Mulleres Senlleiras: referentes de Igualdade
O noso centro participou no programa “Nin+ nin-, iguais” da Secretaría Xeral de Igualdade. A actividade foi organizada polo Departamento de Orientación.
Desde mediados de xaneiro puido verse no primeiro andar unha exposición adicada a Mulleres Senlleiras da cultura galega, con carreiras destacadas en todos os campos do saber e do coñecemento:
Ademais desta interesante exposición, o pasado 20 de xaneiro o alumnado de 4º da ESO tivo o privilexio de recibir a visita da catedrática de Farmacia da USC María José Alonso Fernández, Premio María Josefa Wonenburguer 2013, para escoitala falar sobre a súa experiencia como muller no eido académico e científico.
Día da Internet Segura: obradoiros de Ciberseguridade
Polo 20º aniversario do Día da Internet Segura, o Instituto Nacional de Ciberseguridade (INCIBE) ofreceu varios obradoiros para o alumnado dos centros educativos, co obxectivo de promover o uso seguro dos dispositivos e da tecnoloxía entre os estudantes menores e a súa contorna.
O IES Monte da Vila participou o día 7 de febreiro no obradoiro “Aprendendo a configurar o noso dispositivo”. Trátase dun obradoiro en liña, a través da plataforma ZOOM. A relatora foi Rosa Liarte, profesora de Xeografía e Historia da Junta de Andalucía. Organizou a actividade o Departamento de Informática.
Foi un obradoiro interactivo sobre ciberseguridade no que o alumnado de 1º e 2º SMR coñeceu boas prácticas básicas sobre o uso de internet: utilización de contrasinais fortes e seguras, riscos das redes sociais (suplantación de identidade, ciberacoso, fraudes, contidos inapropiados, etc.), precaución á hora de conectarse a redes públicas (xa que estas non teñen as mesmas garantías de seguridade que as redes privadas), importancia do acceso a internet cos equipos e aplicación empre actualizados para contrarrestar as ciberameazas, etc.
Dentro do obradoiro levouse a cabo unha actividade práctica a realizar individualmente por parte de cada alumno/a, e unha dinámica gamificada con todas as persoas participantes (Kahoot!).
Ademais, o INCIBE facilitounos os seguintes recursos de interese para toda a comunidade educativa:
- Un repositorio web de xogos educativos
- Un catálogo de recursos para un internet seguro para menores
- O teléfono 017 para recibir axuda e poder denunciar calquera incidencia ocorrida en internet
Primeiros auxilios para o alumnado de SMR (FOL)
O 1 de febreiro o alumnado do 1º curso de SMR ampliou os contidos vistos na materia de Formación e Orientación Laboral (FOL) cun cursiño de primeiros auxilios impartido polo Servizo de Emerxencias do Grove. Organizou a actividade o Departamento de Informática.
En primeiro lugar, o alumnado escoitou atentamente as indicacións sobre maniobras de seguridade, a posición lateral de seguridade e os principios básicos dos primeiros auxilios.
Despois pasaron á parte práctica, con oito bonecos facilitados polo persoal do Servizo de Emerxencias do Grove: reanimación caridiopulmonar (RCP), asfixia, posturas de seguridade...
Desde aquí o noso agradecemento ao Servizo de Emerxencias do Grove, polo seu labor imprescindible.
Na defensa dos Dereitos Humanos
No mes de decembro comezamos unha actividade en colaboración coa Rede de Escolas de Amnistía Internacional, a ONG independente que se centra na loita pola xustiza global e na defensa dos Dereitos Humanos.
Para conmemorar o 10 de decembro, Día Internacional dos Dereitos Humanos, expuxéronse no noso centro unha serie de carteis nos que se podían ler os 30 artigos da Declaración Universal dos Dereitos Humanos, redactada en 1948:
Ademais, durante o mes de xaneiro o Departamento de Francés e o alumnado de 1º Bacharelato participaron na campaña "Agasalla as túas palabras". Esta consiste en enviar a través de Amnistía Internacional (Vigo) unha serie de postais con mensaxes de apoio a persoas que foron encarceradas en diferentes países do mundo por expresar pacificamente as súas ideas.
