1º Bacharelato
Correspondentes Xuvenís no Aguiar. Crónica e valoración dunha experiencia.
Comezou o curso 2014-2015 coa visita de María José, traballadora no Espazo Xove de Betanzos. Propoñía iniciar un proxecto de información xuvenil colaborando ambas institucións: Espazo Xove e IES Francisco Aguiar. O resultado foi o inicio dun proxecto de creación dunha "antena informativa" que se acolleu ao Plan Proxecta baixo o título: INFORMA-TE
Eran moitas as razóns que xustificaban a necesidade dunha antena informativa no IES Francisco Aguiar:
-
O xove para participar necesita coñecer os seus dereitos, as posibilidades que a sociedade lle ofrece, os recursos que ten para elo, etc.
-
O xove atópase nunha etapa de formación personal na que ten que tomar un gran número de decisións fundamentais
-
O emprego axeitado do seu tempo libre pode ser moi importante para o seu enriquecimento e desenvolvemento persoal.
-
Hai moitos proxectos e programas europeos nos que a mocidade pode participar. Neste sentido, a información é un factor clave para a igualdade de oportunidades.
A axuda do espazo Xove de Betanzos e os seus traballadores xunto coa activa e entusiasta participación dun grupo de catro alumnas de 1º de Bacharelato (Julia, Mar, Penélope, Eva) foi decisivo no desenvolvemento deste proxecto. Neste senso era fundamental facilitar as canles de comunicación entre o Espazo Xove, e os diversos participantes do IES Francisco Aguiar.
Ao remate dista experiencia quedou cumplido o dito obxectivo de crear no IES Francisco Aguiar unha canle de información que trasladase ao alumnado toda aquela oferta informativa que poidese ser de interese.
Igualmente consideramos axeitadamente cumplidos os obxectivos específicos: que se referían achegar a información de xuventude.net aos compañeiros a traves das redes sociais e dos dous taboleiros instalados en senllos edificios do IES e procurar manter actualizada a información
Quedou en cambio para convocatorias posteriores a instalación dunha pantalla informativa na entrada do IES. E sobre todo, traballar máis na dirección inversa á iniciada este ano: porque, se ben foi un curso intenso en canto ao tráfico de información dende as institucións ao alumnado, fica por completar este circuito facendo que as correspondentes poidan facer de canle para que as iniciativas e propostas do alumnado cheguen á Oficina de Información Xuvenil e ao Espazo Xove de Betanzos.
Iniciamos as actividades cunha reunión informativa para poñer en marcha a antena informativa. Nela participaron:Borja Rubio Somoza, dinamizador da Rede Galega de Dinamizadores Xuvenís, dependentes da Dirección Xeral de Xuventude e Voluntariado da Consellería de Traballo e Benestar, quen axudou a orientar o proxecto e trazar liñas claves do mesmo, a traballadora do espazo Xove de Betanzos, as catro alumnas de 1º de Bacharelato que actuaron como correspondentes este curso, o Director do noso IES e os xefes dos departamentos de Orientación e de Actividades Complementarias e Extraescolares. Na susodita reunión o informador xuvenil informou sobre o que significa a antena xuvenil, as súas funcións e funcionamento e ofertou apoio continuado na tarefa
A acción principal do noso proxecto centrouse en dar información sobre temas de interese para a xuventude, eventos, ocio, deportes... e servir de nexo de unión entre a xuventude e o/a informador/a xuvenil para captar as necesidades e programar actividades en función delas.
O medio principal para facer chegar esta información foi a instalación de dous taboleiros de anuncios nos dous edificios de ESO e BAC do noso IES. Conforme pasou o tempo esta acción completouse cunha presenza nas redes que se materializou en senllas contas de facebook e twitter.
- twitter: @espazoxovebetanzos
- Facebook: https://www.facebook.com/espazoxovebetanzos?fref=ts
A información xuvenil dos taboleiros de anuncios e das redes sociais, nútrese da página: http://xuventude.xunta.es/ e, máis concretamente de: http://xuventude.xunta.es/boletin-semanal.html
Tamén, as correspondentes recibían semanalmente dende o Espazo Xove a información de canto lles poidese interesar pola súa idade, proveniente do Concello de Betanzos.
