O venres 15 de novembro tivemos unha nova edición da nosa proposta de grupos interactivos chamada “Xogos en Familia” co alumnado de 5º e 6º e coas familias voluntarias que se prestaron a compartir con nós un anaco do máis entretido.

Nesta ocasión tivemos a sorte de contar con Vero, a nai de Arián, que se encargou do xogo "Diversión con Banderas"; Cristina, nai de Lucía, que lles ensinou a xogar a “Roll to the Top”; Ángeles, avoa de Enzo e Carlos, que se ocupou do xogo "Friegas tú"; Laura, nai de Alicia, que estivo ao frente do "Walkie Talkie"; e Laura, nai de Martín, que dirixiu o xogo "Gatipedro". Ademais, Cris, a profe de 6º, encargouse do xogo “Taco, gato...” Moitas grazas a todas pola vosa colaboración!

Con esta segunda xornada de "Xogos en Familia" confirmamos que a actividade é un éxito, tanto para o alumnado, como para as familias, que poden vir compartir cos seus nenos e nenas estes ratiños tan divertidos de risas e xogos, que ademais serven para aprender e repasar contidos de clase. Que máis se pode pedir? Non hai máis que ver os sorrisos nas súas caras para saber que unha vez máis todas e todos desfrutaron moito.

En 5º e 6º de primaria estivemos a traballar sobre esta artista tan especial, aproveitando que se achega o Samaín e que Louise Bourgeois adoraba as arañas. Estas criaturas, que a algúns e algunhas nos producen arrepío, á escultora francesa encantábanlle, posto que lle lembraban á súa nai por ser criaturas protectoras, coidadoras, dispostas a axudar e intelixentes, como a súa nai á que sempre lle profesou un gran amor. Por iso creou, entre outras obras unhas esculturas xigantes con forma de araña ás que chamou "Maman", a palabra francesa para "mamá".

Despois de ler sobre a artista francesa e escoitar o conto "Louise Bourgeois Made Giant Spiders and Wasn't Sorry", contado por Valentina, a nosa auxiliar de conversa, as nenas e nenos de quinto e sexto comezaron a crear as súas esculturas de araña, emulando a obra de Louise Bourgeois.

Hoxe, 18 de outubro, comezamos a nosa proposta de grupos interactivos chamada “Xogos en Familia” co alumnado de 5º e 6º e, por suposto, coas familias voluntarias que quixeron colaborar e compartir con nós un anaco ben divertido.

As nais que viñeron hoxe xogar connosco foron Marisa, que se encargou do xogo "Verbolario", Ledicia, que se ocupou do xogo "Banderea", María, que estivo ao frente do "Picto Rush", Yoli, que dirixiu o xogo "Adivina en 10: Países", Laura, que se ocupou do "Alto Voltaje Extreme" e Ari, que dinamizou o xogo "Distraction".

En terceiro ciclo decidimos continuar este curso cos grupos interactivos, unha forma de organización da aula que une aprendizaxe e convivencia e que, segundo a nosa experiencia previa, é moi beneficioso tanto para o alumnado como para as familias participantes. Os grupos interactivos caracterízanse por multiplicar e diversificar as interaccións que teñen lugar na aula e por ser un tipo de organización inclusora do alumnado, na que se conta coa axuda de máis persoas adultas que dinamizan as actividades de aprendizaxe, ademais das mestras dos grupos-clase.

Por outra banda, nestas actividades empregamos tamén a metodoloxía ABX (Aprendizaxe Baseada en Xogos), que consiste no emprego dos xogos de mesa como recurso ou ferramenta educativa para facilitar o proceso de ensino-aprendizaxe.

O xogo é unha ferramenta fundamental para o desenvolvemento global do ser humano, especialmente desde a infancia, e os xogos de mesa supoñen un xeito atractivo e divertido de achegar o alumnado á adquisición e afianzamento das competencias e dos contidos curriculares. Trátase dunha metodoloxía activa que ofrece unha experiencia educativa significativa, acorde ás necesidades do alumnado e que ten en conta os seus intereses e motivacións.

Cremos que esta primeira xornada de "Xogos en Familia" foi un éxito, tanto para os rapaces e rapazas, que xa están desexando repetir, para as mestras, posto que vemos ao alumnado e ás familias desfrutar xuntos, e tamén para as nais colaboradoras, que nos expresan que lles gusta a iniciativa e gozan participando en actividades da escola cos seus fillos e fillas.

Moitas grazas a Marisa, Laura, Ledicia, María, Yoli e Ari por animarvos a vir xogar con nós e facer posible levar a cabo estas propostas!

Na materia de Arts en 5º e 6º comezamos traballando sobre o artista Joan Miró e, ademais de aprender sobre a súa biografía e a súa obra, tamén realizaron as súas versións de cadros do artista catalán.

Os rapaces e rapazas realizaron estes traballos mediante un xogo de "roll and draw", é dicir, lanzando os dados e engadindo elementos ao debuxo segundo o resultado obtido.

Así, o azar e a creatividade dos nenos e nenas fixeron que os traballos quedaran así de ben: