O pasado venres 3 de febreiro o alumnado de 4º da ESO visitou o observatorio astronómico de Cotobade. Guiados polos membros da Asociación Astronómica Sirio, puideron admirar espectaculares imaxes da Lúa como nunca antes a viran. Tamén descubriron a Venus, Marte e Xúpiter en todo o seu esplendor. Aprenderon a distinguir algunhas das constelacións que adornan o ceo nocturno e a orientarse segundo a posición da Estrela Polar. Grazas á pericia dos guías e aos medios técnicos empregados (punteiros láser sinalando as estrelas, prismáticos e telescopios de excelente calidade, cúpula orientable...) era moi fácil localizar os obxectos máis interesantes e entender as explicacións. Foi emocionante ver as famosas estrelas expostas na Rede no seu lugar no ceo, tan preto de nós...as xigantes Aldevarán e Pollux; a impresionante xigante vermella Betelgeuse, de cor alaranxada; e a tamén xigante Rigel, pero azul neste caso. O observatorio astronómico construíuse grazas a unha subvención da Xunta de Galicia e mantense polas aportacións dos visitantes que, coma nós, reservan cita para asistir a este impresionante espectáculo. Mil grazas aos membros de Sirio pola súa dedicación.
