EDLG

O venres 25 de febreiro os cursos que o desexen poderán participar nun desfile de Entroido que se celebrará na carpa. Cada grupo participará individualmente nun horario previamente programado. Haberá premios para os mellores disfraces e interpretacións. 

O evento será transmitido en directo por Twitch para poder velo desde as aulas, grazas ao traballo do CM de Instalacións de Telecomunicacións que se encargará das cuestións técnicas e da presentación do acto. 

Animádevos a participar!! O prazo de inscrición está aberto ata o venres 18 de febreiro. 

Quen non participe no desfile, pero queira vir disfrazado, terá que facelo tendo sempre colocada e á vista a máscara protectora. Polo tanto, non se permiten caretas ou disfraces que tapen toda a cara. Tampouco accesorios que non vaian suxeitos ao disfrace. 

O pasado 3 de novembro, recibimos no noso centro a Javier Miranda, representante e propietario de “Hortícolas Javier Miranda”, de Riotorto. Veunos falar do seu proxecto empresarial: como foron os inicios do seu negocio, que produtos cultiva e comercializa, como vai rotando os cultivos para evitar a sobreexplotación do solo, o emprego de químicos, dificultades que atopa no seu día a día… Sorprendeunos o novo que é e o ben que fala! Sen dúbida, foi unha actividade moi interesante e que nos conecta co mundo “real” do rural, ademáis de servirnos para profundar no que demos nas clases de Sociais sobre o sector primario.

Fabiana Monteiro Pereira  e Kassandra Soria Febrero, 3º ESO PMAR

Os días 23 e 24 de novembro o alumnado de 1º de Bacharelato tivemos un obradoiro sobre escritura creativa impartido por Artemisa Semedo, que foi alumna do noso Centro.

Co título de “A importancia de relerse e reescribirse”, durante dúas sesións de dúas horas cada unha, desenvolvemos unha serie de actividades relacionadas coa creación de textos e a sensibilización contra a violencia machista.

Nun primeiro momento fixemos un xogo a modo de presentación, para romper o xeo e sentirnos máis cómodos á hora de expresar as nosas ideas; tivemos que elaborar unha frase co noso nome e unha cousa coa que nos identificásemos.

O día 22 de novembro na hora de titoría tivemos un obradoiro de regueifa dirixido por Cristián Gómez, un compañeiro do Perdouro, estudante  de Electrónica que participa no Modelo Burela e que tamén é técnico e locutor de radio en Proxecto Neo.

Cristián explicounos que son as regueifas, como se fan, que versos teñen que rimar, os significados da palabra ( aparte dun canto tamén pode ser un baile ou un pan de voda). Despois fixemos as nosas propias regueifas, unha delas a partir do noso nome.
Gustounos moito esta actividade porque nos deu a coñecer unha nova forma de entreter coa linguaxe, da que non tiñamos coñecemento. Cristián explicounos todo dunha maneira divertida e fácil de comprender.
Tamén tivemos outras persoas na aula, xa que viñeron uns cámaras para gravar e sacar fotos para un documental.
Foi unha actividade entretida e recomendamos que se realice noutros cursos. 

Accede á reportaxe de fotografías aquí.

Uxía Oroza Combarro, Brais Vila Salgueiro, Iker Trillo Souto e Antón Míguez Rubiños. 1º ESO B

O luns 18 de outubro celebrouse o Día das Escritoras e alumnado de Literatura Galega do século XX e da actualidade (2º de Bacharelato) preparou un vídeo cunhas fermosas lecturas de autoras galegas que nos falan das idades da vida. Este traballo estivo coordinado pola súa profesora, Neves Cando. 

Para acceder aos textos lidos, clica na seguinte selección realizada por Bibliotecas Escolares. 

Moitas grazas e parabéns, rapaces!