Para conmemorar o Día Internacional Contra a Violencia de Xénero, celebrado o 25 de novembro, a equipa do CPInclúe Iguálat elaborou unha unidade didáctica para as titorías de secundaria coa que se traballaron as desigualdades entre xéneros no deporte. Deste xeito, fíxose fincapé nas diferenzas existentes en canto á vestimenta, salario ou condicións de xogo de distintos deportes. Tamén se promoveu a reflexión sobre o papel dos medios de comunicación nesta fenda de xénero, podendo verse a continuación unha mostra da investigación realizada:

Mostras de novas dixitais con diferenzas no trato da información segundo o xénero.

Por outra banda, analizouse o uso dos espazos do patio durante o recreo, amosándose unha clara diferenciación entre os nenos e nenas en canto á actividade e ao espazo ocupado:

Nenos xogando ao fútbol.

Pequenos grupos de nenas paseando.

A unidade didáctica ao completo pode ser consultada nos ficheiros adxuntos.

A arbitraxe deportiva é un labor difícil e ás veces ingrato. Moita xente pensa que pode gritar, insultar e mesmo agredir a alguén polo feito de regular un xogo segundo unhas normas prescritas. Se a isto lle engadimos que quen arbitra é unha muller xérase unha mestura explosiva.

O xoves visitounos no centro escolar Cristina Fernández Piñeiro, quen fora árbitra internacional de balonmán. Esta muller foi pionera na arbitraxe feminina no balonmán internacional masculino e feminino. Desempeñou labores de delegada para a federación deste deporte dende o 2017 ata o 2020. Aí seguiu constatando a pervivencia de profundos prexuízos e reticencias cara as mulleres e seguiunos denunciando, feito polo que foi cesada do seu posto na Real Federación Española de Balonmán, ao convertirse nunha voz incómoda e reivindicativa.

Contounos o difícil camiño que tivo que facer neste deporte polo simple feito de ser muller. As trabas que tivo que superar nun mundo dominado polo xénero masculino, que se resiste á entrada das mulleres a pesar das repetidas mostras dunha competencia que supera ás veces a moitos dos homes.

O abandono da alta competición deixou un oco no que ningunha muller tomou relevo. As razóns son moitas e variadas, pero todo radica nuns prexuízos que parece que aínda non somos capaces de superar: o rexeitamento do traballo das mulleres nun terreo dominado polos homes polo simple feito de ser muller.

Esta charla forma parte tamén dos programas Inclue-T, EduSaúde e PVAD.

https://www.balonmanoveteranos.com/homenajes-merecidos-5/

A ANPA subvencionou, a través do Pacto de estado pola Igualdade, uns obradoiros sobre Igualdade, novas tecnoloxías e novas masculinidades para o alumnado do centro.

Esta actividade englóbase dentro do programa de conmemoración do 25-N, Día Internacional contra a Violencia de Xénero

Para dar remate á unidade didáctica contra a homofobia que elaboramos desde o grupo de traballo IGUÁLA-T, o alumnado de 2º ESO-B deseñou unha serie de carteis que demostran a súa tolerancia e o respecto pola diversidade. 

Deixamos aquí unha mostra dos carteis seleccionados. 

Parabéns a todos e a todas.

O alumnado de 4ºESO participou no proxecto "Os amores non matan" dentro da programación da Primavera Lila da Concellería de Igualdade do Concello de Baiona. Froito da súa participación e implicación chegan estes vídeos, producto final do seu traballo:

Vídeo 4ºA:

Vídeo 4ºB:

O 17 de maio, ademais de conmemorarmos o Día das Letras Galegas, tamén se celebra o Día Internacional contra a Homofobia, Transfobia e Bifobia. É por iso que desde o grupo de traballo do Contrato Programa IGUÁLA-T decidimos elaborar a unidade didáctica A homofobia no contexto educativo para concienciar o alumnado da situación que padecen moitos adolescentes nos centros educativos e fomentar así o respecto pola diversidade, a igualdade e a liberdade. 

Nos arquivos adxuntos atopamos dous documentos: a xustificación e presentación da unidade, na que tamén se inclúen unha serie de actividades, e un segundo documento a modo de apoio visual para desenvolver as sesións desde as respectivas titorías. 

Agardamos que sexa de grande utilidade e que desde o noso labor docente axudemos a construír persoas libres, sas e liberadas de calquera tipo de prexuízo. 

Da unión do Contrato-Programa Iguálate e do Plan Proxecta Rapazas emprendedoras nas TIC, naceu una idea que finalmente saíu á luz. O resultado dese proxecto interdisciplinar que levou a cabo o alumnado de Secundaria é a Revista das Mulleres Científicas.

Un dos obxectivos principais desta actividade foi poñer en valor a contribución das mulleres en cada un dos campos nos que traballaron. En moitas ocasións, o recoñecemento ós seus logros foi posterior á súa morte. Por iso, consideramos necesario destacar o seu labor e dar a coñecer o seu papel na sociedade.

Por outra banda, a lingua vehicular da revista é o galego. Deste xeito, contribuímos á súa normalización no día a día dos estudantes ó tempo que se fai notar a escasa presenza da lingua galega nesta área.

A adolescencia é un período cheo de cambios físicos, entre os cales sen inclúe a menstruación. Na sociedade existen numerosos tabús ó respecto, polo que é necesario dotar dos coñecementos necesarios ó noso alumnado, tanto nenos coma nenas. Deste xeito, contribuímos a eliminar as barreiras que as mulleres teñen por causa do seu xénero.

Para chegar a tal fin, os estudantes de 1º da ESO recibiron un obradoiro afectivo sexual centrado na menstruación.

Para celebrar o Día Contra a Violencia de Xénero, o pasado 25 de novembro traballamos os roles de xénero na publicidade, revisando o papel asignado á muller mediante diferentes materiais: vídeos da época franquista, imaxes publicitarias sexistas, catálogos de xoguetes,... detectando a presenza de discursos machistas e actitudes contrarias á igualdade de xénero. 

Unha mostra do material expresando as diferenzas nos roles é o seguinte:

Mais semella que os costumes van cambiando, pois tamén hai quen fai as cousas ben: