Articles

"Tangram Gato" chegounos na maleta de Biblioteca Creativa dende a Asesoría de Bibliotecas Escolares. Cun chisco de imaxinación convertémonos en narradores de historias dándolle vida a distintos personaxes creados coas sete pezas  xogo do Tangram.

Na clase montamos láminas para kamishibai con material de refugallo, e recortamos as pezas do Tangram que tinguimos de diferentes cores naturais para que outros nenos e nenas inventen historias.

Para conseguir a pintura ecolóxica caseira, empregamos diferentes hortalizas espinacas, cenorias,  col lombarda e tamén té. Botámolas uns minutos en auga quente e logo coamos a mestura. O líquido resultante mestúrase con azucre moído e obtemos  un tinte natural de cores vistosas. 

PINBALL DO COLE DO FUTURO

Estamos moi felices porque o noso proxecto do Cole do Futuro resultou gañador no 

                 Concurso O SuperReto DigiCraft.

O alumnado de 6º realizou esta divertida e tecnolóxica aventura con gran entusiamo: deseñaron e crearon, con materiais de reciclaxe, un PINBALL interactivo con diferentes PINs que mostraban as propostas para o cole do futuro. Logo programaron en Scratch e coa Placa Makey Makey o xogo.

Estas son as ideas e propostas que queren no cole do futuro:

1 Un centro autosuficiente enerxéticamente

2  Dispoñer de  gafas de Realidade Virtual e hologramas para poder comprender conceptos, viaxar ao espazo, mergullarse polo mar,  ver museos...

3  Empregar a robótica, a maquetación, o deseño e a impresión en 3D para prepararnos para as profesións do futuro

4 Dispor de equipos informáticos eficientes e cunha boa conectividade nas aulas.

5 Un cole no que poder divertirse e compartir xogos.

No Pinball tamén incluímos 2 códigos QR: Que se priorice a experimentación sobre a instrución e a memorización e, que se poña en valor a nosa lingua,  cultura e tradicións. 

Neste vídeo mostramos todo o proceso

Entrega de premios SuperReto Digicraft 2021 - A partir do minuto 48 

Pins de Rosalía en 3D

1- O alumnado completou o retrato de Rosalía e pintouno con diferentes técnicas e estilos.

2- Imprimimos en 3D un pin de Rosalía para cada clase e tamén 3 mouchos.

3- Pintamos as Rosalías con pintura acrílica.

4- Os mouchos pintámolos con rotulador permanente.

5- En cada clase votouse polo mellor debuxo.

6- As caras escollidas pegámolas no Pin de Rosalía.

Biblioteca Creativa, ENDL e AAEE

Guía rápida para pasar imaxe 2D a 3D

Imos de ruada cos escornabots 

Durante a semana de Entroido,  estivemos percorrendo a provincia cos escornabots e cos personaxes típicos de cada vila.

Co libro guía  "Os Bolechas, o Entroido ourensán 2021" e con este xogo aprendemos a recoñecer cada máscara, traxe e tradición á vez que mantemos vivo o espírito desta entrañable festa nestas datas tan excepcionais. 

Material para xogar: un taboleiro co mapa de ourense, máscaras, escornabots e o libro dos Bolechas.

Biblioteca creativa

OBRADOIROS:

Arte

O alumnado de 3º participou nun Taller de robótica básica. De cando o pincel e o lapis se enfadaron e non quixeron compartir cadro.

Trala audición e comentario do conto, construíron robots con distintos tipos de pincel cos que pintaron un cadro.

Natureza

Nas clases de 4º, 5º e 6º  realizouse un Taller de electrónica básica e programación con microbit: Programando o Universo.

Actividade impartida polo Servizo Educativo de Afundación. Contamos con dous monitores que viñeron ao centro a sumar coñecementos de Arte e Natureza a través da tecnoloxía.

Estas actividades realizáronse con todas as medidas de seguridade pertinentes fronte a COVID-19