IES Castelao

O luns estreamos o club de lectura cunha invitada moi especial SARA VILA ALONSO coa súa obra “O incendio”.  Unha obra que non deixou a ninguén indiferente. Grazas pola visita Sara e parabéns polo bo traballo!

O pasado venres 15 de novembro o alumnado da materia de Lingua Portuguesa tivo a súa primeira saída. Visitaron a sede do Camões. O Centro Cultural Português en Vigo. A visita consistiu na asistencia ao obradoiro de banda deseñada impartido por João Mascarenhas. O debuxante e guionista falounos do proceso de creación da banda deseñada: Perigoso pacifista, que mostra a vida e traxectoria do cantautor português Adriano Correia de Oliveira, un dos "cantores do 25 de abril". Despois da súa exposición houbo unha conversa amena onde o alumnado puido facerlle varias preguntas.Esta actividade estaba incluída nos eventos da Festa do Livro Português (FLIPO) do venres 15 e sábado 16 de novembro.

          O luns día 18 de novembro tivemos o privilexio de contar no centro coa presenza deste grupo de teatro de Soutomaior, que vén desenvolvendo a súa actividade desde hai 25 anos. Á súa fronte, Salvador Álvarez Ledesma, que dirixiu este noso instituto entre os anos 1987 e 2001. Xa daquela organizaba aquí unha intensa actividade teatral pois o Grupo de Teatro "Castelao" puxo en escena  por aquela época obras como O Cantar dos Cantares e Farsa de Micomicón e Adhelala de Eduardo Blanco Amor, La señorita Elvira de Lauro Olmo, La venganza de la Petra, de Carlos Arniches, Os casados de pouco de Manuel Varela Buxán, A importancia de chamarse Ernesto de Oscar Wilde, O achado do castro de Manuel Núñez Singala...

          Este luns presentaron diante do alumnado e algúns antigos membros do claustro A pequena cabana, do comediógrafo francés André Roussin (1911-1987), que foi membro da Academia da Lingua Francesa. Esta obra conta con varias adaptacións cinematográficas, a primeira do ano 1957, protagonizada por Ava Gardner e David Niven.

          A pequena cabana escenifica o naufraxio dun barco e a permanencia nunha illa deserta dunha terna de personaxes que dá pé a unha  reflexión sobre a poligamia, as diferenzas sociais, a capacidade de supervivencia...  salferida de momentos cómicos. 

          Unha tarde de teatro amena e de reencontros cordiais!

Hoxe o noso alumnado de 4º da ESO asistiu a charla “Pegada Dixital” na que se reforzou a competencia básica do alumnado na xestión segura dos seus perfís nas redes sociais ademais de falarlles sobre a identidade dixital e a importancia da pegada dixital. Tamén afondaron na configuración das opcións de seguridade e privacidade das redes sociais máis actuais e recursos aos que poder acudir cando teñan algunha dúbida sobre o uso seguro da tecnoloxía.

O departamento de Lingua Galega e Literatura do IES Castelao puxo en marcha hoxe a primeira dunha serie de actividades destinadas á celebración do Día das Letras 2025 dedicado ás Cantareiras. Con este horizonte visitounos a nosa querida ex-alumna Eva Fernández Prieto, licenciada en xornalismo que nos presentou a revista dixital de cultura tradicional Rebelico (que podedes seguir en diferentes plataformas na rede). Gustounos saber do seu activismo e compromiso inquebrantable coa cultura galega e agardamos que poidamos vela outra vez no ano 2025.

Visitounos hoxe o profesor, poeta e tradutor Moncho Iglesias. Quen foi hai uns anos profesor do noso centro deixounos unha boa mostra, grazas a un recital poético plurilingüe, da importancia que ten non ignorar a loita do pobo palestino por sobrevivir nun contexto como o actual no que sofre novos e lacerantes golpes. Grazas,  Moncho, pola túa visita e polo teu exemplo.

Hoxe venres 8 de novembro o alumnado do obradoiro de regueifas do centro, xunto a parte do alumnado de 1º ESO A e C acudiron ao V Certame Escolar Provincial de Regueifas organizado pola Asociación Oral e patrocinado pola Deputación de Pontevedra.

A sede foi unha vez máis o Centro Veciñal e Cultural  de Valadares, onde acudiron dez centros da provincia seleccionados entre todos os que participaron nos obradoiros de regueifa impartidos nos meses de outubro e novembro. Na primeira fase subiron nove alumnos e alumnas do noso centro a regueifar nas diferentes rondas. Na segunda fase, onde xa seleccionaron soamente a vinte regueifeiros e regueifas, pasou Mateo de 4 ESO.  

Foi unha xornada festiva onde todos e todas compartimos e ganhamos, parabéns polo bo traballo!