Articles

O PODER DA LUZ

Dom, 2023-12-03 14:02 — salial

Novembro Mes da Ciencia nas Bibliotecas

O alumnado de 6º participa na Misión Alba, un proxecto científico con 4 etapas nas que hai que ir resolvendo retos.

Visualiza as 10 diapositivas onde se mostran os diferentes experimentos realizados coa luz:

O poder da Luz. Misión Alba de salial

A SEDA E OS SEDEIROS DE GALICIA

Ven, 2023-05-19 20:09 — salial

Clase de historia e ciencias - A seda, orixe, historia e fabricación.

Pepe Vieito achegouse ao cole a falarnos da seda. Comezou cun breve percorrido pola historia da seda, a ruta da seda, a chegada da seda á península, do gremio da sedaría en Monforte, do ciclo vital dos vermes e da fibra que se obtén.

Contounos que a industria da seda foi introducida en Galicia, polos monxes beneditinos na Ribeira Sacra no s. XIV e que os condes de Lemos impulsaron esta arte de luxo.

Dos vermes de seda tamén aprendemos moitas cousas, a súa vida curiosa e breve, a súa fame voraz e selectiva (só follas de moreira), a obtención da seda...

Algo que nos sorprendeu a todas/os foi saber que os vermes xa non son quen de sobrevivir en liberdade, ao levar tantos séculos sendo alimentados e coidados, esqueceron o seu instinto de supervivencia.

Para saber máis lede este artigo de Pepe publicado na Revista Raigame núm XVIII "O cultivo da seda en Galicia"

"Garavanciño come saniño"

Ven, 2023-05-12 15:27 — cris

O xoves 4 e 11 de maio tocoulles ás rapazas e rapaces de 1º, 2º e 3º de Primaria recibir a visita da nutricionista do Centro de Saúde para realizar a actividade "Garavanciño come saniño".

Tratouse dunha charla e obradoiro de xogos didácticos nos que traballaron a pirámide dos alimentos e a dieta equilibrada.

Toca na imaxe para acceder á galería.

PREPARANDO O HORTO

Sáb, 2023-04-01 10:46 — cris

Antes de marchar de vacacións as rapazas e rapaces do cole estiveron poñendo a punto o noso pequeno horto. Á volta comezaremos a plantar nos aros libres.

Recordamos que as clases reanudaranse o MARTES DÍA 11 DE ABRIL.

DÍA DA ÁRBORE

Lun, 2023-03-27 08:59 — cris

As alumnas e alumnos de 3º de Primaria recibiron a visita dos Axentes Medioambientais cos que charlaron sobre o coidado do noso planeta, a prevención e extinción de incendios, plantaron unha árbore e manipularon o seu coche.

Moitas grazas pola visita

Esperámosvos o próximo curso!!!

"Comendo cores"

Lun, 2023-02-27 10:52 — cris

O xoves e venres as rapazas e rapaces de 4º, 5º e 6º de Primaria recibiron a visita da nutricionista do Centro de Saúde para realizar a actividade "Comendo cores".

Tratouse dunha charla e obradoiro de xogos didácticos nos que traballaron a pirámide dos alimentos e a dieta equilibrada.

PLANTANDO ÁRBORES CON PINCEIS

Xov, 2023-02-09 16:07 — cris

Onte as nenas e nenos de Primaria participaron na actividade "Plantando árbores con pinceis". Trátase dun proxecto escolar pola sostenbilidade que une cultura e coidado do medioambiente a través da realización de un Mural Artístico, colaborativo e ecolóxico con pinturas fotocatalíticas anticontaminación, que absorben o CO2 do ambiente. Unha iniciativa que ten como obxectivo transmittir a mensaxe positiva sobre o coidado do entorno.

Previamente o alumnado de 4º, 5º e 6º elaborou as súas propostas para pintar o muro seguindo a temática. A partir desas ideas o artista fixo o seu boceto que plasmou na parede do patio ca axuda das nenas e nenos.

Por outra banda o alumnado de 1º,2º e 3º tamén reflectiu a súa idea en bolsas de tea reutilizables que levaron para casa.

Actividade de Afundación

Novembro, mes da ciencia

Sáb, 2022-12-03 20:36 — salial

O "Recuncho científico" creado na biblioteca ofrece unha selección de libros con experimentos, contos sobre ciencia, xogos de enxeño, preguntas e respostas curiosas. Algúns dos experimentos realizados transpasaron a porta das aulas e compartíronse con outras clases.

Estas son unha mostra dalgunhas actividades científicas realizadas neste mes:

- Actividades científicas coa luz, a cor, o son, os sensores de ultrasóns e no laboratorio.

- Que pasa cando metemos uvas pasas en gaseosa?

- Que pasa cando metemos un ovo ou un óso de polo en vinagre?

- Globo explosivo (Con ácido de laranxa).

- Lámpada de lava (Con auga, aceite e pastillas efervescentes).

- Microscopio para buscar números (Recipiente transparente, plantilla de números e un vaso de cristal).

- Area cinética - Area da lúa (Fariña, aceite de bebé e purpurina).

Le máis no Blog da biblioteca A sombra do érbedo

Engadir novo comentario.
227 lecturas

A COCIÑA TEN QUÍMICA

Ven, 2022-06-17 15:53 — salial

A cociña é todo un laboratorio de ciencias e matemáticas

Estudamos substancias, a súa orixe, propiedades, as mesturas homoxéneas e heteroxéneas, cambios físicos e químicos. Tamén medimos cantidades e cambiamos as proporcións da receita... A actividade rematou coa degustación do produto final ;-)

MasterChef da cociña de 6º EP