Hoxe rematamos o segundo trimestre e non queremos facelo sen agradecer unha vez máis o apoio e colaboración de todos vós. Foi un trimestre duro, cun importante incremento de casos positivos no centro. Pero aínda así todo o mundo estivo á altura dando o mellor de si, colaborando e facendo que os nosos nenos e nenas non perdan o seu sorriso. Por iso, temos que seguir esforzándonos para que os nosos cativos e cativas sigan medrando seguros e felices. Lembrade extremar as precaucións nestes días de vacacións, para evitar un incremento de casos tal e como pasou despois do Nadal. Vémonos de novo o martes, 6 de abril.
O arco da vella gusta de lucir no noso colexio e acollernos nunha aperta, como se fósemos, cada un de nós, esa pinga de auga na que a luz branca se descompón nesas fermosas cores, que sempre veñen na compaña das risas das nenas e nenos.
ESPERANZA
Este curso, desde o primeiro día, e por moitas razóns que todas coñecemos, era o da esperanza. Ese sentimento que nos fai crer que aquilo que desexamos pode acadarse.
VONTADE DE TRABALLO
Mais, o desexo, sen vontade de traballo, sen tecer redes de complicidade entre toda a comunidade educativa, quedaría nunha palabra baleira, sen contido.
PRIORIDADE: O ALUMNADO
Esperanza de que todo o organizado saíse ben, de procurar o menor número de contaxios, mais por riba de todo, que o noso alumnado gozase da aprendizaxe e do encontro cos seus compañeiros e compañeiras, malia que as limitacións eran e son moitas.
ILUSIÓN
Estamos na metade do curso e seguimos mantendo a ilusión. O noso estímulo sodes vós. As nenas e nenos, as familias, que respondedes co voso apoio cada día. O persoal non docente: Mariel, Mercedes, María, Estrella, Azucena, Xulio e María Jesus; a ANPA e o persoal do comedor, grande o traballo que están a facer.
Moitas grazas a todas!
O arco da vella seguirá acolléndonos como pingas de auga cheas de ilusión, de forza e celebrando ese son do noso colexio que deixamos aquí para vós.
Porque, como escribiu a poeta á que se lle dedican este ano as Letras Galegas, Xela Arias:
Vencerse é cousa de se tratar.
Unha grande e agradecida aperta de todo o claustro do CEIP Raquel Camacho.
