XVI Encontros con escritores: Pedro Feijoo
Enviado por pedrolado a Mér, 11/12/2019 - 09:48Summary:
Pedro Feijoo (Vigo, 1975). Antes de adicarse á escritura, exerceu profesionalmente como músico, cunha intensa traxectoria como produtor, compositor e membro dalgúns dos máis salientables proxectos musicais galegos como Los Feliz e Lamatumbá. En 1997 publicou o seu primeiro libro, Cousas do «Galicia», por Castelao, no que se explica a relación de Alfonso Daniel Rodríguez Castelao co xornal Galicia que dirixiu Valentín Paz-Andrade. En 2005 publicou Viva o Fu Remol! (Xerais,2005), unha crónica sobre os problemas do panorama musical galego. A súa primeira obra Os fillos do mar (2012, finalista do Premio Xerais en 2011). En 2013 publica A memoria da choiva, novela arredor da figura de Rosalía de Castro. En 2015 cambia de rexistro con Morena, perigosa e románica, a súa novela máis cómica. En 2017 publica Os fillos do lume, na que os mesmos personaxes de Os fillos do mar, se enfrontan a unha das intrigas mellor protexidas na historia da cidade de Vigo: a da súa fundación. En 2018 publica Sen piedade, un libro dolorosamente persoal no que o autor tivo que enfrontarse a algúns dos fantasmas pendentes da súa vida. Tamén en 2018 sae Camiñar o Vigo vello. Un paseo pola historia da cidade, un libro de a cabalo entre os manuais de historia e as guías turísticas.
De moi recente aparición é a súa novela Un lume azul (Xerais, 2019), unha historia de suspense, dura por veces mesmo violenta, pero tamén emotiva e, sobre todo, imprevisible, intensa e apaixonante como son todas as narracións deste autor.
