenética evolutiva” de Miguel Arenas Busto (UVIGO) para alumnado de Bacharelato e CM de Farmacia.
• “Como funciona un Dron?” de Felipe Gil-Castiñeira (UVIGO) para alumnado de 1º e 2º de ESO.
• “Matemáticas de moitas revolucións” de Carlos Mosquera Nartallo (UVIGO) para alumnado de 4º ESO.

 
Ademais, o venres 15 desenvolveuse a Feira Científica NON É MAXIA ... É CIENCIA. Nesta actividade 57 alumnas e alumnos voluntarios de diferentes cursos explicaron experiencias científicas con resultados sorprendentes relacionadas coa Física, a Química, as Matemáticas, a Tecnoloxía, a Bioloxía ou a área sanitaria. A feira estivo dirixida a todo o profesorado e alumnado do centro. Ademais, alumnado de 6º do CEIP Igrexa, CEIP Laredo e CEIP Alexandre Bóveda visitou a Feira Científica ao longo da mañá.

Pica na imaxe para acceder á galería de fotos.

Dentro do Proxecto Meteoescolas 23/24 o alumnado de 1º APSD estudou a relación entre a meteoroloxía propia do outono e as emocións. O resultado mostrouno a través desta árbore de emocións exposta no corredor do 1º andar do centro. Grazas polo interesante traballo realizado.

O Equipo de Dinamización da Lingua Galega e os departamentos da área de Ciencias (Física e Química, Matemáticas, Tecnoloxía, Bioloxía e Xeoloxía, e Sanitaria) do IES de Chapela propoñen unha semana chea de actividades para mostrarlle á nosa comunidade educativa diversas investigacións e resultados científicos que deixarán claro o papel da Ciencia como motor de avance da nosa sociedade. Ciencia feita e explicada na nosa lingua, que é válida como calquera outra para o traballo científico.

A Federación de ANPAS de Redondela presenta o seu vídeo SE QUERES SER CORRESPONSABLE, COLLE A VASOIRA E VARRE, levado a cabo por un bo elenco de artistas dos centros educativos de Redondela. Podedes ver o vídeo aquí.

O concello de Redondela organiza esta charla o próximo venres 1 de decembro ás 19:00 horas no multiúsos da Xunqueira.

O IES de Chapela obtivo a mención de honra nos Premios de Boas Prácticas de Educación Inclusiva 2023 da Consellería de Educación que se outorgaron o pasado 28 de novembro no Congreso Internacional de Inclusión Educativa celebrado en Santiago de Compostela. Outros sete centro educativos galegos foron tamén premiados entre a categoría A (destinada a educación infantil e primaria) e a categoría B (destinada a ESO, Bacharelato, FP, formación de persoas adultas e ensinanzas de réxime especial).

A iniciativa premiada no IES de Chapela é o proxecto “Xanela”, un proxecto de teatro inclusivo e comunitario desenvolvido no curso 2022/2023 e baseado nunha metodoloxía de aprendizaxe-servizo. Nel participaron máis de corenta persoas de tres entidades: alumnado e profesorado do IES de Chapela (concretamente, dos ciclos de FP de Atención a persoas en situación de dependencia, Integración social e Educación infantil do réxime de persoas adultas), persoas usuarias e profesionais da Asociación Xaruma para a inclusión de persoas con diagnósticos de saúde mental, e alumnado e profesorado da Escola Superior de Arte Dramática de Galicia (ESADg). Baixo a dirección de Roi Vidal, o proxecto culminou coa estrea o pasado 2 de xuño da obra “Disparos de luz” no multiúsos de Chapela, obtendo unha moi boa acollida por parte do público. Con este galardón, a Consellería de Educación recoñece agora o valor deste proxecto na construción dun contorno educativo inclusivo para acadar unha sociedade máis respectuosa e máis democrática.

O mércores 29 de novembro haberá unha unidade móbil de doazón de sangue diante do instituto de 10:00 a 14:30 horas. Se es maior de idade, pesas máis de 50 kg e reúnes os requisitos para doar, cun pequeno xesto de 10 minutos podes contribuír a salvar a vida doutras persoas. Convidamos a participar na campaña ao profesorado, ao persoal non docente e ao alumnado maior de idade que o desexen.

Un ano máis, o IES de Chapela, en colaboración co equipo de igualdade “Brigada Violeta”, alza a súa voz para manifestar o seu rexeitamento ante calquera manifestación de violencia de xénero, dende as formas máis sutís como o humor sexista e o control, pasando por outras máis explícitas como a chantaxe emocional ou a humillación, ata escalar ata o máis alto como son as ameazas e o asasinato. Unha violencia que nos últimos anos viuse incrementada na adolescencia, con especial impacto das novas tecnoloxías e redes sociais. Baixo o lema “BÁIXATE DO MACHISMO”, este 25N seguimos a rexeitar e denunciar a violencia machista e asumimos o noso compromiso de coeducar en prol dunha sociedade feminista e xusta, onde a mocidade se vincule afectivamente con respecto e en relacións igualitarias. Ata que non cese a violencia contra mulleres, polo simple feito de selo, seguiremos berrando alto: NON ÁS VIOLENCIAS MACHISTAS!

Pincha aquí para ver o vídeo coa acción realizada pola mañá (da que se fixo eco o Faro de Vigo nesta nova) e aquí para ver o vídeo coa acción realizada pola tarde.