Como xa explicamos nunha entrada anterior, o alumnado de cuarto estamos inmersos nun proxecto sobre actividades produtivas.

Esta semana comezamos a centrarnos no traballo das mulleres e o mar. Baixo a batuta de Patri, mestra de prácticas, indagamos nos nosos  fogares se algunha persoa achegada, traballara nas conserveiras da nosa vila.

Fixemos despois unha asamblea na que moitos nenos e nenas contamos a experiencia das súas avoas, bisavoas, …

Este venres trasladamos a escola á rúa. Primeiro  dirixmonos ao Musseo Massó.

Alí David, o noso guía, levounos  primeiro a coñecer algo sobre o SECTOR PRIMARIO. Metímonos nunha sala onde había embarcacións tradicionais, como unha lancha xeiteira ou unha dorna. Estes traballos eran realizados polos homes.

 Explicounos tamén que, unha vez que chegaban ao peirao ou á praia, quen recollía este peixe eran as mulleres. O levaban enriba da cabeza nas patelas e moitas veces  metíanse no mar para collelo.

Ese peixe podía ser vendido na praza ou levado, antes da chegada das conserveiras, ás plantas de salgadura. Empezou polo tanto a falarnos do SECTOR SECUNDARIO.Explicounos como era o proceso da salga e como as mulleres tiñan os peores traballos, os non cualificados.

Contounos que a finais do século XIX Massó se instalou en Bueu. Ao ver as fotos comprobamos como as muleres realizaban o traballo duro, descalzas, mentres que os homes, que eran os encargados, van perfectamente vestidos e con zapatos relucentes. Confirmábase  que os relatos das nosas familiares eran certos. Díxonos que cobraban a metade que os homes.

QUE INXUSTIZA!

 Cambiamos logo de ambiente. Fomos á praza. Como non? Este espazo está cheo de mulleres traballando:

AS PEIXEIRAS

Metémonos no SECTOR TERCIARIO.

 Levábamos toda a semana preparando a entrevista. Por parellas ou en tríos fomos recadando información. Queriamos saber, entre outras cousas, a que hora se erguían pola mañá, que calidades debe ter unha boa regateira, como conciliaban a vida laboral e a familiar, se se consideraban ben pagadas.

FORON AMABILÍSIMAS!

Ao finalizar nos agasallaron cunha merenda saudable e aínda por riba nos agasallaron cunha bolsa de tela.

MOITAS GRAZAS!!! 

O xoves 30 de xaneiro 2020 celebramos o Día da Paz na nosa escola.

Por mor do tempo o alumnado de infantil non puido achegarse ao centro de primaria pero aínda así se xuntaron para cantar e celebrar.

O alumnado de primaria reuniuse no ximnasio.

Para empezar este acto cada grupo recitou, cantou e dramatizou os versos da canción que fora escollida nas aula.

Despois cantamos unha canción en inglés que da a benvida ás persoas doutras razas, cores ou nacionalidades "Welcome home" do neocelandés Dave Dobbyn. 

 A continuación entregamos o premio ao gañador do concurso "Debuxa un selo da túa localidade". Lembramos que foi unha actividade realizada en colaboración co FESOFI  durante o primeiro trimestre.

O agasallado, CRISTIAN ABAL JUNCAL de 5ºA, recibiu, coa imaxe do seu debuxo, un pliego con selos de curso legal e unha postal, ademais de varios selos exclusivos para a súa colección.

 Os tres finalistas de cada clase tamén recibiron unha postal co seu debuxo e un selo exclusivo para coleccionar.

Para rematar entonamos e bailamos un canto de amizade e paz coa "CANTARELA DOS NENOS"  de Xosé Neira Vilas.  

O alumnado de cuarto, recibimos o pasado venres, 23 de xaneiro, a visita de Carlos, pai de Carla Martínez, alumnade 4ºA.

Neste nivel atopámonos inmersos dentro dun proxecto sobre actividades produtivas e Carlos veunos explicar en que consistía o seu traballo. Gustounos moito, pero o que máis nos chamou a atención foi o que nos contou sobre a gran cantidade de lixo que se atopa polo mar. Dixo que a maior oparte atópase no fondo do mar, onde a simple vista non se pode ver. Nos aparellos de pesca aparecen obxectos tan inimaxinables como esta antiquísima lavadora que aparece na imaxe:

O que máis nos anoxou foi o que nos contou sobre as VERTEDURAS que as dragas fan entre as illas de Ons e Sálvora, no espazo protexido do PARQUE NATURAL DAS ILLAS ATLÁNTICAS.

O pai de Carla explicounos que cada certo tempo os peiraos de cidades e vilas como Vigo, Marín, Vilagarcía e Bueu, limpan os fondos de fango e lixo. Para iso utilizan uns barcos, as dragas, que rastrillan os fondos e recollen toda a porquería. Ata aí todo é entendible. O que non nos cabe na cabeza e Carlos denuncia é que se van verter neste espazo.

Co seu radar foi quen de medir a gran montaña de lixo. Para que nos fagamos unha idea a superficie equivale a máis de 100 campos de fútbol e a altura dunha das montaña poderíase equiparar á  dun edificio de 6 pisos.

A verdade é que foi unha charla interesantísima. Aprendimos moitísimo e lle estamos moi, pero que moi agradecidas e agradecidos a este xentil papá.

Este mércores os alumnos e alumnas de 3º fixemos unha saída a Vigo. Alí puidemos visitar o MARCO e Naturnova.

A nosa primeira visita foi ao Museo de Arte Contemporánea, onde visitamos a exposición de Eduardo Gruber que leva por título ‘O salón dos espellos’. Alí vimos varios debuxos do artista, algunha escultura e aprendimos o que é un cadáver exquisito. Mesmo nos animamos a inventar pequenas historias inspiradas na súa obra e a facer un nós mesmos un cadáver exquisito combinando os debuxos de varios compañeiros!

Ao rematar no MARCO fomos a Naturnova. Alí visitamos tres salas diferentes: unha sobre o universo, outra sobre os animais e a última sobre reciclaxe. Fixéronnos traballar moito e tivemos que superar unha proba en cada sala para poder conseguir un diploma. A verdade é que se nos deu bastante ben. Como xa traballáramos o universo o trimestre pasado cos proxectos, os nosos guías quedaron sorprendidos da cantidade de cousas que sabíamos sobre ese tema. Na sala sobre os animais vimos animais con realidade aumentada, e tamén fixemos unha viaxe pola nosa ría nun simulador de submarino en 3D.

Por suposto, nun día tan duro tivemos un ratiño para repoñer enerxía e charlar un rato cos compañeiros.

Pasámolo moi ben e estamos desexando que chegue a seguinte saída.