Sísamo

XA ESTÁ AQUÍ O SAMAÍN!!

A entrada da nosa escola está fermosísima; decorada con esmero polos traballos das familias que alí acoden.

É que, ao longo desta semana, fomos recibindo na escola de Sísamo as cabazas do Samaín. Foron traballos moi inxeniosos e laboriosos e, coma sempre, a participación foi alta. Destacamos a ilusión das nenas e nenos ao ver expostos os seus traballos e, ao contarlle ás amigas e amigos, como as fixeran, quen lles axudaran, que utilizaran, cal lles gustaba máis...

O noso agradecemento ás familias pola súa colaboración na realización desta actividade.

O pasado 20 de xuño celebramos, na escola de Sísamo, os aniversarios das nenas e nenos que cumpriron anos ao longo do trimestre e daquelas e daqueles que o farán no verán. Foi unha xornada moi divertida e festiva, porque ademais coincidía coa festa de fin de curso.

Aquí vos deixamos un resumo do momento da celebración.

Desde esta semana, no noso patio acompáñanos un novo amigo: un acivro.

É unha árbore que medraba en soidade, nunha maceta, nun lugar afastado de Sísamo. Ese espazo no que vivía quedáballe pequeno e as follas douradas choraban por un amplo lugar no que crecer feliz.

E a escola de Sísamo pareceulle un lugar ideal.

Nun alto, resgardado do vento, ollando a vida do patio e da escola...

Agardamos que teña unha longa vida entre nós!!