Biblioteca

Xogamos co alumnado de E. Infantil

A semana pasada celebramos o Día das Bibliotecas Escolares, unha das actividades propostas foi que o alumnado de 3º ciclo aprendera nas súas clases diferentes xogos de mesa axeitados ao resto de cursos do cole. O obxectivo era ensinarlles a xogar aos máis novos e desfrutar dunha xornada divertida. Compartimos con vós algunhas fotiños do venres no que o alumnado de 5º de E. Primaria compartiu o seu tempo co alumnado de 5º e 6º de E. Infantil.

Día das Escritoras

Hoxe, luns 16 de outubro, conmemoramos o Día das Escritoras. Esta data vense conmemorando dende outubro do 2016 para recuperar o legado das mulleres escritoras, facer visible o traballo das mulleres na literatura e combater a discriminación que sufriron ao longo da historia. Este luns traballamos o poema de Gloria Fuertes "Poema al No". Pasamos o poema ao galego, o escribimos entre todos e todas e fixemos un pequeño mural para decorar a porta da nosa aula.

LECTURA E FAMILIAS: TEATRO E MOVEMENTO

A semana pasada o alumnado de 6º de EI, de 1º, 2º e 3º de Primaria tivemos o pracer de gozar en familia dun obradoiro impartido por María Torres. Este obradoiro versaba sobre o teatro e o movemento, nel fixemos actividades de improvisación, de imitación… todo isto dentro dunha atmósfera lúdica.

Foi unha experiencia xenial! Grazas ás familias que puideron asistir por compartir este anaquiño do seu tempo con nós e por facer escola xuntas!

Para o vindeiro curso máis!

Centifest: feira de xogos

O martes 30 de maio celebraremos o CENTIFEST!, a nosa feira escolar. Este ano será unha feira de xogos, como colofón final do noso proxecto de centro "A maxia do xogo".

Queres vir vernos ou participar na nosa feira? Reserva xa o día e anímate!

Mes do xadrez en marzo. International women's month 2023

Durante o mes de marzo tivemos un espazo pop up no centro adicado ao xadrez. Durante os recreos, os nenos e nenas que querían podían vir ata a sala para xogar libremente, aprender, ensinar ou ver as partidas que estaban a acontecer.

Durante as dúas últimas semanas, organizamos un torneo por cursos e nos dous últimos días unhas partidas de "masters" coas persoas gañadoras de cada curso.Resulta que de cada 10 persoas que están federadas para xogar ao xadrez, soamente unha é muller, polo que quixemos aproximarnos a este deporte no cole e o resultado non puido ser mellor, xa que a penas había diferenza en números entre nenos e nenas que querían xogar e o resultado do torneo tamén foi terriblemente enriquecedor.

Estamos moi orgullosas da enorme participación (mais de 100 nenos e nenas viñeron xogar algunha vez e 50 persoas participaron no torneo, de 155 que somos no cole!) e de cara ao ano que vén pensamos que pode ser boa idea repetir, incluir partidas de peón para educación infantil e organizar partidas de persoas adultas, xa que con todo o que lles gusta o xadrez ás profes Cris e Iria non puideron xogar nin unha partida!

VISITA DE ANDREA MACEIRAS

VISITA DE ANDREA MACEIRAS

O pasado 28 de febreiro veu ao cole Andrea Maceiras autora do libro "Alma de elefante" que limos o alumnado de 3º e 4º EP.

Antes de comezar fixémoslle entrega dun pequeno agasallo preparado por todos nós: un elefante de "fieltro" e un libro cun pequeno texto e debuxos feitos por nós sobre o libro.

Logo pasou a explicarnos as "orixes" do libro cunha presentación dinámica: a historia naceu a partir dunha viaxe que ela fixo por Asia e está dedicada ao neno ou á nena que perdeu un debuxo e que ela atopou preto de Banteay Srei (templo de Angkor, en Camboia). Cando o visitou había un grupo de nenos e nenas correndo polos arredores, alí foi onde atopou unha pequena folla cun debuxo no que aparecía a imaxe do que ela estaba a ver dende o mirador.

Despois da explicación pediunos que pecharamos os ollos, que nos relaxaramos e nos viramos sendo auga, terra, aire ou pedra... Unha vez relaxados, leunos con voz mainiña un relato da velliña Champey no que nos pedía que imaxinaramos de que animal tiñamos a nosa alma, coma Suy que tiña alma de bolboreta e Lawen que tiña alma de elefante.

Conseguiu a nosa relaxación e, pouco a pouco, cada un de nós foi dicindo de que animal era a nosa alma: peixe laranxa, puma, serpe... Non vos podedes imaxinar a cantidade de animais que eran as nosas almas!!!

Respondeu a todas as nosas preguntas e escoitou moi atenta as interpretacións que iamos facendo sobre uen pensabamos que eran Suy e Lawen partindo do debux da cuberta do libro.

Para rematar asinou os nosos libros facéndoos únicos co noso nome e o da alma do animal que cada un de nós imaxinou.

Sóubonos a pouco o tempo que estivemos con ela.

Grazas Andrea Maceiras por compartir con nós un anaquiño do teu tempo.

SEMANA DA ESCRITURA A MAN

A pasada semana conmemoramos no centro o Día Mundial da Escritura a Man! Estreámonos o pasado curso con esta actividade e tivo tanto éxito que decidimos repetila. A través de diferentes propostas de lettering adaptadas a cada nivel traballamos os trazos principais, diferentes tipoloxías de alfabetos e de números e ata propostas de libre creación xa que temos no centro a verdadeiros e verdadeiras expertas.

Tanto maiores como pequenos e pequenas esfórzanse por facer unha caligrafía impecable, adornada e que da gusto ver. Con esta actividade pretendemos traballar a creatividade, a relaxación, a concentración e tamén espertar novos intereses e talentos.

Día das Bibliotecas

O pasado 24 de outubro celebramos o DÍA DAS BIBLIOTECAS ESCOLARES. Para conmemorar este día o alumnado de sexto de educación primaria serigrafiamos unhas bolsas de tea cun anagrama creado por nós para recadar fondos para a excursión de fin de primaria. Nestas bolsas ían libros adaptados ás diferentes idades, libros que saíron despois de facer un expurgo na biblioteca do centro. Traballamos moito pero o resultado e a acollida foi fantástica.

Inauguración do PDI: a maxia do xogo

Esta mañá tivemos unha sorpresa no cole: as mestras e mestres tiñan preparada a inauguración do PDI!

Cando chegamos as filas, puxéronnos unha pegatina dun cor que resultaron ser grupos de nenos e nenas mesturados por aulas. Así, fomos pasando polos distintos talleres: xogos populares, xogos predeportivos, xogos de mesa, xogos virtuais e xogos xigantes!

Aquí vos deixamos unhas fotos para que vexades:

PDI a maxia do xogo

Mes da Ciencia. Charla-obradoiro Avances tecnolóxicos

Este martes 16 de novembro o alumnado do 3º ciclo de E. Primaria tivemos unha charla- obradoiro sobre os avances tecnolóxicos na medicina. Guillermo, pai de Emma Moreira Moure e o seu compañeiro Antonio organizáronnos unha entretida e interesantísima charla. Temos que agradeceslles a dedicación, a paciencia e o ben que nolo explicaron todo.