Grazas aos proxectos de mobilidade Erasmus+, tres profesores do IES David Buján participamos nunha estadía profesional no Theresien-Gymnasiun na vila de Ansbach (Alemaña) durante a semana do 17 ao 21 de xuño. Aniana Díaz, César Docanto e Marta Mosquera asistimos ás clases bilingües que ofrece este centro así como ás clases de español, que é unha lingua cada vez máis popular nos centros educativos alemáns.
O profesor Martin Stiegler, que xa estivera observando as nosas clases no ano 2022, recibiunos e acolleunos moi calorosamente, organizounos o horario de clase e permitiunos participar en actividades extraescolares únicas, como o proxecto Aqua-Terra, de conservación da natureza, e un proxecto de apicultura onde o alumnado coida e mantén unha colmea para despois elaborar o seu propio mel.
A estadía non puido ser máis frutífera e pode ser o xerme dunha futura colaboración para mobilidade de alumnado no marco dos proxectos Erasmus. Moitas grazas a Martin e a todo o profesorado e alumnado do centro que nos acolleu nas súas aulas.