Ao longo deste trimestre dentro do PDI de ciencia estamos investigando e descubrindo moitas cousas sobre a luz. Grazas aos experimentos que realizamos e as pesquisas feitas demos resposta a moitas dúbidas e preguntas que nos foron xurdindo no día a día e que nos axudaron a comprobar se as hipóteses formuladas eran certas ou non.

Pouquiño a pouquiño pois descubrimos como se proxecta a luz, como se poden clasificar os corpos atendendo a se deixan ou non pasar a luz, coñecemos distintas fontes de luz e clasificámolas en naturais ou artificiais. Tamén experimentamos e xogamos coa nosa sombra e a de distintos obxectos, representamos o día e a noite cunha lanterna a modo de sol e a terra, o cal nos levou a comprobar que a noite e o día non se dan ao mesmo tempo en todos os lugares do noso planeta. Co derradeiro experimento que fixemos logramos que aparecese un arco da vella dentro da clase; non daban crédito a tal suceso. E isto levounos ao punto no que nos atopamos agora, a descomposición da luz en cores e a Isaac Newton.

Ademais tivemos a grande sorte  de poder contar en toda esta aventura coa participación de dous familiares; o pai de Leo que nos trouxo á aula un circuíto eléctrico moi chulo e a nai de Andrea coa que fixemos unha actividade que tamén lles gustou moito e coa que descubriron que a luz tamén pode crearse por medio de reaccións químicas.

No seguinte vídeo deixámosvos unha pequena mostra do noso día a día coa luz.

Néstor, Cristina, Montse e Ana foron os familiares das nenas e nenos da nosa aula que este venres participaron no taller de “Mates en familia” .

Organizados en catro equipos de traballo (cada un deles dinamizado por un familiar) realizamos as seguintes propostas:

-     

Xogo de conteo coa baralla.

-     

Actividade con Doc no panel de ciencia.

-     

Modelado de números en plastilina.

-     

Creación nos xeoplanos de distintas figuras e formas.

Grazas pola vosa participación familias!

Este mércores foi o noso día de biblioteca.

Gústanos moito ir a ela e desfrutar de todos os recursos que nos ofrece nos distintos recantos que atopamos nela.

Este curso as nenas e nenos ademais son as encargadas e encargados de rexistrar no ordenador da biblioteca os libros que collemos para levar á casa.

Iniciamos novo curso e con el arrancamos unha nova modalidade da Maleta protagonista; pois trátase dunha estupenda dinámica de cohesión de grupo que favorece a interrelación, o coñecemento mútuo e a distensión dentro do mesmo.

Aínda que a miúdo pensamos que nos coñecemos, é curioso como ao realizar esta actividade xurden aspectos da personalidade, afeccións, intereses… que non se coñecían e que, suscitan ás veces, novas afeccións entre os/as  alumnos/as.

Este ano a maleta viaxa as casas de cada nena e neno da aula para voltar ao cole co  seu ALMBUN PERSONALIZADO DO VERÁN; un álbum que realizan en familia con fotografías de cousas que fixeron durante o tempo de vacacións, sitios que visitaron, practicando algún hobbie ou deporte, desfrutando en familia,…

Todas as semanas estamos desexando que chegue o momento de abrila e a compañeira ou compañeiro protagonista nolo amose e comparta con nós todas as anécdotas e historias que esas fotos recollen.

Roi, Andrea, Nicole, Marco e Jose foron os compis que xa nos presentaron os seus álbums. Parabéns polo traballo realizado e grazas por compartir con todas e todos nós un pouquiño do voso verán.