Fai algúns anos descubrimos (descubrimos as educadoras, obviamente os conservadores do museo xa sabían isto) unhas pezas artísticas moi curiosas dos anos oitenta de distintos artistas contemporáneos galegos. Tratouse dun proxecto do ano 1986 no que se convidou a distintos pintores realizar un deseño dunha bandeira de Galicia. Estas bandeiras fixéronse coa idea de que foran obras de arte efémeras e se expuxeron nunha mostra colectiva en Santander. Anos despois, a Xunta depositounas no museo. O certo é que cremos que a maior parte dos artistas que as fixeron seguramente non saiban sequera que estas bandeiras se gardaron e que están no noso museo.
O museo planteouse nalgunha ocasión facer unha exposición con elas pero polo momento nada disto saiu adiante e continuan penduradas no almacén.
O caso é que a última actividade que se nos ocorreu para enviarvos era a de, partindo deste proxecto, animarvos a facer unha bandeira que dalgún xeito puidese ser un símbolo universal; conectando co plantexamento do mundo e as culturas do voso proxecto de aula.
