Inicio

Bibliotecas escolares

Formación de usuarios básica (pero esencial)


Vídeo sobre a CDU realizado pola biblioteca do IES A Xunqueira II, de Pontevedra, e empregado nas primeiras sesións de formación de usuarios.

Blogues das bibliotecas escolares galegas

 

As bibliotecas escolares galegas foron pioneiras na creación de blogues como instrumento para saír ao mundo e para incorporar recursos electrónicos diversos á colección, entendida como o conxunto de materiais disponibilizados para a comunidade educativa. Desde as primeiras bitácoras (creadas arredor do 2005) ata o momento, foron moitos os cambios experimentados polas bibliotecas, cambios que ás veces se poden seguir a través destas fiestras que as comunican co exterior. Tras unha actualización nesta páxina, pódense consultar con maior facilidade as bitácoras dun bo feixe de bibliotecas nas ligazóns seguintes, ás que se irán incorporando aquelas das que vaiamos tendo noticia: 

 

"Nuevas dinámicas para la biblioteca escolar en la sociedad red"

 

A Consejería de Educación, Cultura y Deporte da Junta de Andalucía, publica un novo número da serie BECREA: Nuevas dinámicas para la Biblioteca Escolar en la sociedad red.

As transformacións que se están a producir na actual sociedade da información provocan cambios profundos na escola e as bibliotecas escolares deben estar atentas a adaptarse e acompañar estes cambios, pois é esta a única forma de cumplir a súa función de apoio aos procesos de ensinanza e aprendizaxe que se viven no centro. Aínda máis, as bibliotecas poden ser os instrumentos que as comunidades educativas poden empregar para avanzar na adaptación dos espazos, as metodoloxías e as actividades a novas formas educativas, máis acordes coas necesidades do alumnado actual. E así o veñen demostrando moitos centros que están xa deseñando e traballando en clave de presente e de futuro: ampliando espazos, diversificando funcións, modificando o concepto de colección coa incorporación dos recursos electrónicos, liderando propostas que facilitan a aprendizaxe baseada en proxectos, facilitando a lectura individual pero tamén a lectura compartida, a lectura social, incorporando a toda a comunidade educativa nas súas actuacións.

Esta nova achega desde Andalucía, baixo a dirección de José García Guerrero, incide nos cambios necesarios que a biblioteca debe abordar e facilita unha excelente selección de recursos para poder levar a cabo estas transformacións. Sen dúbida, unha ferramenta que será moi útil para todo o profesorado implicado no desenvolvemento das bibliotecas dos centros. 

 

Nova sección de Bibliotecas Escolares na revista EDUGA

 
 
A revista dixital EDUGA, da Consellería de Cultura, Educación e Ordenación Universitaria, fai público o seu número semetral correspondente a decembro de 2013, con novas seccións e un bo feixe de artigos de interese. Inclúese unha nova sección de Bibliotecas escolares, coordinada pola Asesoría de bibliotecas escolares, que consta de tres apartados: Biblioteca Escolar, Boas prácticas e Hora de ler.
Este número acolle, entre outras prácticas de excelencia, varias experiencias relacionadas coas ciencias: proxectos e dinámicas de bibliotecas escolares arredor dos contidos científicos, como expresión dun enfoque integrador que se propón como esencial para o funcionamento da biblioteca escolar nos centros de ensino.

Felices escoitas!

Felices Escoitas from Linguaxe Musical on Vimeo.

 

Este vídeo que nos remiten desde a biblioteca do CMUS Profesional de Vigo invitanos a entrar e paseármonos pola biblioteca, coa escusa do Nadal. É un bo exemplo dunha biblioteca que adapta o modelo xeral de biblioteca/centro de recursos de lectura, información e aprendizaxe ao contexto dun centro especializado nunhas determinadas ensinanzas, como é neste caso, as musicais. Visitar o blogue desta biblioteca é tamén unha forma de coñecer a súa actividade: http://biblioconservigo.blogspot.com.es/

A biblioteca escolar ofrece e ofrécese: "Atopa o teu libro"


As bibliotecas escolares, ademais de coidar a selección de materiais e recursos postos a disposición do alumnado, deben difundir estes materiais, facelos visibles, "chamar" a usalos. Velaquí un exemplo, en formato electrónico, desde o CEIP Víctor Sáenz, de Mazaricos (A Coruña), que aúna formación de usuarios e chamada reclamo para o uso da biblioteca escolar e das súas fontes informativas e de lecer. 

