NOVAS

Ao longo destes meses puidemos observar como aos bulbos, en contacto coa auga, lles saíron as raíces, as follas e finalmente unhas olorosas e chamativas flores.

Aquí tedes unha imaxe dos xacintos florecidos.

Agardamos polos demais que non tardarán en saír.

MÚSICA E PINCEIS

Dom, 10/02/2019 - 11:45 — teresa

MÚSICA, PENSAMENTO E PINTURA

O venres dedicamos o remate da xornada a traballar as habilidades do pensamento de Mathew Lipman dentro dos traballos da Filosofía para Nenos (FPN). Tratábase dunha tarefa moi difícil, porque debíamos traducir a música que estábamos a escoitar nunha obra plástica. Se isto xa era de por si complicado, debíamolo facer en silencio e sen valoración cuantitativa nin cualitativa do traballo propio e alleo. Só se tiña un vaso de pintura cunha soa cor que se podía intercambiar cunha compañeira ou compañeiro cando se indicase. As consignas estaban claras.

O resultado foi mellor do esperado.

Aquí vos deixo un pequeno resumo do traballo.

HORTO ECOLÓXICO

Dom, 10/02/2019 - 11:03 — teresa

Esta semana traballamos no horto retomando o traballo pendente da sesión anterior. Rematamos de delimitar os bancais e os corredores desde os que imos traballar. Antes de comezar, atendemos ás explicacións de Manuel Anxo, que nos lembrou o que tiñamos feito e o que nos tocaba facer esa xornada.

Despois de ter delimitado os tres bancais, tocou mover a terra. Primeiro comprobamos en que bancal estaba máis enxoita e descubrimos que en poucos metros de extensión de terra hai variación de humidade: unha parte do terreo estaba máis húmida que a outra. Por iso, somentes, traballamos a terra de dous bancais, agardando que, para a seguinte xornada de horto, secase a do outro bancal.

Cando rematamos de preparar os bancais, dirixímonos ao horto de aromáticas dentro do patio da escola. Nel, antes das vacacións de Nadal, plantamos bulbos de tulipán e fomos comprobar se nacera algún. Para a nosa sorpresa, brotábanlle as follas a case todos.

OS VOLCÁNS

Ven, 08/02/2019 - 17:00 — teresa

OS VOLCÁNS

O pasado venres 1 de febreiro, as nenas e nenos de Educación Infantil preparamos unha pequena exposición e experimento sobre os volcáns.

Recollendo información sobre as montañas, descubrimos que algunhas podían ser volcáns e que, do interior da Terra, expulsaban magma ao exterior que se convertía en lava, acompañado todo con fume e lume.

Aprendemos as partes interiores dun volcán, a profesión de vulcanólogo...

Esta información quixémola compartir coas compañeiras e compañeiros de Educación Primaria.

Para iso elaboramos un mural do volcán e tamén, unha pequena maqueta do mesmo, que estaba a piques de erupcionar.

Esta é unha vista rápida do que foi a actividade.

A aula de primaria agasallounos cun rico postre para a merenda.

XOGOS CO PARACAÍDAS

Mar, 05/02/2019 - 18:08 — AnaFernandez

A semana pasada nas clases de educación física xogamos co paracaídas. O luns fixemos xogos cooperativos todos xuntos (olas do mar, buceamos, gato e rato, unha cabaña, as cores,...) e o mércores ao entrar no ximnasio atoparon dous paracaídas con pelotas de cores, así que estiveron investigando, experimentando, creando,... diferentes xogos e actividades eles mesmos. O pasaron moi, moi ben como podedes ver nas fotos.