Fai clic para ampliar a foto

15/01/2019

Maite Núñez, ex profesora do CPI do Feal, vive dende hai varios anos en Noruega. Alí traballa nun instituto de Erdal, impartindo clases de español e, por tal motivo, no mes de decembro propuxo a idea de facer un intercambio de postais de Nadal entre os seus alumnos de Secundaria e os nosos. Así o fixemos.

Na foto aparece unha parte do alumnado que participou nesta iniciativa: todos elaboraron as súas tarxetas con esmero e agarimo. Moitas grazas pola vosa inestimable colaboración. Esperamos que este primeiro contacto sexa o comezo dunha relación máis estable entre os mozos e mozas de ambos centros educativos.

Un saúdo dende aquí para Maite e os seus alumnos e grazas por tender esta ponte entre lugares tan distantes.

Mar González

23/12/2018

Estefanía Silva e Noa Filgueira, alumnas de 4º ESO, participaron nun concurso de redacción proposto na clase de Lingua Castelá e, como premio, obtiveron entradas para asistir á representación teatral Crimen y telón, do grupo Ron Lalá, que tivo lugar onte no Pazo da Cultura de Narón.

Acompañadas por Lola Filgueira, irmá de Noa e tamén alumna do CPI do Feal, puideron comprobar a maxia do teatro, nun espectáculo que, a modo de thriller de comedia negra, facía unha homenaxe a todas as artes e plantexaba ao espectador a reflexión sobre o que podería suceder se nun futuro próximo todas as formas culturais estivesen prohibidas. Non faltaron a música, o humor, e a crítica que caracterizan a traxectoria desta compañía.

Grazas a estas rapazas polo seu traballo de redacción e por amosar entusiasmo pola cultura.

04/12/2018

Seguindo coa conmemoración do mes da Ciencia, dende o Departamento de Bioloxía e Xeoloxía, en colaboración coa Biblioteca de Secundaria, propoñemos un concurso dirixido ao noso alumnado.

Ao longo dos corredores están colocadas catro frases, correspondentes a enunciados científicos. Hai que ler con atención e pensar a que teorema, hipótese ou lei corresponde cada unha; quen a formulou; a cal das ciencias pertence. (Seguro que se estiveches atent@ ás clases non terás problema para resolver estes enigmas).

Solicita na biblioteca a ficha de participación e responde ás preguntas establecidas para cada enunciado. Cando estea cuberta, deposítaa na urna habilitada na mesma biblioteca. O prazo de entrega remata o 31 de xaneiro.

As bases completas do concurso atópanse nos propios corredores. Os premios serán libros de temática científica.

22/11/2018

O alumnado de 3º da ESO fixo unhas maquetas dalgúns tipos de células humanas, como parte do desenvolvemento do seu traballo na materia de Bioloxía. Podedes velas no vídeo que abre este artigo.

15/11/2018

A poetisa Ida Vitale (Montevideo, 1923) acaba de ser elixida Premio Cervantes 2018. Este galardón considérase o Nobel de Literatura das Letras Hispánicas. Neste caso recoñece non só a súa traxectoria poética, senón tamén o seu labor intelectual, como crítica e tradutora. Nos versos de Ida Vitale atopamos o contraste entre o universal e o persoal, entre o culto e o popular. A esencia da súa obra é o reflexo social, sen perder unha actitude vitalista.

06/11/2018

Cal destas fotos é a que máis che gusta? Míraas ben e queda co número da foto que prefiras. Despois vota para decidir entre todos cal é a mellor.

Para votar hai que entrar na aula virtual e ir a “Concurso fotos da Natureza”, entrar no sitio da votación, e escoller o número da foto que máis che gustou. O prazo para votar é desde o 7 ao 22 de novembro.

Como alternativa ao vídeo que abre este artigo, as fotos están expostas na entrada do centro. Grazas pola túa colaboración.

08/10/2018

O Departamento de Bioloxía e Xeoloxía está a lanzar un blog para traballar co alumnado da ESO. Presentará actividades levadas a cabo polo alumnado, e divulgará novas sobre ciencia, concursos, etc. O seu nome é “Aprendiendo con/ciencia” e o seu enderezo escienciaparatodos.blogspot.com (que queda engadido no bloque "Blogs do Feal" da nosa web oficial). Moitas grazas aos alumnos Noa Filgueira e Mario Mouriz (de 4ª A) pola grande implicación neste proxecto.

Para incentivar a participación, abrimos este blog publicando nel as bases dun concurso de noticias científicas ("A mellor nova de ciencia"):

O concurso será trimestral, de xeito que en cada avaliación escollerase a mellor nova. O concurso consiste en recompilar noticias científicas, resumilas e subilas ao blog. Acompañando este resumo, deben aparecer as seguintes partes:

1. Título para a noticia
2. Nome e curso do alumno e materia na que se fixo o traballo
3. Medios de comunicación dos que se recolle a noticia (xornal, xornal científico ou sitio web)

Anímate e participa.

Praia de Doniños

05/10/2018

Un ano máis, convócase ao alumnado da ESO do Feal a participar no Concurso de fotos da Natureza, cun premio de dúas entradas de cine. Achegamos as bases do concurso.

Ademais da foto vencedora en 2017 (feita por Sara Caro) que abre este artigo, deixamos a continuación algunha máis das que se presentaran o ano pasado:

Acantilados

Canóns do río Sil

O bosque

Fai clic para ampliar a foto

01/10/2018

Xa que a nosa web está un pouco parada ultimamente, imos contar un pequeno experimento de tecnoloxía punta, realizado no Feal a pasada semana:

O noso alumnado de 4º de ESO coa materia de TIC, colocou 64 pelotas vellas de pádel (moi parecidas ás de tenis) nas patas das cadeiras da aula de Informática da 1ª planta.

Trátase dunha suxestión de José Manuel Timiraos, posto que a súa aula está xusto debaixo, e xerábase moito ruído arrastrando as cadeiras nos cambios de clase de Secundaria (que non coinciden cos de Primaria). Loxicamente, a verdadeira causa do problema é que os nosos adolescentes non empregan a súa desbordante enerxía para levantar as cadeiras. De momento, a iniciativa é un éxito.

O noso agradecemento á nosa ex-profe de Educación Física Silvia Arroyo, que doou as 64 pelotas vellas, e ao noso alumnado de 4º de ESO por instalalas. Confiamos en que non vai desaparecer ningunha destas pelotas.

01/10/2018

As obras do verán trouxeron melloras para a metade do noso centro, pero tamén deixaron un pouco de caos. Queremos dar unhas grazas especiais ao alumnado da ESO con Tecnoloxía ou TIC, que durante a segunda quincena de setembro axudou a reinstalar dispositivos, poñer orde e limpar en diversos espazos (taller, aulas de informática, biblioteca de Secundaria...). Todos os grupos colaboraron cunha actitude fantástica. Así da gusto ser profe!