Unha maneira de concienciarse sobre os dereitos humanos, facendo un xesto solidario e poñendo en práctica as competencias lingüísticas en francés, inglés, castelán e mesmo árabe.
Parabéns ao alumnado e profesorado participante pola fermosa iniciativa!
Charlas da Facultade de Telecomunicacións (UVIGO)
O Departamento de Informática, en colaboración coa Factultade de Telecomunicacións da Universidade de Vigo, organizou dúas charlas dirixidas ao alumnado do ciclo de Sistemas Microinformáticos e Redes (SMR).
O 17 de xaneiro o Dr. José Carlos López Ardao impartiu a charla "Érase unha vez internet...". Nesta charla fíxose un percorrido pola historia de internet ata hoxe, intentando explicar dunha maneira sinxela o seu funcionamento e o de moitas tecnoloxías que resultan familiares para a mocidade (ciberseguridade, bitcoins, internet das cousas, móbiles ,intelixencia artificial, big data, etc.). Todo isto acompañado de anécdotas que sacaron algún que outro sorriso.
O 25 de xaneiro foi o turno da Dra. Cristina López Bravo, que falou co alumnado sobre "Seguridade en dispositivos móbiles". O alumnado de 1º SMR e 2º SMR disfrutou da charla no salón multiusos, participando en todo momento dos contidos e experiencia da relatora. En primeiro lugar, analizáronse cales son as principais vulnerabilidades (a través de exemplos reais) que afectan aos dispositivos móbiles, para despois expoñer as medidas adoptadas para mitigalas e conseguir así dispositivos máis seguros. As medidas van desde a correcta configuración dos equipos ata a concienciación dos usuarios/as, pasando polo deseño e a programación de aplicacións seguras.
Momentos estelares da Ciencia
O 21 de decembro, xusto antes das vacacións de Nadal, tivemos a sorte de que David Ballesteros viñera ao noso instituto, convidado polo Departamento de Física e Química.
O encontro titulouse “Momentos estelares da Ciencia”. Foi unha charla interactiva cun enfoque de show de ciencia, na que o alumnado de 2º e 3º ESO tivo a oportunidade de poñer en práctica de inmediato o que se lle ía explicando.
Deste xeito ameno e entretido, o divulgador presentoulles aos rapaces e rapazas a evolución do pensamento científico ao longo da historia, para animalos de seguido a participar en diferentes experiencias científicas.
Sen dúbida, a maneira máis divertida de espertar a curiosidade e descubrir a ciencia da vida cotiá.
Ao alumnado arrepiáronselle os pelos... pola electricidade estática:
Por fin foi posible saber quen estaba concentrado (e quen non):
as ondas Beta non minten!
A xornada tamén deu para descargar un condensador e aprender que somos bos condutores eléctricos... gracias a un calambrazo colectivo:
Por último, comprobáronse en directo os efectos da forza segundo a superficie:
Visita ao Centro Supercomputacional de Galicia (CESGA)
O 20 de xaneiro o alumnado de 2º SMR visitou as instalacións do Centro Computacional de Galicia (CESGA), situado en Santiago de Compostela. A actividade foi organizada polo Departamento de Informática.
Trátase dunha institución sen ánimo de lucro pertencente á Xunta de Galicia e ao CSIC. A Fundación CESGA nace do compromiso da Xunta coa promoción de servizos comúns de apoio ás tarefas de investigación e promoción de Galicia, e traballa nas áreas de cálculo intensivo e comunicacións e servizos avanzados na sociedade da información e o coñecemento (Meteogalicia, produción de películas de animación, servizos médicos, etc.).
In situ, puidemos ver as instalacións do Centro de proceso de datos (corredores fríos, corredores quentes, control de acceso...), os superordenadores FINISTERRAE 2 e FINISTERRAE 3 (brazo mecánico que move os discos onde queremos ler ou escribir información), as medidas de seguridade que alí se levan a cabo, a refrixeración, extinción de incendios, xeración de corrente, o museo con partes do primeiro ordenador e a máquina “Millionnaire” (empregada polos bancos para contar e sumar), entre outras moitas cousas.
