O pasado xoves 19 de maio, fixemos unha saída didáctica pola Senda do río Bispo, para poder observar e estudar as flores silvestre que crecen a súa beira. Recollemos unha mostra de cada especie, para poder coñecer o seu nome científico e o seu nome común, e elaboraremos na aula un pequeno libro da flora silvertre que alí nace e crece. 

Cando baixamos polo sendeiro, tivemos a sorte de ver ao pato macho que vive no río. E cando subimos buscamos a pata e aos seus patiños recén nacidos, e tivemos a gran sorpresa de atopalos e poder gozar da súa presencia. Ademais pudimos observar unhas libélulas azuis que viven tamén alí, tamén chamadas comunmente "cabaliños do demo".

Ao chegar a praia da Banda do Río, despois de repoñer forzas co almorzo, o alumnado despregou a seu maxín e creatividade, para a elaboración de arte efémero, utilizando area, cunchas, rochas, paus, e outros materiais naturais que atoparon, para crear as súas propias obras de arte. E para conmemorar o 50 aniversario do colexio, non puideron faltar os diferentes Papirus que fixeron por grupos, traballando en equipo e colaborando, para conseguir os resultados tan marabillosos, que podedes ver no seguinte video.

Pasamos un día de aprendizaxe diferente e xenial!!!

Para seguir coa conmemoración do DÍA DAS LETRAS GALEGAS e co gallo da celebración do 50 ANIVERSARIO DO CEIP A PEDRA, o pasado xoves 19 de maio, tivemos a grandísima sorte de recibir no noso colexio a visita de Lucía Novas, poetisa bueuesa, que non voltara ao centro, dende que cursou aquí a educación primaria.

Estívonos contando moitísimas cousas de como ela lembraba o seu paso polo cole, o que cambiara. Respondeu ás preguntas do alumnado de 4º A e B, que con entusiasmo prepararon, para averiguar máis sobre a súa experiencia e os seus anos de infancia.

Logo a rapazada tamén lle fixo preguntas sobre a súa obra, que ela respondeu moi amable e risueña. Falounos dos catro libros que ten publicados: "Neve", "Epiderme de Estío", "Cervatos" e "Violetas no asfalto", que recollen poemas moi fermosos, e tivemos a sorte de poder escoitar algúns da súa boca, como agasallo a esta visita tan fantástica.

Foi xenial compartir un mesmo espazo con alguén que xa o fixo hai algúns anos, e relembrar momentos estupendos vividos no lugar onde agora están a desenvolver a súa aprendizaxe as novas xaracións. Sairá de aquí algún poeta ou algunha poetisa? Quen sabe! Tempo ao tempo.

Grazas por todo Lucía Novas, e grazas á nosa rapazada de 4º pola súa activa participación neste rato tan agradable que pasamos.

Canto temos que agradecerlle a Arturo! A admiración por este gran mestre é infinda! Aparte de ser unha enciclopedia andante é unha belísima persoa, sempre disposto a axudar e a acudir ás nosas demandas.

Este martes, 3 de maio, o alumnado de cuarto, tivemos a sorte de saír pola nosa vila, baixo a súa batuta. O obxectivo era observar os ecosistemas de río e costa (perfecto para o último proxecto deste curso), visitar algún lavadoiro ou fonte ( colofón ao proxecto da auga do trimestre anterior) e coñecer parte da historia de Bueu.

Antes no cole díxonos que íamos ir por lugares que, aínda que xa coñeciamos, iamos ver, oír e incluso ulir sensacións que antes non apreciaramos.

Empezamos por percorrer a beira do río Bispo. Observamos cal era a vexetación da contorna e falamos da fauna. Escoitamos algún merlo cantar.

Despois andamos pola vila, lavadoiros , xardíns, salga do museo Massó …

Chegamos ás praias, primeiro a de Petis, logo a de Loureiro, onde merendamos; e rematamos na de Agrelo. Observamos as algas, as rochas, caranguexos, caramuxos, gaivotas, lapas, …

Neste vídeo poderedes ver imaxes deste día tan entretido e instrutivo.

MILLÓNS DE GRAZAS ARTURO

O alumnado de 4º celebramos  O DÍA DO LIBRO recibindo a vista de Sabela Núñez Singala, autora de O AGASALLO DE ANYA.

Tiñamos moitas ganas de coñecela porque o libro, non só nos gustou, nos REQUETEENCANTOU.

O máis importante é que nos fíxo reflexionar, e que rabuñou nas  nosas entrañas ao comprobar que a vida de moitxs nenxs é moi difícil e que nós temos, moitísima sorte de vivir onde vivimos.

O agasallo de Anya  trata da vida dunha nena de UCRANIA. Cando lle pedimos este libro aos Reis Magos, non sabiamos que ía a haber unha guerra, pero pouco antes de comezalo a lelo estalou, así que a nosa motivación foi aínda maior.

Sabela contounos que escribiu este libro porque ela estivo alí, xa hai 10 anos e que coñeceu á rapazada que vivía nos orfanatos e que comprobou que a pesar de faltarlle moitas cousas que nós temos, eran felices.

Agora está moi preocupada por esta maldita guerra que están sufrindo.

Sabela contestou a todas as nosas preguntas e asinou e dedicou os nosos exemplares do libro.

Ao final agasallámola co lapiseiro do 50 aniversario.

Se pinchades aquí para ver o que Sabela publicou no seu blog, desta visita ao noso cole.

No seguinte vídeo poderedes ver imaxes desta visita.