CPI Aurelio Marcelino Rey García

Chegou o Outono acompañado da choiva e con ela o noso Magosto cargado de actividades para todas as idades e gustos.

Os máis cativos/as de Infantil fixemos xogos no ximnasio supervisados polos nosos compañeiros/as de sexto de primaria e desfrutamos cos nosos amigos Os Piñeiriños que nos levaron a outros paises e culturas a través das súas cancións. Tamén nos acompañaron nesta viaxe musical os/as nosos/as compañeiros/as da Unitaria de Arcos de Furcos que se achegaron un ano máis a compartir con nós este día de festa.

Os rapaces e rapazas de Primaria tamén fixeron xogos no pavillón pero desta volta facendo uso dos Xogos Tradicionais de madeira que nos cedeu moi amablemente o concello de O Grove. Tamén desfrutaron da organización de varios obradoiros que se puxeron en práctica grazas á creatividade e bon facer dos/as mestres/as e profesores/as do noso centro: cerámica castrexa grazas á Fundación Terra Termarum, elaboración de abalorios, xoguetes con material de refugallo, cociña, maxia, karaoke, etc.

E os máis grandes de Secundaria tamén tiveron a oportunidade de por en práctica as súas habilidades artísticas e creativas cos diferentes obradoiros que prepararon os profesores/as e a Asociación Avanzar, que xenerosamente compartiu con nós un obradoiro de coiro.

Entre as múltiples actividades que estamos a desenvolver dentro dos Plans Proxecta de Innovación Educativa nos que está a participar activamente o profesorado do noso centro, esta actividade concretamente enmárcase dentro do programa Aliméntate Ben de concienciación e posta en marcha de hábitos de vida e alimentación saudables.

Desta volta o alumnado de infantil animouse a festexar o Samaín meténdose de cheo coas mans na cociña e fixeron unhas receitas monstruosamente ricas e sans: monstruos de kiwi e de mazá, pantasmas de plátano, dedos de momia, cabaciñas de mandarina. E despois do duro traballo chegou a mellor parte, a degustación das nosas receitas.

Botádelle unha ollada ás fotografías que sacaron as mestras premendo nestas imaxes ou visitando a nosa galería de fotos.

Un ano máis chegou o Samaín ao noso centro e con el as múltiples actividades organizadas, pensadas e postas en marcha arredor desta temática. Coma sempre contamos coa colaboración das familias de Infantil que unha vez máis non defraudaron e agasalláronnos cunha colección ampla de creatividade e cunhas cabazas que decoraron o corredor principal co colexio. O equipo de traballo da biblioteca tamén se sumou a estas actividades organizando o noso particular corredor do medo ateigado de pantasmas, morcegos, portas monstruosas e moitos libros sobre o Samaín. E os/as rapaces/as de terceiro de primaria puxeron a proba as súas habilidades culinarias e gastronómicas elaborando unha serie de receitas para celebrar esta festa.

Coma sempre, premendo nestas imaxes ou visitando a nosa galería de fotos, podedes ver canto aprenderon os/as nosos/as raparigos/as e que ben o pasaron.

O pasado martes 18 de outubro recibimos a visita do fotógrafo vigués Felipe Carnotto, que realizou no noso centro un obradoiro sobre fotografía social co alumnado de 3º e 4º ESO. Esta actividade organizouse en tres partes, primeiro proxectouse un documental realizado por unha estudante siria, co seu posterior debate; a continuación Felipe explicoulle e amosoulle o seu traballo como fotógrafo social en lugares en conflicto como Nicaragua e especialmente, Siria e os Balcanes. E finalmente, amosoulle, coa axuda da súa cámara, os principios básicos da fotografía, salientando que calquera de nós pode converterse nun fotógrafo social, nalgún momento da súa vida. En definitiva, foi moi enriquecedor coñecer unha experiencia vital tan interesante, que non deixou indiferente a ninguén.

Coma sempre, podedes botarlle un ollo ás fotografías que fixemos visitando a nosa galería de imaxes ou premendo en calquera destas.

O luns 10 de outubro o alumnado de Infantil e terceiro e quinto de Primaria recibiron a visita da pandilla dos Arroases que trouxeron moitos xogos, historias, diversión e coñecementos sobre os alimentos que nos ofrece o noso mar. Todo o traballo deste obradoiro forma parte do programa Aliméntate Ben que forma parte do traballo de innovación educativa dos Plans Proxecta nos que estamos a participar o profesorado do centro.

Para ver as diferentes actividades que se desenvolveron cos distintos grupos de traballo podedes visitar a nosa galería de fotos ou premer en calquera destas imaxes.