D

espois de varios aprazamentos por mor da chuvia, este mércores celebramos o Magosto, por pouco non o  fixemos cadrar co San Martiño. Ao longo da mañá as nenas e nenos de sexto curso estiveron de monitores de varios xogos populares: mariola, trompos, merro, zancos, carreiras de sacos, ra, chave,... O resto do alumnado de 1º a 5º formados en equipos foron rotando e gozando.

Mentras xogaban, outro grupo foi o encargado de asar as castañas. Rematamos a xornada coa degustación das castañas. Estaban boísimas.

Desde o centro queremos agradecer ás familias as súas aportacións de castañas e leña. 

Podedes ver tódalas fotos facendo clic na imaxe:

https://photos.app.goo.gl/TgghSbgBD4mBDY598

O equipazo de cociña do noso cole ensinoulle ao alumnado o proceso de elaboración dunha sobremesa con cabaza. 

A cabaza é un produto da horta moi propio da estación do ano na que nos atopamos.

Polo que os nenos e nenas puideron degustalo e non sabedes o rico que estaba!

Foi unha experiencia marabillosa!

E chegados ao último día deste curso non podía faltar o noso Festival de Fin de Curso. Nun día espléndido, nenas, nenos, mestras e mestres amosáronnos o seu lado máis artístico. 

O comezo foi algo accidentado porque os micrófonos empeñáronse en non funcionar e iso atrasou a hora en que estaba previsto empezar, pero todo ten arranxo. Este curso se cabe foi un pouco máis especial, pois despedíamos ao que foi o noso director durante 12 anos, Alfonso.

Pouco a pouco iremos colgando máis cousiñas, a medida que vaiamos finalizando a montaxe. Podedes ver as fotos do día premendo na imaxe.

Por fin estreamos a peli! Este curso, adicado ao cine, producimos varias películas no colexio.

Aquí vai o traballo realizado polo alumnado de 5º, como produto final da cooperativa "Flocos Tolos".

    Despois de unha semana de pánico, de malas previsións, de intentar cambiala(foi imposible, e menos mal...), de pedir a colexios e concello un acubillo por se a chuvia prevista era moita(todos estaban ocupados, seica,...), de abrir o día chovendo a mares;  finalmente pertrechados con seis carpas e os dedos cruzados saímos cara a Nigrán para facer a nosa saída de fin de curso.

   Pois chegamos a Nigrán con un sol espléndido que nos acompañou nesta longa xornada. Nenas e nenos recibiron unha longa clase de surf, da que desfrutaron ata os máis reticentes, fixeron andainas, e, sobre todo, xogaron e xogaron sen parar, na area e na auga. En fin, un día redondo!!!

Se queredes ver imaxes da xornada, premede na foto.

Día de Entroido! ... e... tamén día de chuvia, así que houbo que facer un plan B. Este ano tivemos uns disfraces de cine: "Harry Potter", "Familia Adams", "Up", "O pequeno vampiro", superheroes e "A guerra das galaxias".

Fixemos as tradicionais fotos de grupo e despois desfilamos, recitamos as coplas de Entroido e bailamos no ximnasio. Pasámolo moi ben, con chuvia e todo. Para ver tódalas fotos, preme na imaxe.

 Este ano o CEP Pedro Caselles Beltrán celebrou o seu acto pola paz coa visualización dun vídeo. Neste vídeo-manifesto pola paz intervén a totalidade do alumnado e profesorado do centro.

Neste curso retomaremos a distribución de froita e leite  no recreo,  polo programa do FOGGA no que estamos inscritos.

Comezaremos coa froita e o leite o día 15 de xaneiro.

Froita:

Nos días indicados distribuirase a froita que se indica (agás que por circunstancias de distribución teñamos que modificar).

Facilitarase unha ración a cada alumno/a no tempo de recreo ou en momentos previos.

Leite:

Comezaremos o mesmo día 15 e distribuirase durante catro semanas (ata o 9 de febreiro). Daráselles leite enteiro de calidade (leite galego).  Haberá leite sen lactosa para o alumnado con certificación médica de intolerancia.

Para iso precisamos que os vosos fillos e fillas traian ao colexio unha taza ou vaso, que utilizará cada día no consumo deste leite.

O programa está enmarcado  nas directrices sanitarias do fomento dunha correcta alimentación, tan importante para o crecemento san do noso alumnado, e supón un esforzo que temos que compartir mestres/as e pais/nais para consolidar bos hábitos alimentarios que perdurarán na súa vida. 

Está financiado con fondos europeos, polo que resultará gratuito para as familias.

Como outros anos, haberá un segundo período de distribución no mes de abril.

Este curso temos como proxecto de centro o cine, e que mellor forma de traballalo que ir ao cinema.

As nenas e nenos do CEP Pedro Caselles foron todos a Vigo a ver unha película nun cine de verdade, con "palomitas" e todo. Portáronse e pasárono xenial!

Para rematar a xornada fixemos un percorrido polas rúas da cidade, as luces estaban apagadas porque era de día pero gozamos inmenso da decoración de Nadal. Para ver tódalas fotos, preme na imaxe.

No Caselles celebramos o Samáin ao grande. Primeiro fixemos un gran mural no que colaboramos todos. E alí diante do mural fixemos a nosa exposición de terroríficas cabazas que nenas e nenos trouxeron da súas casas. E, como remate o día 31 case todo o alumnado acudiu ao centro con terroríficos disfraces.

Na nosa biblioteca tamén se uniron a festa cun concurso de debuxos monstruosos e relatos de medo. O 31 xuntámonos todos para a entrega de premios. 

Preme AQUÍ para ver máis imaxes