Actividades arredor do Día da biblioteca 2013

Nesta semana entre o 21 e o 25 de outubro sucedéronse as actividades destinadas a salientar o papel da biblioteca escolar no centro. Foron moitas as bibliotecas que prepararon un programa especial para dar a coñecer a toda a comunidade educativa os recursos e os servizos que ofrecen, e avanzar así no aproveitamento das oportunidades da biblioteca escolar. Velaquí algúns exemplos: 

Boas prácticas en bibliotecas escolares: outubro, mes da biblioteca escolar - 8

IES Sanchez Cantón (Pontevedra) from Bibliotecas Escolares de Galicia on Vimeo.

A biblioteca do IES Sánchez Cantón, de Pontevedra, leva tempo traballando en colaboración co Departamento TIC do centro, nunha simbiose de obxectivos que favorece de forma significativa os resultados das distintas iniciativas. A incorporación das tecnoloxías da información e da comunicación, as posibilidades da web 2.0 e, máis recentemente, a inclusión da tecnoloxía móvil ao servizo da aprendizaxe son retos aos que tratan de dar resposta con múltiples propostas desde a biblioteca escolar. Unha destas iniciativas é a que nos explican neste vídeo: "A biblioteca escolar e as competencias dixitais"

Boas prácticas en bibliotecas escolares: outubro, mes da biblioteca escolar - 7

IES Alexandre Bóveda (Vigo, Pontevedra) from Bibliotecas Escolares de Galicia on Vimeo.

As bibliotecas escolares veñen liderando a incorporación dos proxectos de carácter interdisciplinar para o tratamento de contidos curriculares de diversas áreas ou materias de aprendizaxe, a partir dun determinado tópico ou centro de interese. Desde o IES Alexandre Bóveda, de Vigo, explícanos neste vídeo un exemplo destas prácticas que favorecen a toma de contacto con metodoloxías máis activas e unha aprendizaxe máis acorde coas necesidades que xorden nesta sociedade da información.

Boas prácticas en bibliotecas escolares: outubro mes da biblioteca - 6

CEIP Milladoiro (Malpica, A Coruña) from Bibliotecas Escolares de Galicia on Vimeo.

Traballar para que o alumnado acade competencia informacional, adquira habilidades no uso e na produción de materiais informativos, saiba consultar fontes informativas diversas (máis aló do libro de texto) e constrúa o seu coñecemento, co uso de instrumentos de distinto tipo, incluídos os dixitais, e mediante traballos colaborativos, é tarefa complexa e de longo percorrido. Sábeno ben no CEIP  Milladoiro, de Malpica que levan tempo programando actividades para a adquisición da competencia informacional a través de distintas propostas da biblioteca escolar. A través deste vídeo podemos asistir a situacións de aprendizaxe que van orientadas a adquirir esta e outras competencias.

Boas prácticas de bibliotecas escolares: outubro, mes da biblioteca escolar - 5

CEP Xosé María Brea Segade (Taragoña-Rianxo, A Coruña) from Bibliotecas Escolares de Galicia on Vimeo.

"O día a día dunha biblioteca escolar" permítenos coñecer algúnhas das actividades máis exitosas da biblioteca do CEP Xosé María BRea Segade (Tragaoña, Rianxo), na voz de profesorado, alumnado e membros da comunidade educativa.

Boas prácticas en bibliotecas escolares: outubro, mes da biblioteca escolar - 4

IES de Poio (Poio, Pontevedra) from Bibliotecas Escolares de Galicia on Vimeo.

A biblioteca do IES de Poio realiza múltiples actividades destinadas a mellorar a competencia lectora e o índice nos hábitos de lectura do seu alumnado. Os diversos grupos do club de lectura participan á súa vez, en sendos programas europeos e de colaboración intercentros, posibilitando así o contacto do alumnado con outras culturas e outras realidades, sempre coa lectura e os libros como mediación. Explícano moi ben neste vídeo: "A biblioteca escolar forma lectoras e lectores".

Boas prácticas en bibliotecas escolares: outubro, mes da biblioteca escolar - 3

EEI Barrionovo (Arteixo, A Coruña) from Bibliotecas Escolares de Galicia on Vimeo.

