Biblioteca A3P

Compartimos convosco unha presentación con libros e música para desfrutar este verán.  Graciñas aos profes e alumnado que nos fixeron chegar as súas propostas.  Lembrade tamén que podedes levar libros da nosa biblioteca para o verán.  Só tedes que apuntar na libreta que hai xunto ao posto de administración o voso nome e o número de rexistro dos libros ou películas que levedes.

Bo verán para toda a comunidade educativa do David Buján e se é con libros moito mellor.

Dende a biblioteca convidámosvos a participar na segunda edición do concurso fotográfico "O pracer de Ler", co que queremos celebrar o Día do Libro 2022.  Como o curso pasado, en que a obra gañadora foi esta composición de Tomás Andrade Boga, trátase de mandar unha foto artística (ou varias) que recolla a idea da lectura como algo pracenteiro.  As bases do certame están recollidas no PDF que segue.

O domingo 20 e o domingo 27 de marzo celebramos o Día Mundial da Poesía e do Teatro respectivamente

Con tal motivo, as dúas vindeiras semanas desde a biblioteca temos preparadas as seguintes actividades:

-Exposición de poemas seleccionados e ilustrados polo alumnado de 1º de ESO e de book trailers de alumnado de Bacharelato.

-Lectura dramatizada de fragmentos teatrais e poéticos a cargo do alumnado de 3º e 4º de ESO (farase entre o 28 e o 31 de marzo en todas as aulas do centro agás en 2º de Bacharelato, en data e hora que se indicará e sempre que non haxa inconvenientes por parte do profesorado).

-Exposición de fondos bibliográficos de poesía e teatro na mesa do vestíbulo.

-Lecturas e comentarios feitos polos profes que queirades dos vosos poemas e fragmentos teatrais favoritos nas clases que consideredes durante estas dúas semanas.

Os membros do equipo da biblioteca e varios alumnos de 1º de ESO estivemos pensando en libros bos e bonitos que nos poderían traer Papá Noel ou os Reis este Nadal.  O resultado está neste arquivo que vos xuntamos e tamén nas estrelas penduradas da árbore de arriba.

Tamén vos lembramos que podedes levar o que queirades da biblio para ler nestas vacacións (deixando nota se non hai ninguén).

O grupo de biblioteca desexa a toda a comunidade educativa do David Buján unhas Felices Festas, sempre na boa compaña dos libros.

Dende a nosa biblioteca sumámonos á importante data de hoxe, 25 de novembro, e achegamos unha presentación para invitarvos a ler libros que nos axuden a superar esta lacra.  Contra a violencia machista, lectura, educación, imnformación, cultura.