Unha das acción que acadou maior repercusión foi a organización dunha xornada lúdico-formativa coincidente co último día do primeiro trimestre. Nela o equipo de correspondentes, profesorado e técnica de información xuvenil fixo unha oferta de lecer ao alumnado que foi moi ben valorada pola poboación escolar. Nela incluíanse obradoiros de DJ, grafitti, skate e zumba. (http://www.edu.xunta.gal/centros/iesfranciscoaguiar/node/1455)
En colaboración co Espazo Xove o equipo de correspondentes colaborou coa recollida solidaria de tapóns de plástico. Iniciativa ista que se mantivo, con notable éxito durante todo o curso escolar instalando en ambos edificios un punto de recollida.
Outra das accións importantes que se desenvolveron foi a realización dunha serie de charlas dirixidas a alumnos e alumnas de todos os grupos de 3º e 4º da ESO para informar de actividades organizadas pola susodita Direccción Xeral cun claro compoñente de educación non formal destinadas á xuventude no ámbito do ocio, do tempo libre, e a formación. Tiveron lugar o martes 3 de marzo e participaron nelas a responsable do Espazo Xoven de Betanzos ( Mª José), un técnico da Dirección Xeral de Xuventude e Voluntariado (dependente da Consellería de Traballo e Benestar), coa presenza de Cecilia Vázquez Suárez da mesma Consellería.
Igualmente recibíuse a visita no centro, do Director Xeral de Xuventude e Voluntariado da Consellería de Traballo e Benestar.
Para o desenvolvemento deste traballo contouse principalmente non tanto con grandes medios materiais como con persoas entregadas ao proxecto: A técnica de información xuvenil do espazo Xove de Betanzos, as catro alumnas responsables da antena de información xuvenil, que se amosaron en todo momento moi dinámicas e con interese de estar informadas e transmitir a información, os Xefes dos Departamentos de Orientación e de Actividades Complementarias e Extraescolares e a activa dinamización do Director do IES. Este grupo reuníuse ao longo do curso cunha periodicidade aproximada dunha vez cada quince días.
A antena xuvenil ocupou un espazo visible no primeiro andar de dous edificios do IES, o edificio de BAC e o da ESO. Neles instalouse un taboleiro de anuncios con toda a información de interese, procurando a maior visibilidade e que estivese permanentemente actualizada.
Engadiremos a isto o espazo na rede que supuxo acreación de contas en facebook e twitter
En suma, a posta en marcha da antena informativa resultou unha novidade moi ben acollida polo alumnado, especialmente polo de Bacharelato. Hai que valorar neste senso que se trata dun tramo de idade , en xeral, máís interesado neste tipo de información. A isto engadiremos o feito de que as correspondentes eran alumnas de bacharelato polo que se engadía ao interese da información a vinculación coas transmisoras da mesma.
Foi frecuente ver alumnos e alumnas consultando os taboleiros e máis aínda eran frecuentes as preguntas ás correspondentes relativas a diversas informacións que aparecían nos mesmos. Tamén foi crecendo a consulta nas redes sociais ( facebook, twitter)
Como indicabamos ao inicio destas liñas resta por completar o circuito facendo de canle das propostas do noso alumnado dirixidas cara as organizacións xuvenís. Posiblemente, xunto co mantemento da iniciativa e a súa maior extensión ao alumnado da ESO, iste sexa o principal reto para o vindeiro curso.
Polo de agora, agradecemento e parabéns especiais para Julia, Mar, Penélope e Eva. Agardamos seguir contando convosco!
Correspondentes Xuvenís no Aguiar
Este ano a información de interese xuvenil no noso instituto estivo puntualmente atendida por catro alumnas do Aguiar coa axuda do Espazo Xoven e o Departamento de Orientación.
Julia, Mar, Penélope e Eva son as Correspondentes Xuvenís no IES Francisco Aguiar de Betanzos.
Encárganse de difundir a información xuvenil entres os seus compañeiros e compañeiras a través dos taboleiros de anuncios, en cada un dos edificios do Instituto, e das redes sociais. Tamén dinamizaron a recollida de tapóns solidarios.
Grazas e parabéns polo seu traballo e polo seu inalterable sorriso e disponibilidade
Seis alumnos do Aguiar en Vigo
O 24 de maio, a partir das 11 h., un grupo de seis alumnos acompañados polo profesor Julio Ferreiro participarán, na escola da Enxeñeiros Industriais en Vigo, na Iª Competición de Robots. Agradecemos, xa dende agora, a amabilidade do Instituto Ferrol Vello que accedeu a que a viaxe dos nosos alumnos se realizase no autobús que eles mesmos utilizarán para desprazarse ata o evento.
O obxectivo fundamental deste concurso é amosar a universidade ós alumnos das Ensinanzas Secundarias e Bacharelato ademáis de promocionar as titulacións da EEI e fomentar o interés dos alumnos polos estudos de Enxeñería.
