IES Castelao

Xa temos nome e logo para a nosa radio escolar!

RADIOLAO

O 10 de xuño de 2024 foi un día ben especial no IES Castelao. Paula Carballeira visitou o noso centro. E aínda que non era a primeira vez, de seguro, que desta volta non foi coma as anteriores. 

Pola mañá atendeu o alumnado de 1º de Bacharelato e mais do Club de lectura A pé de obra, que leu a súa obra As alumnas, último Premio Nacional de Teatro. Confesoulles como construíu a obra tras unha encomenda da compañía de teatro onde traballa. Nótase que é unha das mellores contacontos galegas, pois mantivo a súa atención en todo momento. Afondou na historia real que agocha a trama e no importante que é para ela representar este texto. Ao finalizar a sesión, un grupo de alumnas entrevistaron a Paula para a revista do IES, que moi pronto poderedes ler. 

Álbum: Curso 2023/2024 -> Encontro con Paula Carballeira

Laura Bugalho visitounos o 7 de xuño, como complemento ás actividades de xuño, mes para celebrar a diversidade LGTBIQ+. Para iso, Laura, activista social, veu falar do seu documental Asuntos internos. Acompañada da nosa profesora Carme Nogueira e da deseñadora de arte gráfica Uqui Permui construíron un interesante coloquio onde afondaron en temas como o feminismo, a identidade, a transfobia, a aceptación... 

O alumnado de 1º de bacharelato ficou sorprendido con este relato tan persoal do que seguro tiraron proveito. 

Álbum: Curso 2023/2024 -> Visita de Laura Bugalho

Os nosos alumnos Alicia de 3°C e Iago de 3°B xa están preparados para comezar mañá luns a estancia en prácticas que realizarán no grupo de fotobioloxía e toxinoloxía do IIM
Estamos seguros de que o pasarán en grande e será un haexperiencia do máis enriquecedora!

O alumnado de 1º da ESO visitou o Centro arqueolóxico Salinae, a única salina romana convertida en museo.

O pasado xoves 6 de xuño tivemos unha visita sorpresa no IES Castalao.

Álbum: Curso 2023/2024 -> Visita sorpresa de alumnas estadunidenses

Con motivo do Día dos océanos, 8 de xuño, o alumnado de 4º ESO e 1º Bach visitaron a praia de Panxón para realizar a tradicional saída intermareal.
Acompañados polo profesorado de Bioloxía, identificaron especies, observaron a subida e baixada das mareas, e analizaron as augas.

Toda unha experiencia para poñer en práctica o aprendido durante o curso!

Álbum: Curso 2023/2024 -> Visita intermareal á praia de Panxón

A semana pasada tivo lugar o derradeiro encontro do club de lectura escolar ‘A pé de obra’ para comentar a novela Noite de voraces sombras de Agustín Fernández Paz.

Sen dúbida algunha, non puido ter mellor peche. Este libro entusiasmou a rapazada. Unha boa maioría reflexiounou sobre o trasfondo da historia, chegando a interesarse por indagar no pasado da illa de San Simón; foron quen de establecer analoxías cos conflitos bélicos actuais e a decatarse de que sempre cometemos os mesmos erros.

O alumnado de 4º da ESO das materias de Latín  e Cultura Clásica sumouse ao proxecto da Biblioteca Ramiro Fonte "Escribir con arte". Estudiaran fitos da historia de Roma e contáronos a través de cadros dos ss. XVII a XIX e agora, logo de estudiaren a familia romana, escribiron para acompañar as imaxes de lenzos do século XIX. Sen dúbida, toda unha actualización que permite conectar épocas a través de visións mozas.  

Álbum: Curso 2023/2024 -> Escribir con arte (alumnado de latín)

O luns 3 de xuño foi un día memorable! O alumnado dos centros adscritos, que cursará 1º da ESO o vindeiro curso, visitou por primeira vez o seu futuro IES. 

Todo estaba aquelado para que fose unha xornada na que non faltou de nada. Tan pronto entraron nas instalacións, foron recibidos polo alumnado de 1º de Bacharelato, quen os agasallou cun baile e material didáctico. A seguir, dirixíronse ata o salón de actos; lugar onde o Equipo Directivo lles deu a benvida e lles explicou as normas do centro e os proxectos que se levan a cabo. Ademais animounos a coller folgos durante o verán para comezar con ansia. 

Álbum: Curso 2023/2024 -> Visita de Centros adscritos