A Escola de Educación Infantil de Barrionovo (Arteixo) é un espazo de aprendizaxe global, onde as tecnoloxías da información e a comunicación son instrumentos cotiás para un alumnado que traballa por proxectos e aprende con fontes informativas orais, escritas, audiovisuais, electrónicas... Neste vídeo podemos ver a través do seu proxecto "A prehistoria, menuda historia", como se desenvolve a actividade ao longo do curso.

Las bibliotecas escolares en España. Dinámicas 2005-2011

A Fundación Germán Sánchez Ruipérez, en colaboración co Ministerio de Educación, Cultura y Deporte, veñen de facer público o resultado do estudo LAS BIBLIOTECAS ESCOLARES EN ESPAÑA. Dinámicas 2005-2011, do que xa avanzara algúns resultados Luis González, director xeral adxunto da FGSR, nas IV Xornadas de Bibliotecas Esolares de Galicia (novembro 2012). 

Entre outras conclusións do estudo podemos ler que as bibliotecas están máis profesionalizadas, contan cun plan de traballo que se avalía periodicamente e teñen un tratamento técnico normalizado, pero é preciso profundizar na función da biblioteca como o centro para a aprendizaxe das competencias. 

ACCESO Á VERSIÓN COMPLETA DO ESTUDO -- ACCESO AO RESUME

Este estudo vén completar a estatísca sobre as bibliotecas escolares realizada polo Ministerio de Educación, no curso2010-2011 e que se fixera pública en decembro de 2012. 

Bibliotecas Escolares de Galicia

A Consellería de Cultura, Educación e Ordenación Universitaria, no contexto das actuacións do PLAN LÍA de bibliotecas escolares (Lectura, Información e Aprendizaxe), publica cada ano uns carteis divulgativos que pretenden facer visible as distintas posibilidades da biblioteca escolar como apoio ao desenvolvemento do currículo e como instrumento fundamental para a formación das persoas lectoras. 

O lema elixido para este curso 2013/2014, LER CIENCIA NA BIBLIOTECA ESCOLAR,trata de sensibilizar sobre a importancia da lectura de textos de carácter científico, de textos divulgativos ou de textos literarios que tratan temas relacionados coa ciencia. Todos estes contidos teñen cabidana biblioteca e enriquecen a bagaxe lectora do alumnado. A ilustración é de PATRICIA CASTELAO. 

+ información 

Ler ciencia na biblioteca escolar

En breve chegará aos centros o cartel que a Consellería de Cultura, Educación e Ordenación Universitaria edita todo os anos para conmemorar o Día da Biblioteca (24 de outubro) e participar da celebración do mes da biblioteca escolar que propón a IASL (Internatioanl Association of School Librarianship). A biblioteca escolar é unha biblioteca específica e así se recolle na actual Lei de bibliotecas de Galicia, no seu artigo 31. Polos seus obxectivos, polos serivzos que presta á comunidade educativa, polo seu funcionamento, a biblioteca escolar, concebida como un centro de recursos de lectura, información e aprendizaxe, xenera contextos educativos fértiles para a adquisición de competencias clave para o alumnado que medra na sociedade da información e contribúe á adquisición de todas as competencias básicas do currículo. 

O lema elixido para este ano, LER CIENCIA NA BIBLIOTECA ESCOLAR, trata de sensibilizar sobre a importancia da lectura de textos de carácter científico, de textos divulgativos ou de textos literarios que tratan temas relacionados coa ciencia. Todos estes contidos teñen cabida na biblioteca e enriquecen a bagaxe lectora do alumnado. A ilustración é de PATRICIA CASTELAO.

Por outra parte, a incorporación do profesorado dos departamentos de ciencias aos equipos de biblioteca, diversifica as posibilidades de intervención da mesma e favorece o deseño de actividades plurais en contidos e imprescindibles para o desenvolvemento de todas as competencias básicas.

A biblioteca ten na ciencia unha fonte riquísima para realizar propostas de carácter interdisciplinar, que debe aproveitarse para que este tipo de actividades vaia callando en todo o profesorado e facilite realmente o desenvolvemento do currículo en todas as áreas e materias. É unha oportunidade  tamén para avanzar nas estratexias de comprensión lectora de todo tipo de textos, e moi especialmente, un desafío para mellorar as habilidades de uso, selección e produción de información en todos os soportes, moi especialmente os recursos electrónicos. Aprender a valorar a información que se atopa en internet con criterios de credibilidade, veracidade, cientificidade, etc., é imprescindible para o noso alumnado; identificar, por exemplo, a pseudociencia entre a inxente cantidade de contidos audiovisuais que circulan por internet resulta difícil (ás veces incluso para os adultos), pero só a alfabetización mediática e informacional pode dotalos de recursos para poder facelo. 

