Martes 27 outubro. "Pementeiras"
Unha morea de rapazas e rapaces de 3º e 4º da ESO encheron, coma un grande río, a Galera, o Valdoncel e finalmente a Praza do Campo. Subían ledos e rápidos. A volta costou algo máis... aínda quedaba por rematar a última hora de clase da mañá.
O motivo deste "megatraslado " foi asistir á representación teatral que por xentileza dos Servizos Sociais do Concello de Betanzos, tivo lugar na Aula de Cultura do Edificio Liceo. A compañía Xoré puxo sobre as táboas "Pementeiras: unha historia de empoderamento femenino" que servíu para reflexionar sobre temas tan importantes como o traballo cooperativo, a responsabilidade cidadá e, sobre todo, o papel social e económico das mulleres... a necesidade de recoñecerlles un protagonismo maior na vida social.