Foi unha experiencia moi positiva para o alumnado. Este puido comprobar en primeira persoa os contidos estudados nas aulas dentro do tema de Seguridade Informática. A visita durou unha hora e media.
Ao sair do CESGA, realizamos unha visita ao IES San Clemente (centro no que se imparten o Ciclo Medio e Superior de Informática), e pasear polas rúas da zona vella, a alameda e a Catedral de Santiago de Compostela. Unha xornada moi completa!
Conferencia "As neuronas que van fuxir, saúdanvos" (pantallas e saúde mental)
O pasado 16 de decembro o alumnado de 1º do ciclo SMR e 1º e 2º de FPB tivo a oportunidade de escoitar a Manuel Isorna Folgar, doutor en Psicoloxía e especialista en condutas adictivas. A actividade foi organizada polo Departamento de Informática.
Desde Lugo, Afundación transmitiu por streaming a charla “AS NEURONAS QUE VAN FUXIR, SAÚDANVOS” impartida por MANUEL ISORNA, premio Raíña Sofía polo seu labor na concienciación e intervención na drogodependencia. A súa charla ofreceu unha aproximación moi necesaria e útil sobre a relación das pantallas coa saúde mental da adolescencia.
O alumnado visualizou a charla dende a biblioteca do centro, participando en todo momento dos contidos e experiencia do relator.
Visita ao Instituto de Investigación Biomédica da Coruña (INIBIC)
O pasado 14 de decembro, o alumnado da materia de Bioloxía de 2º de Barcharelato visitou as instalacións do INIBIC, un centro composto polos grupos de investigación do Hospital, a Universidade e a Área de Atención Primaria da Coruña.
Así describe o propio alumnado a súa experiencia no INIBIC:
A nosa visita ao Instituto de investigación biomédica foi unha experiencia única. Grazas á impecable atención por parte de Juan Pérez Longueira, desfrutamos de interesantes actividades formativas dirixidas por Ignacio Rego, Valentina Calamia, Rocío Paz, Beatriz Carames Pérez e María Gloria Alfonsín. Todos eles son excelentes profesionais que nos explicaron o funcionamento de diferentes prácticas no laboratorio. Visitamos o departamento de proteómica, o de cultivo celular e o de xenómica. Concretamente no apartado de proteómica, nos ensinaron diferentes métodos de como realizan a electroforese que nos axudou a poñer en práctica a teoría estudiada en bioloxía no apartado das diferentes técnicas de separación de moléculas. Toda a información recollida alí nos pareceu tan interesante que provocou que moitos nos decidíramos a optar polo estudo das ciencias da saúde. Tamén engadir que tivemos a oportunidade de acudir a un edificio de preparación para os médicos recén saídos da súa carreira ou aqueles que están case retirados, para preparalos para todo tipo de cirurxías ou para ensinar novas técnicas que saíron recentemente. Todos estes profesionais están moi centrados en atopar a resposta e a orixe de distintas enfermidades e condicións que cada vez afectan a máis persoas, así como a artrite ou diferentes tipos de cancro. Encantounos e pareceunos unha idea xenial para ter así uns médicos incribles. Estamos moi agradecidos e agradecidas pola súa acollida, e esperamos que sigan co asombroso traballo que levan a cabo! |
PROBAS FÍSICAS PARA O ACCESO AO GRAO EN CIENCIAS DA ACTIVIDADE FÍSICA E DO DEPORTE
Probas físicas de acceso á titulación Grao en Ciencias da Actividade Física e do Deporte do curso académico 2023-2024, e que se imparte na Facultade de Ciencias do Deporte e a Educación Física na Universidade da Coruña: https://inefg.udc.es/index.php/pruebas-especificas-de-acceso/ultimas-noticias-sobre-las-pruebas-de-acceso
Máis información en e-mail: administracion.inef@udc.es - Teléfono 881 014 046
- « primeira
- ‹ anterior
- …
- 9
- 10
- 11
- 12
- 13
- 14
- 15
- 16
- 17
- …
- seguinte ›
- última »
![IES Monte da Vila RSS Distribuir contido](/centros/iesmontevila/misc/feed.png)