Cartel

Resolución definitiva do Plan de mellora de bibliotecas escolares 2013/2014

O DOG do 18 de setembro publica a Orde de 2 de setembro de 2013, pola que se resolve a convocatoria do Plan de mellora de bibliotecas escolares en centros públicos non universitarios de titularidade da Consellería de Cultura, Educación e Ordenación Universitaria, para o curso 2013/2014.

Tralas tres baixas habidas con respecto ao curso anterior e coa incorporación de 23 centros novos, esta Rede de bibliotecas escolares galegas consta dun total de 524 centros.

Todos os centros incluídos neste programa reciben axudas para  renovar os fondos da colección (sexa en formato impreso ou electrónico); á súa vez, os centros que se incorporan nesta convocatoria e os centros da convoCatoria 2012 reciben axudas significativas para mellorar os equipamentos necesarios de cara á ofrecer servizos e realizar actividades propias das funcIóns que lle corresponden á biblioteca escolar: apoiar o desenvolvemento dos currículos en todas as áreas de aprendizaxe, formar lectores competentes, espertar o gusto pola lectura en todos os sectores da comunidade educativa (é dicir, servir de recurso fundamental ao desenvolvemento dos Proxectos Lectores de Centro);  contribuír a adquisición de competencias clave para o alumnado, como son a competencia de aprender a aprender ou a competencia mediática e informacional (lectura crítica das linguaxes dos distintos medios de comunicación actuais, pero tamén o uso e produción de información desde unha perspectiva ética). Todas estas funcións están recollidas no artigo 113 da LOE e na normativa curricular vixente. 

ACCESO DIRECTO AO TEXTO DE RESOLUCIÓN

As bibliotecas escolares na revista EDUGA

 

A revista EDMozas e mozos do IES Ramón Mª Aller Ulloa, na bibliotecaUGA (Revista Galega do Ensino), da Conselleíra de Cultura, Educación e Ordenación Universitaria, recolle no seu último número un bo feixe de experiencias de bibliotecas escolares, espallados polas distintas seccións da revista, nunha selección de actividades coordinada desde a Asesoría de Bibliotecas Escolares, en colaboración cos responsables de EDUGA. En total, 14 fiestras para  asomármonos a unha realidade potente, innovadora, froito de moitos esforzos compartidos, e moita profesionalidade en xogo. Velaquí os enlaces a todos elas: 

Convocatoria do PLAMBE 2013/2014

Bibliotecas Escolares de GaliciaAcaba de saír publicada no DOG de hoxe, 29/05/2013, a ORDE do 16 de maio de 2013 pola que se convoca o Plan de mellora de bibliotecas escolares en centros públicos non universitarios de titularidade da Consellería de Cultura, Educación e Ordenación Universitaria para o curso 2013/2014.

A través desta orde preténdese apoiar a continuidade do Plan de mellora de bibliotecas escolares mediante a concesión de novas contías aos centros educativos incluídos neste programa en anteriores convocatorioas así como seleccionar 20 novos proxectos para a súa incorporación.

O prazo para a presentación remata nun mes polo que o último día válido para presentar as instancias será o sábado 29 de xuño de 2013.

Acceso á convocatoria

Acceso aos ANEXOS (escribir directamente e imprimir)

 

Encontros do Plan de mellora de bibliotecas escolares 2012/2013

Os vindeiros 7 e 8 de marzo terán lugar en Compostela os Encontros do Plan de mellora de bibliotecas escolares, unha actividade de formación organizada conxuntamente polo Servizo de Formación do Profesorado (CAFI) e pola Dirección Xeral de Centros e Recursos Humanos (Asesoría de bibliotecas escolares), da Consellería de Cultura, Educación e Ordenación Universitaria, coa colaboración do Ministerio de Educación, Cultura e Deporte.

Estes encontros responden á vontade da consellería de reunir, unha vez máis, ao profesorado que coordina os equipos de biblioteca dos centros integrados no Plan de mellora de b.e (PLAMBE), un programa que procura, desde o ano 2005, a transformación das bibliotecas escolares en auténticos centros de recursos para a lectura, a información e a aprendizaxe, e no que ten sido decisiva a creación de vínculos profesionais entre os integrantes deste colectivo.  

