Abraiados lemos a nova do pasamento de Darío Xohán Cabana, e pensamos que os lectores galegos quedamos orfos sen esta gran persoa e escritor inesquecible.

Eu non podo declararme menos que namorado do seu "Galván en Saor", un libro marabillosamente escrito onde canda a modernidade convive en máxica harmonía o celme dos libros de cabaleiría, o ciclo artúrico herdeiro do Merlín mindoniense.

E que dicir do "libro dos moradores", de "Cándido Branco e o Cabaleiro negro", ou "as aventuras de Breogán Folgueira", e como non da súa impresionante tradución da Divina Comedia.

O ano pasado tivemos aquí no Barco un grupo de traballo sobre ilustración que traballou sobre os contos do libro dos moradores, e na reunión final, onde mostramos os nosos traballos acudiu Darío para ver os deseños inspirados na súa obra. Coma sempre as súas intervencións foron esclarecedoras sen por iso esquecer o  humor.

A nosa biblioteca, que tivo a sorte de que nos visitara en 3 ocasións, non ha parar de chorar a súa perda.

Deica sempre, Darío.

Coma todos os anos quixemos celebrar a festa do Samaín. Como as restricións non nos permiten facer nin o túnel do terror, nin outras actividades que viñamos facendo, este venres tivemos sesións de cine terrorífico, unha escape room para @╔s chic@s de terceiro ciclo, un photo call terrorífico no patio cuberto, e participamos tod@s nunha dobraxe de beizos (lipdub) que, gardando as medidas de seguridade con separacións entre grupos burbulla, nos lembraron aquelas actividades nas que participabamos todo o colexio, e que ben seguro máis cedo que tarde voltaremos facer.

Se a isto lle sumamos o programa de radio que fixemos nesta semana sobre o Samaín, estamos seguros de que o temos moi ben celebrado.

Grazas ao noso benquerido Michel pola cabeceira que nos fixo para este vídeo.

Aquí vos deixamos o noso programa sobre o Samaín. Tedes un traballo sobre a orixe desta festa e da tradición dos calacús.

Tamén se contan tres historias que de seguro que vos fan tremer!!!!!

Que o desfrutedes!

Aquí tedes un enlace a un titorial sobre o uso do apartado titorías dentro da aplicación Abalar.

https://www.edu.xunta.gal/axudaplicacion/files/abalar/ABAWEB_MU_EspazoTi...

Comezamos a nosa andaina neste curso 2021-22 cun programa adicado ao día das Escritoras. Esta data procura facer visible o traballo das mulleres escritoras seguindo unha iniciativa da Biblioteca Nacional de España.

E nós, na Galiza, temos unha chea de escritoras, e cunha calidade asombrosa, velaí que as teñamos presentes neste programa da nosa radio.

Tamén comezamos unha sección chamada "As letras de Florencio" na que ao longo deste curso imos ir debullando anacos da vida de Florencio canda os seus poemas máis sobranceiros.

Desfrutade do noso programa.

Tedes aquí o calendario escolar para o vindeiro curso... ide quentando motores

Hoxe é un día de noraboa para a nosa biblioteca, para o noso centro e a nosa bisbarra e para Galicia Enteira, xa que a Real Academia Galega acordou adicar a festa das nosas letras do vindeiro ano 2022 a Florencio Delgado Gurriarán, o poeta de Córgomo e México, o defensor das nosas libertades, o cantor xeórxico dos bacelos da bocarribeira do Sil...

Estamos felices de ter contribuído na nosa modesta medida a que se lle concedese esta honra ao noso autor.

Dende hai anos, dende que puxemos en marcha a nosa biblioteca e tivemos que lle poñer un nome, eliximos o do noso poeta e hoxe non podemos menos que nos gabar desa decisión.

Haberá, xa que logo que irmos pensando en traballar arreo para ensalzar máis, se couber, ao noso amigo e guieiro, o poeta Florencio Delgado Gurriarán.

Xa se abriu o prazo de presentación de solicitudes para o servizo de comedor para o vindeiro curso escolar 2021-2022.

Podedes recoller a solicitude na secretaría do colexio ou ben descargala dende esta ligazón.

As solicitudes se poderán cubrir e entregar no colexio en horarios de mañán durante o mes de xullo.

@s compañeir@s de 6º realizaron durante este curso un traballo moi interesante creando planillas e xogos para os Escornabots. O último día xogamos con eles para probar que tal fixeran os deseños, e o resultado foi fenomenal.

Aquí imos deixar todos os ficheiros que realizaron (que son moitos) para que vexades que grupos máis traballadores tivemos no colexio.