Tecnoloxía

     Roberto Losada e Sergio Gomez, alumnos de 4 Tecnoloxía e Tecnoloxía Industrial I respectivamente, acadaron dous premios no Concurso de Modelado 3D: COMPOS 3D, organizado polo Concello de Santiago de Compostela en colaboración con Ferrovial e a USC en relación co día Mundial do Medio Ambiente.
     O concurso COMPOS 3D, é un proxecto orientado a promover a capacidade tecnolóxica e artística dos rapaces, incidindo na educación nos valores medioambientais. Este desafío pretendía achegar ós xoves galegos ós novos métodos de modelado 3D emerxentes a partir de fotografías, empregando instrumentos tan familiares como un teléfono móbil, unha tablet ou un ordenador.

    Os alumnos de 4º de ESO da área de Tecnoloxía asistiron este xoves 28 de maio a unha visita ás instalación da factoría Citroën en Vigo.

    Xunto coas súas profesoras Beatriz Méndez e Eva Leira puideron observar, no complexo proceso de producción da moderna factoría, moitos dos aspectos da robótica estudados na aula.

    O venres 10 de abril, os alumnos de 1º de bacharelato xunto cos seus profesores de TIC asistiron no salón da actos do centro a unha charla impartida polo profesor da USC Enrique Macías que levou por título "A rede galáctica: unha historia de internet".

    Nesta charla aprendeunos como naceu, que é, e como funciona Internet, e a que principios científicos responde. Tamén nos explicou como se organiza e financia, como se almacenan e transmiten os seus contidos, e como se analiza e xestiona ese imenso espazo dixital.

    Os alumnos de Tecnoloxía de 4º de ESO e de 1º de Bacharelato, acompañados polas súas profesoras da materia de Tecnoloxía, asistiron o martes 3 de febreiro á Coruña a un interesantísimo obradoiro de robótica.

   Para o desenvolvemento deste obradoiro non era preciso ter coñecementos previos en programación –xa que se realizou nun contorno visual sinxelo para que ata os máis pequenos puideran construír e deseñar os seus robots– nin en electrónica –integrada nun ladrillo intelixente–.

    O encontro fomentou ademais a cooperación e o traballo en equipo, xa que os alumnos integráronse nun grupo no cal tiveron que compartir obxectivos para resolver os desafíos que se lles propuxeron ao longo da actividade.