30/06/2018

O pasado 21 de xuño, o alumnado de 2º de ESO pasou o día pola Ría de Vigo (cos profes Ángel, Mar e Montse). Este foi o plan:

• Visita guiada pola Illa de San Simón (e San Antón)
• Ruta en barco pola Ría con paradas para coñecer diversas técnicas de exploración submarina
• Visita guiada aos puntos máis destacados do Museo do Mar
• Descanso na praia de Samil
• Visita á fortaleza do Monte do Castro

Houbo que lamentar a desaparición dalgúns obxectos personais, pero en xeral as opinións sobre a xornada foron moi positivas. Como curiosidade, hai que sinalar que se estaba celebrando un casting de Operación Triunfo cando a nosa expedición chegou ao Museo do Mar.

Ademais do pequeno vídeo que subimos a YouTube (o primeiro de noso canal con resolución 4K, aínda que son imaxes fixas), tamén hai un álbum chamado "Vigo 2018" na nosa Galería (con menor resolución).

Fai clic para ver máis fotos

30/06/2018

O pasado 21 de xuño, un grupo de 4º de ESO achegouse á praia de Pantín, para iniciarse no deporte do surf. A actividade estivo un ano máis organizada por Alawa Surfcamp. Podedes ver algunha foto máis de Sonia Álvarez no álbum Pantín 2018 da nosa Galería.

Fai clic para ampliar a foto

24/06/2018

Parabéns aos nosos alumnos e alumnas de 1º de ESO Bruno, Hugo, Nuria, Xela, Irene, Laura, Tania, Noa, Ariel e Anxo, que foron seleccionados para participar nos campamentos de verán en inglés organizados pola Consellería de Educación. Aproveitade esta oportunidade e xa nos contaredes á volta!!

Fai clic para ver máis fotos

12/06/2018

O pasado 7 de xuño, o alumnado de 1º de ESO, acompañado por tres profesoras, realizou unha visita ao Centro de interpretación de Caldoval (Mugardos).

Esta actividade foi organizada polo Departamento de Xeografía e Historia, como un acercamento á cultura romana, que outorgaba un carácter primordial ao coidado do corpo. O circuíto termal era unha das actividades practicadas con ese fin. O deporte era outro dos alicerces básicos.

O Centro acolle os restos duns baños da época romana, que foron utilizados desde o século I ata a caída do Imperio. Estaban situados á beira do mar (Punta Promontorio) e formaban parte dunha vila a mare.

O alumnado foi dividido en dous grupos para secuenciar a actividade: por un lado, visita guiada ao centro, onde puideron coñecer como era a vida na época romana e visitar as estruturas conservadas do espazo termal. Por outro, os alumnos participaron nun obradoiro de xogos de mesa, e puideron crear en barro as súas propias pezas (variantes do tres en raia).

02/06/2018

O pasado luns 28 de maio tivemos a visita do polifacético Xurxo Souto. O autor da Oda ó futbolín e tantas outras pezas festivas, ofreceu unha intensa charla ao alumnado de 2º de ESO A, centrada na historia do rock en galego.

Unha sesión non foi suficiente para o seu torrente verbal, pero quedámonos co seu entusiasmo contaxioso, e coa idea de que os adolescentes non deberían ser meros espectadores do mundo cultural, senón tamén protagonistas, creando música, vídeos, literatura, aparellos... e o que faga falta. Grazas, Xurxo!

Fai clic para ver máis fotos

22/05/2018

O alumnado de 6º de Primaria e 1º de ESO gozou durante a mañá de onte dunha actividade no Estadio Municipal Río Seco. Salto de altura, salto de lonxitude e carreiras de velocidade foron algunhas das probas atléticas que practicaron os rapaces e rapazas coa axuda das monitoras Eva e Yolanda. Agradecemos a inestimable colaboración do Club Atletismo Narón.

Fai clic para ver máis fotos

15/05/2018

Hoxe tivemos a visita de tres simpáticos oleiros de Buño. Segundo as súas palabras, o oficio está desaparecendo por falta de aprendices, pero o noso alumnado coa materia de Plástica en 3º e 4º de ESO, ademáis do de 4º de Primaria, estivo encantado practicando esta mañá co barro.

Fai clic para ampliar a foto

10/05/2018

A entrada do noso cole cobra estes días un tinte internacional, coa exposición que prepararon as profesoras de Educación Secundaria Mar González e Montse Lorenzo, para achegar ao resto da comunidade educativa a súa experiencia Erasmus en Burdeos o pasado mes de marzo.

O alumnado de Francés de 4º de ESO traballou buscando información sobre distintos aspectos da cidade (historia, visitas de interés, gastronomía, etc). O de 1º de ESO animouse tamén utilizando o tema para traballar a redacción nas clases de Lingua Castelá. Botádelle unha ollada e aprenderedes un montón de cousas sobre esta "belle ville" do Sur de Francia!

Fai clic para escoitar a entrevista

05/05/2018

Todos os anos, a profesora de Bioloxía (María Varela) propón aos seus alumnos participar cun proxecto de investigación que se poida presentar a un concurso. Algún ano non se anima ninguén; noutros hai moitos, pero ningún seleccionado a concurso. Este ano presentamos dous proxectos ao concurso de Galiciencia, os dous igual de interesantes, pero só un foi seleccionado, o presentado por Brais Rodeiro e Mario Pereira, de 1º ESO B.

Por tal motivo Mario e Brais, xunto coa súa profesora, foron entrevistados por RadioVoz o mércores 2 de maio. Nesa entrevista, explicaron que foron capaces de producir electricidade con patacas e acender pequenos aparatos como LEDs,  calculadoras e reloxos dixitais. Tamén que se van 3 días a Ourense a presentar ese proxecto, e que se gañan o concurso no que participan, irán a outra feira-concurso a Barcelona, Bilbao ou A Coruña.

Engadimos un enlace a un artigo publicado no Diario de Ferrol do 5/5/2018 sobre o mesmo asunto.

Parabéns a estes novos científicos e sorte no concurso!

Fai clic para ver máis fotos

22/04/2018

O pasado venres 20 de abril, o alumnado de 3º e 4º de ESO, acompañado das profesoras Gelu Porto, Pilar Sánchez, Laura González e Eva Mesejo, asistiu a unha representación teatral en inglés (Frankenstein Files), no auditorio municipal de Narón.

A obra foi moi divertida e orixinal. Os actores amosaron moita complicidade co público, e incluso alumnas nosas saíron ao escenario a mostrar as súas dotes dramáticas. Noraboa a Alba Fachal e Lydia Bereijo!!!

Moitas grazas tamén ao Concello de Narón pola súa colaboración no desenvolvemento da actividade.