Os alumnos do Aguiar participan ( como alumnos matriculados durante o curso 2014/2015 no Bacharelato) na categoría WALL-E:
Dunha maneira simple e divertida, partindo dun kit básico que lle proporcionou a organización, os alumnos realizaron a montaxe e programación dun robot móvil que lles permitirá realizar as seguintes probas na mañá do día 24:
- Rastreo (proba individual)
- Persecución en pista (proba colectiva)
Moita sorte e productiva mañá.
Extracción caseira de ADN
Os alumnos/as da materia de ciencias para o Mundo Contemporáneo de 1º BAC ensínan como extraer o ADN dun xeito caseiro. Esta demostración formou parte da IV Semana da Ciencia e da Tecnoloxía.
Noraboa a alumnado e profesorado por tan bo traballo
Percorrendo o Camiño Inglés. Etapa2: Pontedeume-Betanzos. VIDEO CRÓNICA
Seguindo unha suxestión da profesora Carmén Núñez (Pitusa) poñemos como música de fondo do noso vídeo, música de grupos de Betanzos, con betanceiros ou con ex do IES Francisco Aguiar.
Desta volta pon a música "Say My Name" (Andrea de Artaza (voz), Dani Vaamonde (guitarra), Jorge Salgado (Guitarra), Tomás Loroño (Bajo) e a ex alumna do IES Francisco Aguiar, Valeria Rubal (Batería)
Deixámos aquí o enlace ao seu canal de youtube (veredes que paga a pena darse unha volta por el)
As Pontes. Visita Didáctica.
Organizada polos departamentos de Física e Química e Tecnoloxía, o mércores 18 de marzo terá lugar unha visita didáctica ás instalacións de ENDESA en As Pontes.
Participará nesta saída un grupo de 37 alumnos e alumnas de 1º e 2º curso de BAC que cursan as materias de Física e Tecnoloxía Industrial. Estarán acompañados pola profesora de física M. Luisa Muiño, e polo profesor de Tecnoloxía Juan M. Neira.
Andaina polo Camiño Inglés. 17 de marzo.
Reanúdanse as camiñatas polo Camiño de Santiago co alumnado de Bacharelato.
Nesta ocasión case 50 alumnos e alumnas de 1º e 2º percorrerán un dos tramos do Camiño inglés acompañados polos profesores Luis Gorrochategui, Pancho Sánchez e Carlos Castellanos.
Sairán de Pontedeume coa mañanciña. "Recolleremos os restos" ao remate das clases da tarde no IES Francisco Aguiar.
¡BOA ANDAINA!
24 de febreiro. Yincana para celebrar o Día de Rosalía
Ao abrir o buscador de internet esta mañá, tropezamos coa sorpresa de que na cabecera de Google (o doodle) conmemórase o 24 de febreiro, Día de Rosalía, cunha imaxe que ( por suposto incorporando a marca do buscador ) recorda a Rosalía e algún dos seus versos máis coñecidos.
O IES Francisco Aguiar coa animación do Equipo de Normalización e Dinamización Lingüística i en colaboración co Departamento de Normalización do Concello de Betanzos , organiza unha actividade para conmemorar este día.
Trátase dunha "yincana" literaria (con esta grafía está recomendada pola RAE, non a recolle a RAG) consistente nun conxunto de probas de destreza, inxenio e coñecemento sobre esta insigne escritora.
As dinámicas probas tiveron lugar no Polideportivo do Instituto nas dúas primeiras horas da mañá, e participaron nelas os grupos A e B de 1º BAC.
12.II. Charla de Orientación académica para alumnado de 1º BAC
Dentro do labor que o Departamento de Orientación que dirixe Amparo Mejuto cada ano ofrécese ao alumnado de 1º de bacharelato unha charla para guiarse no curso de 2º.
O xoves 12 de febreiro a 6ª hora terá lugar dita charla no Salón de Actos á que asistirán todos os alumnos e alumnas de 1º BAC. Nela recibirán información relativa aos estudos de 2º BAC e a selectividade.
Tamén coa participación do profesor do Ciclo Superior de Xestión Comercial e Mercadotecnia, Victoriano Rodríguez, coñecerán as alternativas de estudo relacionadas coa Formación Profesional.
- « primeira
- ‹ anterior
- …
- 19
- 20
- 21
- 22
- 23
- 24
- 25
- 26
- 27
- …
- seguinte ›
- última »
![RSS - 1º Bacharelato Distribuir contido](/centros/iesfranciscoaguiar/misc/feed.png)