Queremos compartir con toda a comunidade educativa do noso centro o agradecemento que nos fixeron chegar dende a ONG "Hospitaleiros sen Fronteiras" pola colaboración na campaña de recollida de fondos.

Moitas grazas a vós por darnos a oportunidade de colaborar nesta causa!! 

"Un ano máis queremos dar as grazas ao CEIP Rosalía de Castro de Bóveda pola súa xenerosidade e implicación con Hospitaleiros sen Fronteiras axudando para que os nenos talibé de Senegal teñan unha infancia digna.

Estamos moi agradecidos de corazón polas vosas orixinais iniciativas, este ano cos xabóns solidarios lograstes unha importante suma para que poidamos seguir traballando e acadando os cambios fundamentais que precisan os nenos talibé.

Non temos palabras, só darvos de novo as grazas e unha aperta inmensa dos vosos amigos senegaleses."

Imaxes do noso xabón solidario no mercadiño celebrado en Sarria o 1 de xuño.

 Estamos encantadxs e súper emocionadxs atendendo aos seis poliños que naceron estes días. Están vivindo nunha caixa de madeira que Julián (o papá de Liza) construiu para que poidan estar quentiños nas primeiras semanas de vida. Moitísimas grazas Julián!! A caixa ten instalada unha lámpada incandescente que lles proporciona calor e luz.

Neste proceso tivemos un importante contratempo: un corte de luz que deixou sen funcinar a incubadora unha noite. Pero, grazas ao ovoscopio, puidemos seleccionar aos ovos vivos, retiramos os que se estropearan e decidimos incluír dous ovos máis.

Despois de 22 días, o 15 de maio comezaron a nacer e asistimos, emocionadxs, á eclosión de catro ovos.

Na incubadora quedaron unha semana máis os ovos que puxemos máis tarde e, porfin, o pasado martes, tamén naceron estes outros dous poliños!!!

Agora os nosos seis poliños están sendo coidados e atendidos polo alumnado que continuará con esta labor ata o mes de xuño.

Os poliños precisan un fogar agora que remata o curso e, por isto, iniciamos a campaña: "ADOPTA UN POLIÑO".

Todas aquelas familias que desexen participar no proceso de adopción poden mandar ao cole o formulario que se mandou ás casas cuberto. Rapartiremos os poliños entre as familias adoptivas e, se hai moitas solicitudes, realizaremos un sorteo público para determinar a que casas van os poliños.

Foi unha experiencia incrible! Estamos aprendendo moitas cousas novas!

O luns día 15 realizamos a saída que tiñamos prevista para conmemorar o Día Internacional da muller (8 de marzo) e, que polas malas condicións climatolóxicas tivemos que adiar. 

Esta saída estaba dentro do proxecto "As mulleres do noso Concello", co fin de promover e visibilizar o papel das mulleres que traballan en Bóveda, valorando a súa importancia na nosa vila e no ámbito socioecónimoco desta. 

A cada aula tocounos visitar dous establecementos diferentes para entrevistar e coñecer as mulleres que traballan neles. Moitxs de nós, nunca estiveramos en algúns deles, polo que foi un día moi enriquecedor. 

Os establecementos visitados fóron os seguintes. Queremos agradecer a disponibilidade de todas elas para realizar dita actividade:

-Peluquería Noelia Castro

-Farmacia

-Supermercado Claudio

-Carnicería Salgueiriña

-Oficina de correos

-Ferretería Davila

-Supermercado Día

Tamén, acudimos ao Concello onde nos esperou Cristina, Concellería de Cultura, para falarnos da súa labor e, como agasallo e recordatorio dese día entregounos unha camiseta a cada un de nós. 

Como produto final deste proxecto, realizamos un unha especie de caderno de campo, onde apuntamos información aportada por cada unha delas. Agora, xa forma parte da noso biblioteca escolar. 

Ao rematar as entrevistas, acudimos a zona axardinada de detrás do Concello para xantar ao aire libre e, ao rematar, xogar no parque. 

Pasámolo moi ben!

Moitas grazas a Noelia, María José, Ángeles, Cristina, Mónica, Ana, Maite, Mari Carme, Rosi e Cristina pola vosa imprescindible labor. 

O pasado día 12 de abril, viñeron a visitarnos Javier, mestre de tecnoloxía do Colexio Escolapios de Monforte acompañado de catro alumnas: Sofía, Natalia, Julia e Xandra. Ademais, tamén estivo con eles Camilo, mestre en prácticas e veciño do noso Concello.

Acudiron a noso cole para darnos a coñecer o fascinante proxecto que están levando a cabo dende hai uns cursos denominado "El Rincón de Leonardo" clicando aquí, poderedes acceder a súa web para informarvos un pouquiño máis sobre esta interesante iniciativa.

