biblioteca
Mércores, 26 de maio, 2021.
Hoxe tivemos unha visita moi especial no noso CPI: Jorge Mira.
Pola mañá, o alumnado do club de ciencia de 6º B de EP, traballou o tamaño do Sistema Solar e construíu o noso Sistema Solar a escala no patio. Simulando o Sol cunha pelota de tenis e os planetas con canicas e pedriñas, o alumnado comprobou as distancias e os distintos tamaños relativos entre estes corpos celestes.
Pola tarde, mantivo unha charla co alumnado de 4º ESO, co título "Química no amor", e desvelou os segredos de como eliximos parella desde o punto de vista puramente científico.
A Voz da Mata non podía desaproveitar a oportunidade de entrevistar un persoeiro galego tan importante. Non perdades a súa entrevista a cargo de Andrea, Manuel e Claudia (alumnado de 4º ESO) que podedes escoitar visitando a canle de IVOOX da Voz da Mata, a Aula Virtual do CPI, ou premendo AQUÍ. Nela descubriredes unha anécdota sobre o premio Nobel, John Nash, cal foi o labor de Jorge Mira no equipo de investigadores encargados da predición da evolución da COVID-19, consellos aos estudantes que rematan ESO e BAC, e moitas cousas máis.
Máis fotos das actividades:
Venres, 14 de maio, 2021.
Co gallo do 12 de Maio: Día Escolar das Matemáticas durante toda a semana o alumnado de primaria gozou duns obradoiros de matemáticas onde puideron achegarse a elas dunha maneira máis recreativa e lúdica.
Neles realizaron sudokus, figuras xeométricas, traballaron o cálculo e a orientación espacial, tiveron xogos de lóxica, construiron un metro cuadrado e un metro cúbico...
As actividades estiveron organizadas polo Equipo de Biblioteca Creativa e o Club de Ciencia.
No corredor de secundaria atoparedes o recuncho lector do Club de Ciencia con suxestións de libros e películas de temática científica (física, química, bioloxía, matemáticas...).
Este ano o lema é Matemáticas por un mundo mellor.
O equipo do club de ciencias en colaboración co equipo de biblioteca preparou unha escolma de lecturas e películas sobre as matemáticas que atoparedes en varios recunchos lectores do centro.
Gozade da lectura e das matemáticas.
Esta semana celébrase o 11F Día da Muller e da Nena na Ciencia, este ano o club de ciencia súmase a campaña #NoMoreMatildas.
Na páxina web #NoMoreMatildas atoparemos materiais para traballar co alumnado e tres libros nos que se presenta a hipotética vida do físico Albert Einstein, do médico Alexander Fleming e do físico Erwin Schrödinger sendo mulleres.
O club de ciencia, en colaboración co equipo de biblioteca, realizou unha escolma de libros relacionados con mulleres científicas, están situados no corredor de abaixo.
Hoxe tivemos o derradeiro obradoiro co gallo de Mes da Ciencia en Galego nas Bibliotecas, foi impartido por Digna, profesora de Física e Química na ESO.
Nel traballamos as estruturas balanceadoras empregando cortizas, pinzas e paus.
Hoxe tivemos o terceiro obradoiro co gallo do Mes da Ciencia impartido por Cintia, profesora do departamento de Matemáticas.
Aproveitando que o proxecto do centro deste ano é a moda, fixeron distintas pezas de roupa con papiroflexia.
Hoxe tivemos o segundo obradoiro, co gallo do Mes da Ciencia en Galego nas Bibliotecas, impartido pola profesora Patricia do departamento de Bioloxía no que traballamos a cromatografía.
Co gallo de Novembro. Mes da Ciencia en Galego nas Bibliotecas o Club de Ciencia colaborará co equipo da Biblioteca elaborando distintos obradoiros para acercar a ciencia ao alumnado do centro.
Hoxe tivemos o primeiro obradoiro da man de Digna, profesora de Física e Química, nel aprendemos a importancia de lavar as manas con auga e xabón así como o que ocorre cando lavamos unha máscara.
Desde o ano 2000, declarado pola UNESCO Ano Mundial das Matemáticas, instituíuse en España a celebración do día 12 de maio como Día Escolar das Matemáticas pola Federación Española de Sociedades de Profesores de Matemáticas (FESPM).
A data escollida para esta celebración coincide coa do nacemento do insigne matemático Pedro Puig Adam, quen naceu o 12 de maio de 1900 e foi o iniciador da didáctica das matemáticas en España.
A finais do mes de marzo, de non estarmos confinados, montariamos a Cúpula de Leonardo no centro, pero non foi posible... No seu lugar, invitamos o alumnado a montar na casa a Ponte Autoportante de Leonardo.
Imaxe de Core77
A devandita ponte está recollida nun dos seus códices, o Códice Atlanticus (nos folios 69r e 71v). Trátase dunha ponte "ideada tanto para perseguir como para fuxir do inimigo". O feito orixinal desta ponte lixeira en forma de arco é que non requiría cravos, parafusos, cordas nin ningún outro medio para permanecer ergueita. O propio peso dos seus elementos era responsable de mantelos unidos.
Con que material a queres construír? Escolle o que máis che preste!
Espaguetes cortados pola metade
Lapis
Paus de madeira
Pallas de bebidas ás que lles podes facer uns cortes
Calquera outro material que teñas pola casa
Os pasos que debes seguir son os seguintes:
Imaxe de Core77
Como sabedes o proxecto da biblioteca deste ano é “O Río Miño”, seremos capaces de levantar unha ponte que cruce o Miño e que una o concello do Rosal coa veciña Portugal?
Pontes feitas por @bblanc0
Animádevos a facelo! Convertédevos en enxeñeiros ou enxeñeiras por un día!!!
Mandade as vosas fotografías ao seguinte enderezo de correo electrónico
merceds.profe@gmail.com