Ainda que se tratarán aspectos diversos relacionados cos servizos e o papel das bibliotecas escolares nos centros educativos, farase fincapé na función destas bibliotecas como compensadoras de desigualdades sociais, aspecto que cómpre salientar nun momento en que as diferenzas no acceso aos recursos culturais pode medrar. Outro dos aspectos destacados será a alfabetización mediática e informacional, un contido imprescindible para o alumnado que medra na sociedade da información e que ten na biblioteca escolar un aliado natural.

Daranse cita na segunda xornada destes encontros (día 8) un total de 504 responsables de bibliotecas da Rede de bibliotecas escolares galegas. Na primeira xornada (7) só participarán os responsables das 63 bibliotecas que se integraron no programa neste curso 2012/2013.

PROGRAMA -- ENLACE AO ESPAZO MOODLE COS RECURSOS (entrar como convidado)

 

Proxecto-piloto E-LBE, lectores electrónicos nas bibliotecas escolares.

Na mañá de hoxe, 20 de febreiro de 2013, o auditorio da Biblioteca de Galicia, na Cidade da Cultura, acolleu a presentación dun proxecto piloto para a incorporación dos lectores electrónicos nas bibliotecas escolares, E-LBE, integrado no PLAN LÍA de bibliotecas escolares, da Consellería de Cultura, Educación e Ordenación Universitaria. En novembro de 2012, a Dirección Xeral de Centros e Recursos Humanos realizou unha convocatoria destinada aos centros incluídos no Plan de mellora de bibliotecas escolares. Recibíronse un total de 327 solicitudes e procedeuse á selección de 25 centros que cumprían os dous requisitos previstos: compromisto coa biblioteca escolar (manifestado na memoria do curso anterior) e instalación en concellos rurais galegos.  Cunha sesión informativa e a entrega dos lectores electrónicos aos centros seleccionados botou a andar este pequeno proxecto que busca, fundamentalmente, proporcionar ao alumnado novas experiencias de lectura.

Nesta sesión estiveron presentes os responsables das bibliotecas do CEIP Mestre Valverde Mayo, de Mos (Pontevedra) e do IES Lama das Quendas, de Chantada (Lugo), que xa botaran a andar iniciativas de uso de lectores electrónicos nos seus centros, para comentar a súa experiencia e proporcionar, así, información sobre liñas de actuación posibles.

Os centros incluídos neste proxecto E-LBE contarán cun equipamento de 3/4 dispositivos de lectura electrónica que utilizarán en función dos obxectivos do Proxecto Lector de Centro e coa orientación que o equipo de biblioteca crea máis oportuno. A final de ano participarán, mediante un breve formulario, na elaboración dun informe para a valoración desta experiencia.

Achégase un díptico informativo e unha relación máis ampla de recursos electrónicos relacionados coa lectura dixital e o libro electrónico.

PPT Proxecto E-LBE -- PPT CEIP Valverde Mayo (Mos) -- IES Lama das Quendas (Chantada)

+ Informacións: IMIT (Iniciativas de Modernización e Innovación Tecnolóxica) -- Portal Xunta de Galicia

As bibliotecas escolares galegas, bibliotecas de premio!




O luns 10 de decembro tivo lugar en Madrid, na Biblioteca Nacional, o acto de entrega de diplomas acreditativos dos Premios Nacionais de boas prácticas na xestión e dinamización de bibliotecas escolares, correspondente ao ano 2011, e última convocatoria deste premio, ata o momento. Estiveron presentes os representantes dos seis centros galegos galardoados, acompañados do Director Xeral de Centros e Recursos Humanos e o Conselleiro de Cultura, Educación e Ordenación Universitaria.

Modalidade A (centros de ensino infantil, primaria, educ. especial e educ. de adultos):  

Súmanse así, aos 29 centros que obtiveran premio nacional nas convocatorias no período 2003-2010:

