Complementarias e extraescolares

 O venres, 24 de febreiro, celebrouse o Entroido no noso centro. Así, das 10 ás 11 h os nenos/as e algúns mestres/as foron vestíndose, agardaron a quenda para que os/as maquillasen os seus titores/as e os/as profesores/as especialistase despois saíron en comparsas polas principais rúas da vila.

Ao longo do percorrido atopábanse: familiares e amizades do alumnado do centro. Pero, ademais, estaban outros/as veciños de Outes... e traballadores/as de distintos negocios e do Concello, que se ían asomando segundo pasabamos e que gozaron dos vistosos disfraces que locían, principalmente, os nenos e nenas. Nesta ocasión, versaron sobre : "Mitos e lendas", posto que este é o proxecto que se está levando a cabo no centro, desde o 4º nivel de E.Infantil ao 6º de E. Primaria.

Xa, pola tarde, houbo xogo libre entre o alumnado dos diferentes niveis con música de fondo, á vez que se degustaron orellas, tan típicas nesta época do ano, acompañadas de zumes e auga (e outros doces para aqueles alumnos/as que non podían tomalas por razóns de saúde).

Onte, sábado, 18 de febreiro tivo lugar en Cabío (Pobra do Caramiñal) a Fase Provincial de Campo a través. Por tal razón, a iso das 9:15h estabamos na contorna do noso colexio: Sabela (categoría benxamín feminina), Manel, Brais, Iván, Adrián, Pedro e Ignacio (categoría benxamín masculina), Hugo, Eloy, Clau, Marcos, Sergio e Rubén (categoría alevín masculina), Carla e Susana (profe responsable e profe e adestradora respectivamente) e un nutrido grupo de familiares dos corredores/a esperando a chegada do autobús para saír cara ao lugar da competición.

Unha vez en Cabío, recolléronse os dorsais, fíixose un recoñecemento do circuito, quentaron a corredora e os corredores e, pouco despois, terían lugar as distintas carreiras de competición...

Por suposto, o nivel, unha vez máis chegada esta fase, foi moi elevado. A pesares disto, tanto a nena como os nenos acadaron postos bastante bos, aínda que sen tratarse nesta ocasión dos primeiros, segundos postos... aos que uns máis que outros/a estaban afeitos...

Logo, pasado un tempo no que os responsables das probas continuaron co seu traballo, namentras nós: conversabamos, picoteabamos algo, sacabamos fotos... os resultados foron saindo e para nós FANTÁSTICOS, posto que lle arrebatamos o 3º posto, nas dúas categorías nas que competimos, a numerosos clubs de renome e prestixio (tras moitos anos de vida e traballo) e, por suposto, tamén a outros centros educativos...  

Nesta ocasión, os corredores comprobaron, mellor que en ningunha outra, como o esforzo en grupo conleva recompensas tamén individuais, pois o trofeo é para o equipo, pero cadaquén leva o seu metal, desta vez o bronce. 

Unha vez máis, NORABOA CAMPEOA E CAMPIÓNS!!!

E... moitísimas grazas aos familiares e amizades que, novamente, nos apoiaron en canto foi preciso e contribuiron, coa súa presenza, a que a espera polos listados cos resultados resultase máis grata.

O mércores, 21 de decembro, celebrouse no cole o remate do primeiro trimestre e a chegada do Nadal.

Nas derradeiras semanas fóranse facendo: debuxos para o concurso interno, no que elixir as gañadoras coas que logo elaborar os almanaques en colaboración co C.E.I.P Emilio de Navasqüés e co I.E.S Poeta Añón, adornáranse aulas e corredores, ensaiáranse panxoliñas... e agora tocaba ver unha obra musical trilingüe titulada: "A fada Diana no bosque musical" a cargo da Compañía teatral: "The fairy Storyteller productions" para porlle fin ao trimestre. Pero, ademais como ven sendo xa tradición desde hai anos, despois do teatro tocaba degustar o chocolate con biscoito... e recibir a visita de Papá Noel para logo iniciar as ansiadas vacacións.

Por certo, riquíííííísimosssss tanto o chocolate como o biscoito !!!.

Bo Nadal e Feliz 2017 a toda a nosa Comunidade educativa e, como non, ao resto do universo.

Durante a mañán do 28 de outubro celebramos o Samaín/Halloween cun percorrido, por quendas, polos corredores para ver as cabazas e as portas adornadas para a ocasión. Pero, ademais realizáronse xogos típicos da cultura estadounidense nesta data, propostos polas profes de Inglés e a auxiliar de conversa.

Logo, pola tarde, os rapaces e rapazas elixiron libremente participar en xogos populares e tradicionais como: as trécolas, o brilé, a mariola, a corda, a aña ... ou ben conversar con distintos amigos/as antes de degustar as castañas asadas tan propias do día no que se celebraba o Magosto, acompañadas de zume.

Resultou un día agradable... Para o ano máááááis!!!

O xoves, 1 de decembro, a iso das 10:15h 66 nenos/as (dos 72 inscritos/as) e 4 profesores/as saímos cara o Estadio municipal de San Lázaro (Noia) para participar na Fase de toma de contacto coa da modalidade de Campo a través en Idade escolar (Xogade).

Do noso centro participou un bo número de alumnos/as, desde o 2º ao 6º nivel de E. Primaria, nas categorías: Benxamín, Alevín e Infantil, tanto feminina como masculina.

Os corredores/as de todos os centros e clubs inscritos da bisbarra superaban as 1.000 persoas. Pero, aínda así, os resultados foron moi bos e regresamos ao centro cos metais acadados ao lograr posicións tan envexables como son: a primeira (Manel e Hugo C.), a segunda (Sabela F.), a terceira (Laura C.), a quinta (Brais L.),  a oitava (Alejandro R.) e a novena ( Natasha).

Coma noutras ocasións, acompañáronnos: pais, nais, avós, avoas, amizades... dándolles ánimos aos corredores/as e prestando a súa axuda a quen a precisou.

Moitas grazas a todos/as.

Contamos con vós o vindeiro 19 de decembro no Campamento Virxe do Loreto (Porto do Son), onde se levará a cabo a segunda xornada de competición, a Fase Comarcal.