16/04/2018

Laura González Ladicani, que é a auxiliar de conversación en inglés que temos este curso no Feal, apareceu en La Voz de Galicia do 15/04/2018 (xunto con outra compañeira que traballa noutro centro). Sen dúbida, a súa axuda fai que o noso alumnado teña unha educación máis completa.

08/03/2018

As profesoras de Ensino Secundario Mar González e Montse Lorenzo están esta semana na cidade francesa de Burdeos participando no programa Erasmus +.

Neste proxecto, participan diferentes centros de Primaria e Secundaria da provincia de A Coruña coa finalidade de aprender linguas estranxeiras e coñecer as ferramentas pedagóxicas empregadas noutros sistemas educativos, para enriquecer o noso labor docente.

05/03/2018

O alumnado de 3º e 4º ESO que cursa a materia de Francés, asistiu o pasado venres á representación da coñecida obra francesa La belle et la bête, no colexio Santa Xoana de Lestonnac.

A obra foi adaptada do texto orixinal do século XVIII por parte da compañía teatral La Bohème, que ofreceu un bonito espectáculo fusionando o teatro con elementos visuais e musicais.

Tralo espectáculo, os actores mantiveron un coloquio co público sobre diversos aspectos da representación.

Fai clic para ampiar a foto

04/03/2018

O sábado ás 11:00 da mañá chegabamos ao centro despois de viaxar toda a noite. Rematabamos así unha semana de días na montaña, de telecadeiras e teleféricos, de nevaradas e sol, de diversión, de novas aprendizaxes... Viñemos moi contentos con todo o grupo esquiando e sen lesións. Esperamos que a viaxe se convirta nunha experiencia inesquecible para todas as participantes. Grazas polo voso comportamento exemplar!!

Sonia e Carlos

Nota: Xa temos un álbum na nosa Galería chamado "Andorra 2018" (grazas especiais a Estefanía Silva Beceiro).

01/03/2018

Hoxe (penúltimo día), ao chegar ao aparcamento do bus tivemos que esperar a retirada da neve da saída, momento que aproveitamos para facer esta foto. Chegamos xustas para coller o material (que gardamos cada día nunha gaiola na propia estación) e comezar o curso.

Despois de dous días sen poder facelo, a nosa compañeira Alba Rey recibiu un curso personalizado de esquí da man dos nosos profes Sonia e Carlos, para recuperar o tempo perdido.

Pola tarde, mentres un grupo seguía a esquiar no sector do Tarter, outro composto por rapazas de Xove, do noso centro e os profes Rodrigo e Carlos, baixamos unha das pistas que máis nos gusta (Gall de Bosc). Mañá esperamos despedirnos con bo tempo.

Laura Corral e July Villadóniga

28/02/2018

Hoxe sorprendeunos o cambio de tempo, a nevada que facía que as telecadeiras se movesen máis do habitual. Aínda así, o tempo permitiunos esquiar en novas pistas azuis, como a Gall de Bosc, unha das máis compricadas que baixamos ata agora. Debido ao cansazo e o mal tempo, decidimos voltar antes a Escaldes para ter un pouco máis de tempo libre e tamén poder ir de tendas.

Lucía Gómez e Lara Beceiro

27/02/2018

Segundo día de esquí rematado con algún pequeno susto, pero preparadas para esquiar mañá (xa vedes como vai mellorando a habilidade no breve vídeo de adianto).

Para recuperar o corpo do esforzo e pasar dúas horas de forma divertida, agora toca visita ao Spa Caldea. Non todo vai ser esquí.

Fai clic para ampliar a foto

26/02/2018

Hoxe tivemos  o primeiro curso de esquí (de dúas horas de duración) no sector El Tarter, cos monitores Álex e Iván. Antes e despois de xantar esquiamos por grupos. Sobre as 18:00 volvimos ao hotel, deixamos as cousas e tivemos tempo libre ata a hora de cear. Sol sen vento e boa temperatura. O día foi espectacular!

• Crónica: Ariadna Ramos, Antía Rodríguez e Alba Romero
• Fotos: Estefanía Silva e Sonia Álvarez

Fai clic para ampliar a foto

25/02/2018

Xa estamos preparadas para o primeiro día de esquí. Hoxe domingo sobre ás tres da tarde chegabamos a Andorra. Compartindo autobús con alumnado do IES Illa de Sarón (de Xove), realizamos tres paradas (Villafranca del Bierzo, Burgos e Alfajarín) ata completar unhas longas quince horas de viaxe. Despois de instalarnos no Hotel Cassany, o seguinte destino é a estación Grandvalira - El Tarter, onde mañá comezaremos as clases de esquí.

Alba Fachal e María Rodríguez

Fai clic para ver máis fotos

23/02/2018

O pasado mércores, o grupo de 1ºESO-A acudiu á Biblioteca Municipal de Narón, acompañado pola súa profesora de Lingua Castelá. Esta actividade forma parte das propostas que fai o Concello para apoiar os recursos educativos.

A coordinadora da Biblioteca ensinoulles as instalacións e explicou con detalle o funcionamento e organización da mesma. Ademais tiveron a oportunidade de visitar o Depósito de Fondos Bibliográficos. O alumnado amosou moito interese e participou activamente ante as preguntas da bibliotecaria. Puideron observar como ten cambiado a transmisión de información nos últimos vinte anos: dende as rudimentarias enciclopedias en papel, pasando por documentos que xa non se imprimen como o D.O.G.A,  ata chegar á moderna tecnoloxía da que gozan neste momento do século XXI, onde todo está a golpe de tecla.