"Un proxecto que busca potencias os valores humanos a través da creatividade e a reflexión, co obxectivo de que todxs nos sintamos mellor construíndo unha alternativa a mundo tóxico que moitas veces rodea aos adolescentes. Traballando a súa saúde emocional".

A esta actividade acudiron os alumnos de 6º curso de primaria e Javier e as súas alumnas faláronlle de moitos dos problemas que xurden a diario nas aulas de secundaria. Transmitíronlle a idea de que somos seres únicos e especiais e que ninguén debe dicirnos como debemos ser. Para elas, "El Rincón de Leonardo" é un lugar onde se sinten seguras e felices.

Esta iniciativa, xurdiu dende o Departamento de Convivencia do centro co fin de dinamizar as relacións positivas entre iguais e, vivenciar dalgún xeito o seu futuro inmediato no instituto.

Pasamos un ratiño moi divertido! Gustounos moito ensinarvos o noso cole e escoitar a emoción que sentides ao formar parte deste proxecto tan interesante e necesario.

Moitas grazas a Javier, pola túa implicación dentro e fóra das aulas. Estamos seguros de que este é o inicio dunha aventura apaixoante!!!

Todxs deixaron a súa pegada no libro de firmas da nosa biblio.

Esperamos tervos de volta pronto!!!

O pasado venres día 5 de abril visitounos Elia, a mamá de Valentina de Infantil de Enzo de Primaria para ensinarnos a facer xabón natural.

Acudimos a zona verde do noso patio aproveitando o bo tempo e seguindo a recomendación de non facer xabón en lugares pechados.

En primeiro lugar, explicáronnos cales eran os ingredientes necesarios e os pasos a seguir.

Cada aula fixo o seu propio xabón empregando:

-Graxa

-Agua

-Deterxente en po

-Suavizante líquido

-Sosa (soamente manipulada polos adultos)

-Champú

Por grupos, fomos poñendo os diferentes ingredientes en cada cubo coa supervisión e guía dos nosos profes.

Observamos os materiais a empregar, como por exemplo a graxa.

Por último, cando a mezcla xa estaba espesa botámoslle un colorante azulado para darlle algo de cor. 

O proceso finalizou cando a mestura estaba totalmente homoxénea. Deixámola reposar durante un tempo para que se solidifiquen o suficiente como para cortala en pequenas porcións.

Este traballo irá destinado ao mercadiño solidario de Hospitaleiros sen fronteiras, ONG coa que colaboramos, para recadar fondos para axudar aos nenos do Senegal.

Moitas grazas a todas as familias que aportaron graxa para facer posible esta actividade e, en especial, a Elia pola axuda!

Este xoves acudimos ao Centro Sociocultural do noso Concello para realizar un obradoiro de trampas para as avespas asiáticas, comunmente coñecidas como "velutinas".

Para realizar esta actividade acompañáronnos Paula, xerente de Mieles Anta e Mohamed, apicultor experimentado da empresa.

Eles, explicáronnos todo o relacionado con este apaixoante mundo. Comezaron, falándonos das características das abellas e da problemática cas velutinas.

A continuación, visualizamos un vídeo sobre o proceso de fabricación do mel e sobre a ameaza que supoñen as avespas velutinas na natureza.

Despois, Mohamed estivo a esinarnos o traxe de apicultor e todos os instrumentos necesarios para o seu traballo.

Ensináronnos tamén, como recollen o polen das patiñas das abellas e algunha velutina.

Ata probamos mel directamente do panal! Estaba deliciosa!

Por último, puxémonos mans a obra para realizar as nosas propias trampas de velutinas e poder capturar moitas nesta tempada. Empregamos o seguinte material:

-1 botella de plástico

- Cordón

- Algún instrumento para facer dous buratiños na botella

Para finalizar, vertemos dentro da botella a mestura do líquido atraente das velutinas. Deixámosvos por aquí a receita por se queredes facer máis:

- 100 ml de agua

- 50 gr de azucre

- 1 sobre de atraente específico

Cada alumx levou para a súa casiña a trampa que elaboraron. Ademais, a empresa Mieles Anta deunos diferentes trampas para poñer nas árbores da nosa zona verde e así, intentar estar libres de velutinas.

Mieles Anta tamén obsequiou a todo o alumnado e profesorado do cole cun detalliño moi especial.

Se clicades sobre a imaxe poderedes acceder á noticia publicada no xornal La Voz de Galicia sobre dita actividade.

 Moitas grazas a Mieles Anta, pola súa labor, e ao Concello e as familias por idear e organizar esta actividade!

O pasado venres día 26 viu a "Conto en familia", Alba, a mamá de Dylan de Educación Infantil e Daniela de 6º de Primaria. 