2003
IES ANXEL CASAL-MONTE ALTO (A Coruña)
2004
CEIP de Présaras-Vilasantar (A Coruña)
IES Fernando Esquío de Xubia-Neda (A Coruña)
2005
CPI Luis Díaz Moreno, de Baralla (Lugo)
IES Sánchez Cantón, de Pontevedra
IES Terra do Xallas, de Santa Comba (A Coruña)
IES Xulián Magariños, de Negreira (A Coruña)
2006
IES Ramón María Aller Ulloa, de lalín (Pontevedra)
IES Leliadoura, de Ribeira (A Coruña)
2007
CEIP A Ponte, de Lugo.
CEIP San Martiño-Salcedo, Pontevedra
CEIP Milladoiro, de Malpica (A Coruña)
IES Marqués de Suanzes, de Ferrol
2008
IES CARLOS CASARES, Viana do Bolo (Ourense).
IES Afonso X O Sabio, Cambre (A Coruña)
COLEGIO LA SALLE, Santiago de Compostela.
2009
CEIP Frián-Teis, de Vigo (Pontevedra)
CRA Mestre manuel Garcés, de Tomiño (Pontevedra)
CEIP A Pedra, de Bueu (Pontevedra)
IES Sanxenxo (Pontevedra)
IES de Catabois, de Ferrol (A Coruña)
2010
CRA Mestra Clara Torres, de Tui (Pontevedra)
CPI Tino Grandío, de Guntín (Lugo)
CEIP de Cervo, Cervo (Lugo)
CEIP Os Muíños, de Muxía (A Coruña)
CEIP Quintela de Moaña (Pontevedra)
IES de Monterroso, Monterroso (Lugo)
IES de Fene, Fene (A Coruña)
IES Manuel Antonio (actual CIFP) de Vigo (Pontevedra)

Parabéns. novamente, ás comunidades educativas que fan posible, día a día, a presenza de bibliotecas escolares ÚTILES para un ensino eficaz e para a tan necesaria construción dunha sociedade lectora .

Materiais IV Xornadas de Bibliotecas Escolares de Galicia

 

Desde a Aula Virtual do CAFI (Centro Autonómico de Formación e Innovación) pódese acceder xa aos materiais das IV Xornadas de Bibliotecas Escolares de Galicia, celebradas en Santiago de Compostela os pasados 9 e 10 de novembro. Estes materiais completaranse en breve, unha vez editados os vídeos correspondentes ás diferentes sesións, así como o vídeo resume da xornada.  ACCESO aberto (entrar como convidado).

Engadimos desde aquí informacións complementarias e enlaces relacionados coa temática das xornadas, LER PARA VER, relativa á formación para a competencia mediática e informacional, co apoio dos recursos da biblioteca escolar.

 

 

Imaxes das xornadas (C.Novoa)

IV Xornadas de Bibliotecas Escolares de Galicia: LER PARA VER

Os días 9 e 10 de novembro de 2012 terán lugar, en Santiago de Compostela (Palacio de Congresos), as IV XORNADAS DE BIBLIOTECAS ESCOLARES DE GALICIA, cita anual do colectivo de profesores e profesoras comprometidos coa biblioteca escolar e a lectura nos centros públicos galegos. Logo da paréntese de 2011 (ocasionada pola celebración, nas datas acostumadas, do que fora o congreso Bibliotecas Escolares en Tránsito, con carácter estatal), reanúdase unha actividade que, con periodicidade anual, combinando a fórmula xornadas/encontros, vén reunindo a máis de mil docentes en Compostela, preocupados por mellorar a súa formación en todo o relacionado coa lectura na actual sociedade da información, así como as estratexias necesarias para unha axeitada educación neste terreo, pois as bibliotecas escolares son territorios privilexiados para adquirir competencias imprescindibles para moverse polo mundo da información, son centros de recursos de lectura, información e aprendizaxe, fundamentais en colexios e institutos.

O lema destas xornadas, LER PARA VER, recolle a necesidade de educar para unha lectura comprensiva e crítica dos medios de comunicación, dos medios polos que se transmite información na sociedade actual, máis aló de soportes ou xéneros discursivos. No programa contémplanse conferencias plenarias (Fabio Tropea, Tíscar Lara, Luis González) e mesas de experiencias, coa participación de expertos en distintos medios, relacionándoos coa educación (prensa, radio, cómic, videoxogos, arte, audiovisuais, vídeo, cine, animación....) e responsables de bibliotecas escolares con boas prácticas nestes ámbitos.

Está aberto o prazo para a inscrición nesta xornada de formación (12 horas), na aplicación FPROFE, con data límite do 12 de outubro. O código da actividade é G1202009, e atópase aloxada nas actividades do Plan Anual de formación do profesorado 12/13, do CAFI-Santiago. É unha actividade organizada conxuntamente por este organismo, dependente do Servizo de Formación do Profesorado, e pola Asesoría de Bibliotecas Escolares, da Dirección Xeral de Centros e Recursos Humanos.

« primeira‹ anterior…141516171819202122seguinte ›última »