Contounos dos contos súper interesantes e divertidos, que nos trasmitiron o valor da empatía, da confianza en un mesmo, do autoconcepto... O libro é o seguinte: De mayor quiero ser...feliz, de Anna Morató García, con ilustracións de Eva Rami. Un exemplar que inclúe diferentes contos sobre positividade e autoestima. 

Ao rematar a sesión, Dylan entregoulle a súa nai o detalle de agradecemento pola visita. Ademais, con este "Conto en Familia" comezamos o noso libro de visitas da biblio, un rexistro de todas aquelas persoas que ao longo dos cursos veñan a visitar este espazo tan importante para nós. 

Esperemos que todo o noso alumnado sexa mooooi feliz sempre!

Moitísimas grazas, Alba, por traernos estas ensinanzas tan importantes! Estamos desexando que volvas a compartir un ratiño con nós!

Acércase o tempo de Entroido no noso cole, unha tempada moi desexada por todxs. Xa temos todo listo e organizado para esta gran festa!

Deixámosvos o cartel informativo coa nosa programación.

Durante a semana do 5 ao 9 de febreiro teremos que seguir as Comandas do Meco. Como vedes na seguinte imaxe, o venres, quen queira pode vir disfrazo dende a súa casa (disfraz libre), xa que despois do tempo de comedor teremos un baile de disfraces, que dependendo da climatoloxía, será no patio exterior preferiblemente. Tamén, tomaremos chocolate con biscoito.

As Comandas do Meco non son obrigatorias, teñen carácter voluntario. Clicando aquí accederedes a elas en formato PDF. 

Ademais, nos días previos a esta festividade faremos un proxecto de investigación sobre as diferentes tradicións de Entroido que existen en Galicia. Pásamolo ben mentres aprendemos moitas cousas novas!

Recordade que os días 12, 13 e 14 non son lectivos, polo que non haberá clase. 

       25N- DÍA INTERNACIONAL CONTRA A VIOLENCIA DE XÉNERO       

Como centro educativo cremos que a mellor arma para loitar contra a violencia de xénero é unha educación cimentada na igualdade efectiva entre mulleres e homes. Por esta razón e para reivindicar a nosa loita contra esta problemática organizamos diferentes actividades educativas.

O venres día 24 acudiu ao centro a concelleira de Cultura e Ensinanza, Cristina Juíz, para explicarnos a campaña de sensibilización do Concello "Sementando igualdade". Entregounos a cada un de nós, un conto dos Bolechas titulado "En Bóveda somos iguais" e cunha ilustración do miradoiro do Alto do Coto. Ademais, tamén nos amosou a árbore da igualdade e deunos unha pegatina a cada un/unha de nós. Por último, pegamos na entrada do noso cole o símbolo de dita iniciativa. Quedou precioso! Moitas grazas por estes agasallos tan importantes e necesarios!

A nivel de centro, organizamos un contacontos realizado polo alumnado de 5º e 6º de primaria para todxs durante a hora de ler do luns día 27. O conto elixido foi o titulado "As mulleres que cultivaban néboas" de Bea Gregores da Editorial Xerais.

Nel relátase a historia de supervivencia e esperanza dunha nena e a súa mamá, que tecía unha manta azul para protexelas dos actos violentos do seu papá.

Unha vez comentado o conto, entre todxs realizamos a nosa manta azul como símbolo de protección de todas as víctimas de violencia de xénero. Para tecela cada un/unha de nós tivo que escribir nun anaquiño de cartolina unha palabra, unha frase ou realizar un debuxo que denotara unha actitude contraria á violencia. Debido a gran importancia desta actividade, todo o persoal do centro participou na confección da nosa manta.

A verdade é que a actividade co lema "Tecendo fíos pola igualdade" demostrou a sensibilidade que o noso alumnado ten ante esta problemática. Escribiron palabras moi bonitas que confiamos que nun futuro sigan servindo como referencia dos seus actos.

Ademais, de todas estas tarefas. Como xa sabedes, a cada aula tócalle facer un decoración para "o taboleiro das conmemoracións" que está situado nas escaleiras do centro. Neste caso, foi o alumnado de 3º e 4º de Educación Primaria xs encargadxs de elaborar un mural reivindicativo que lles quedou así de bonito:

 GALERÍA DE IMAXES

O día 20 de novembro conmemórase o Día Universal dos Dereitos da Infancia porque foi neste día, en 1989, cando se firmou a Convención sobre os dereitos dos nenos e nenas un tratado internacional das Nacións Unidas que recoñece os dereitos fundamentais das persoas menores de 18 anos. 

Esta conmemoración foi traballada polo alumnado de 1º e 2º de Educación Primaria, que elaborou un cartel decorativo para "o taboleiro das conmemoracións" do noso corredor. Ademais, o alumnado de 3º e 5º, na materia de Proxecto Competencial, realizaou un decálogo sobre os dereitos básicos da infancia.